[quote=eActive;2443042][SIZE=3][SIZE=3]
-----------------------------------------------------------

أخوي في الإتحاد قوة .. واضح من ردك الأخير إنك معترف بداخلك لكن تكابر ..
هذا الشئ كفاية ..
و ما تتخيل كيف موضوعك شغلني لدرجة إنه زوجي كل شوي أحكي له ايش صار معكم ..


اسمعني للأخير .. جاوب على هذه الأسئلة مع نفسك :

إنت تبغى تعيش مع زوجتك و لا ما تبغاها خلاص ؟
لإنه على أساسها راح تكون الأجوبة ..


إذا ما تبغى تعيش مع زوجتك مثلا فراح أعطيك الحلول ، اللي راح ترضيكم بإذن الله :

تروح و تجلس مع زوجتك ، و تقول لها .. شوفي بأتكلم معاك بصراحة ..
أنا اعترف إنه أهلي طبايعهم مختلفة عن طبايعكم .. و أنا سواء أسمع لكلام أمي و لا لأ ..
فأنا خلاص تعبت من المشاكل و أبغى وحدة تقبل بطبايع أهلي .. و دام إننا ما راح نتفق على النقطة
هذه .. فإمساك بمعروف أو تسريح بإحسان ..

و الأثاث اللي اشتريتيه ، راح يرجع لك مثل ماهو .. و هذا حقك ..
و المؤخر .. ما أقدر أدفعه كله .. و إنت ما ترضي تعيشي مع شخص غصب عنه ..
و ممكن أكتب لك ورق إني أدفعه لك بالتقسيط ..

إنت كذا أعطيتها حقها و بريت ذمتك بإذن الله ..

------------------------------------------------------------

أما ..
إذا كنت تبغى تعيش مع زوجتك :

فالحل ،، إنك تنسى الماضي إنت و هي ،، و تفتحوا صفحة جديدة ..

يعني :
- تجلس مع أمك و أختك و أخوك ، و تشوف إيش اللي مضايقهم من زوجتك ؟
خليهم يحددوا .. واحد كذا ، اثنين كذا ، ثلاثة كذا .. إلخ ..

- ثم تجلس مع زوجتك ، و تسألها .. إيش اللي مضايقك من أهلي ؟؟؟؟؟
و هي كمان تقولك ببالضبط إيش تبغى ؟


انتهينا من أهلك و من زوجتك ..
نجي لك إنت

- بعد ما توصل لحل وسط ما بين الطرفين ،، لا تمنع أهلك من الجلوس عندك في البيت ..

لكن .. حاول تتعلم المسايسة :

زوجتك تسحرها الكلمة الحلوة وو الحنونة ، مو العناد و الإذلال ..
بكلمة سهلة و بسيطة راح تسحرها .. و ما أظنها صعبة عليك .. لإنه واضح جدا إنك شخص طيب
و حنون و رومانسي معها ،، بس إنك واقع بين الطرفين ..


نحن ما نقول لك ، استأذن منها .. لكن اعطيها خبر من باب إنها شريكة حياتك ..

- اتصل عليها ، وو قول لها حبيبتي .. أمي بتجي اليوم تتغدى عندنا .. إيش رايك ؟؟؟
( إنت هنا مو معناها خايف منها و تاخد رايها .. لا تفهم الجملة غلط ..
بس هذا أسلوب تحرجها فيه علشان تقولك من عيوني )

- أخوك فجأة قال لك ، أبغى أجي عندك البيت ..
إنت بس اعطيها خبر مع كلمة حلوة و رومانسية .. و بعد ما أخوك يخرج ..
روح دلعها بكلمتين و قول لها بيضتي وجهي ، الله يخليك لي ..

- مرات روح لها ، و قول لها أهلي يحبوك و يمدحوا فيك ووو إلخ
- مرات روح لأمك ، و قول لها زوجتي تمدح فيكي و تقولك تعالي زورينا اليوم ..

صدقني ، راح تقرب ما بينهم .. و راح تشيل أمك العناد من راسها و زوجتك برضو تشيل العناد من
راسها

مشكلتكم حلها سهل بإذن الله ..
بس كلها واقفة عليك إنت ..

زوجتك ، أعطيها جرعات زيادة من الحنان و الرومنسية .. و راح تكون خاتم في يدك ..
هي راح تساعدك في تسديد ديونك من حالها ، بس تبغىى تشعر بالأمان معاك و مع أهلك ..

جيب مرات هدية لأمك و قولها من زوجتي ، و هي قالت لي أشتريها لك ..
و العكس كمان مع زوجتك ..



عصبية زوجتك في البداية ، لإنه أي حياة زوجية في البداية لازم فيها مشاكل لحد ما تتعودوا على طبايع
بعض ،، و إنت كمان لك اغلاط .. بس خلاص سامحوا بعض و انسوا .. و إنت واضح عليك إنك انسان
حليم و طيب و أهلك إن شاء الله طيبين .. بس إنت اعمل الطريقة اللي قلت لك عليها ..
و إن شاء الله زوجتك راح تحبهم و راح يحبوها ..

و الله ييسر أموركم ..

و نقطة أخيرة :
ترى اختلاف الجنسيات لها دور ، بسبب اختلاف العادات و التقاليد ..
زميلتي متزوجة ولد خالتها و تشتكي من اختلاف الطبايع .. كيف عاد الأجانب ؟ مو صح ؟