عزيزتي

بالنسبة للألوان تعتمد على بشرتك
اذا كانت بيضاء او قريبة من البياض تقدرين تلبسين اي لون خصوصا الألوان الغامقة مثل الأحمر و الأسود لكن مو بأول ليلة يعني اول اسبوع حاولي تشكلين من الألوان الفاتحه و بعض البنات يحبون يلبسون الألوان المزهزهه يعني اللي تلمع بأول ايام الزواج كزينة
اما اذا كانت بشرتك سمراء فيحبذ اللون الأبيض او الألوان الفاتحه و لا تلبسي الألوان الفاقعة

و بشكل عام دايما اخذي راي زوجك او انتي بتلاحظين اي الألوان اللي تعجبه من اللي تلبسينهم
بشكل عام الأفضل تشكلين في الألوان مرة فاتح مرة غامق مرة مشكل مرة سادة و هكذا حتى لا يصير الشي روتيني
بالنسبة للشكل ببداية الزواج يفضل تلبسين الموديلات الغير مغرية جدا يعني قمصان تكون بسيطة بس زاهية و انيقة و لها رزة يعني على اساس انك تستحين ببداية الزواج تعملين حركات لزوجك
بس شوي شوي يعني بعد شهر تقريبا ابدي في التشكيل المغري و حتى اذا ما حصلتي تقدري تخترعي او تدوري من مجلات الأزياء على موديلات فيها قصات و اباحات اكثر يعني اقصد فيها اغراء اكثر
اما بالنسبة للستيانة فحجم الصدر مو مشكلة اساسا يعني اهو راح يشوفه
بس اذا كنتي خجولة ممكن تلبسيها ببداية الزواج يعني اول اسبوع بس لأنه قميص النوم راح يفقد الهدف منه و كأنك لابسة ثياب البيت بهالطريقة
ثياب النوم الهدف منها هو البساطة و الراحة و الاغراء بالنسبة للمتزوجين
فانتي عاد و شطارتك في الاختيار
بالنسبة للوقت اللي تلبسيه طبعا بعد تروحون غرفتكم تجلسي معاه شوي و اذا حسيتي انه بيقرب لك اكثر اعتذري منه و اطلبي منه انك تغيري ثيابك و طبعا تكوني مجهزة القميص اللي بتلبسيه في غرفة تبديل الملابس او في الحمام تكرمين و بس لبسي القميص و اطلعي رتبي شعرك و مكياجك و ردي جلسي يمه و لا عليكي شي بس ارخي اعصابك و اتركي امورك لزوجك انشالله اهو بيقوم بالواجب

و نصيحة مني لا تكثري من شراء ثياب النوم قبل الزواج يعني اشتري لك كم بدلة في حدود خمس و شكلي فيهم و بعد ما تاخذي على زوجك روحي انتي معاه علشان اهو اللي يختار طبعا بعيونه و بعيونك انتي بعد يعني لمن يعجبه قميص نوم لازم انتي تكوني مقتنعة فيه و بهذي الطريقة تكوني كسبتي قلبه و كسبتي اختياره
و انا عن نفسي دوم اسوي جذيه مو بس قمصان النوم كل ثيابي اشتريها او افصلها بحضور زوجي بحيث نتشارك في الاختيار و لا يعيب على شي البسه لأنه اختاره هو معاي

__________________