الأخت مشاعر مرهفة .. توقفت عن الرد يوم قلتي ما راح ترجعي تردي علشان دراستك ..
فذهبت و انشغلت أنا أيضا بدراستي .. عالعموم :


أخطاءه السابقة و أخطاءها السابقة ،، كلنا متفقين على الأمر هذا ..
( و ما بلاش نتكلم في الماضي ، الماضي دا كان كله جراح .. )

لكن :
هي كانت تعصب و اعترفت بغلطها و حاولت تقرأ كتب و تغير من نفسها ..
هو إيش عمل علشان يحافظ على منزله ؟
هل حاول يعدل و يصلح من أخطاءه ؟ أم إنه استمر على الغلط ؟
أم إنه طغى هو و اهله بزيادة ؟


الماضي و انتهى ـ و هي تعدلت و بإعترافه - و إيش قال بعد كذا ؟؟؟؟؟
قال صح هي تصلحت و خفت عصبيتها و تغيرت علشاني و علشان حياتنا ،،
لكن أنا خلاص ما أبغاها ،

لييييييييييش الحقد ؟؟؟؟؟
كلنا غلطنا على أزواجنا و غلطوا علينا ،، لكن نسامح و ننسى و نتنازل ..
بس لإنه شايف بس أغلاطها و مو شايف أغلاط نفسه و لا أغلاط أهله ..

---------------------------------------------------------------------------

ما قال أنا ما أبغاها علشان المؤخر ( في لحظة غضب .. ) مثل ما ذكرتي أختي مشاعر
مرهفة .. أرجو الإنتباه للنقطة هذه ، و ما يقدر ينكر هو ،، إنه هذا الشئ في قلبه ..
و هذا الشئ بسببب تأثير أهله عليه .. يعني لم يذكرها في لحظة غضب ..


القصد :
أخطأء الماضي و انتهت و مانقدر نلومها على عصبيتها السابقة لإنه شئ و انتهى ..
لكن الغلط عليه ، لإنه مازال مستمر على أخطاءه و بزيادة .. و ما راعى إنها تحسنت للأفضل


و توقعي ، إنه أصبح يزيد في استفزازها حتى يبغاها تطلب الطلاق و تتنازل عن المؤخر
لإنه هو بنفسه قال ، هي صح تغيرت للأفضل و أعترف بكذا ، لكن مو مخليها إلا علشان المؤخر
و أكرر ،، ما قالها في لحظة غضب ،، لكن النية في قلبه من زمان .


-------------------------------------------------------------


و مد اليد ، هو اللي مد يده عليها أول شئ .. و هي رمت المخدة عليه ..
هو من أجبرها على الخروج عن طورها ،، لإنه واضح جدا إنه يحاول يستفزها بأي طريقة و ليت لوحده ،،
إلا أهله معاه مشتركين .. يعني جماعة ضد واحد ..


الدليل ، إنه جالس يقول ، أنا عارف إنها راح تقول للقاضي على كل شئ ..
يعني عارف نفسه غلطان .. و نحن مو حيوانات علشان الرجال يتعامل معنا بالضرب ..
خليه يستقوى على رجال مثله ، مو على امرأة ..


-------------------------------------------------------------


زلات أهله ، إن كانت بدون قصد .. لكن واضح للجميع و بإعتراف الأخ إنه أمه متقصده تستفز زوجته

فرق شااااااااااااااااااااااااااااسع ، بين شخص يتعامل بعفوية و يزل و أتحمل و أتغاضى ..
و بين شخص يحاول بأي طريقة يدخل مملكتي و يحاول هدمها بأي وسيلة تثير الفتن ..

و مبيت أخيه مو أول مرة ،، هذا في وسط الأسبوع يجي أقل شئ 3 مرات .. و أخته أقل شئ 4 مرات
و غير أمه و غير الويك إند ؟؟؟؟؟؟ بجددددددددددددددد مصخوها و الله

و معروف جدا ، إذا كنتي مطلعة على كتاب الرجال من المريخ ، بإنه المرأة إذا غضبت ..
تبغى بس تتكلم و تتكلم و تتكلم و تبغى شخص يسمع لها ،، و إذا كنتي تسمعي لمحاضرة الشيخ
عايض القرني فقال إنه أحدث دراسة تقول إذا الزوجة تحدثت غاضبة ، فعليك أيها الزوج أن تنصتتتتتت لها
و تغلق التلفاز و تقول لها نعم أنا مخطئ و أتوب إلى الله ( قالها بصيغة فكاهية ) .. و قال إنه هذه
أنسب طريقة للفوز بقلب المرأة ..

يعني لا هي أول و لا آخر إمرأة تريد الشئ هذا من زوجها ..


-------------------------------------------------------------


زوجته منحته الكثير و الكثير وو الكثير ..
تتفنن له في اللبس و المكياج .. و في العلاقة الخاصة - و هذه أهم شئ يريده الرجل -
و تتحمل مصاريفها و نظيفة و تحافظ على صلاتها و خلوقة جدا و تحترم أهله أمامهم بإعترافه ..

و ما طلبت شئ بالمقابل غير إنه يحتويها .. و يحترموا خصوصياتها ..
صعب عليه ؟؟؟؟؟؟؟؟؟؟؟؟؟؟


و هو يوم قالها إنه مخليها من أجل المؤخر ،، فهو اعترف أمامنا و واضح جدا إنها ليست زلة ..
و إنت تقولي إنه قالها تحت تأثير الغضب ؟؟؟؟؟؟؟؟؟؟؟؟؟؟
لا و ألف لا .. ما قالها تحت تأثير الغضب ، لا نحرف الكلام على كيفنا ..

هو ناوي من زمان على تركها و بنفسه قال و مع إنها تحسنت للأفضل .. لكن المؤخر مانعه ..
و الدليل إنه طرح المواضيع تبعه ، و كل همه .. المؤخر فقط و ليس الصلح ؟؟؟؟؟؟؟؟

ما جاء و قال و الله بالغلط و لحظة غضب قلت لها الجملةة هذه ..
يعني قالها مع سبق الإصرار و الترصد .. و كأنه مستني فرصة من زمان ..

حاول إنه يخليها تطلب الطلاق بأي طريقة حتى تتخلى عن المؤخر لكنها مازالت محافظة على منزلها
لآخر لحظةة .. و الرجال مو راضي يتغير و لا يعترف بأغلاطه و ما يبغاها ..
تبغيها تجلس له ؟؟؟؟؟ على إيش ؟؟؟؟؟

بدل ما يقول لها يعطيك العافية ، تحملتي أخوي أسبوعين ؟؟؟؟
المرأة تبحث عن الكلمة الحلوة و الرقيقة ..

و أنا متأكدة لو إنه راح و باس راسها و جاب لها هدية بسيطة و قال لها و الله بيضتي وجهي قدام أخوي
و الله لا يحرمني منك .. إنها كانت راح تشيله هو و اهله فوق راسها ..


------------------------------------------------------------


و لو امي زارتني فجأة ، زوجي بيشيلها فوق راسه .. لكن لو أمي و أهلي كل ثانية ناقزين ..
ليت شهر أو 2 .. سنة و نص تقريبا .. و يتقصدوا نشر الفتنة بيني و بين زوجي و إثارة المشاكل ..
و داخلين البيت كأنه البيت بيتهم و زوجي كل شوي يوصلهم و يخدمهم و يوديهم و يجيبهم و يلبي
طلباتهم ، و بعد ما يخرجوا .. يقربعوا البيت و فرضا هو اللي يرتب من وراهم .. نقول فرضا ..

أنا اللي راح أوقف أهلي عند حدهم ،، و بأسلوب راقي ..
تقديرا للزوج اللي عامل أهلي بكل ذوق و احترام ..


و هذا اللي بالضبط حصل مرة معاي ،، كان يخدم أهلي من عيونه و يوصلهم أي مكان يبغوه .. تكرما
منه .. و مرة أهلي استهانوا به أمامي و حسبوه إنه ضعيف شخصية - لكن الصحيح إنه يحبهم لمحبته
لي -، يعني وحدة من أخواتي زوجها ما يبغى يوصلها مكان .. دقت على أمي و قالت خلي فلان يجي
يوصلني و من غير ما يتكلموا أمامي بإحترام و مع إنه زوجي ما كان موجود .. لكن أنا قلت لهم وقتها :
( معليه .. زوجي مو سواق عندها )
لإنهم قالوها بطريقة تقليل من شأنه أمامي و أمام الجميع و بتريقة ..

و نفس الشئ صار مرة ، واحد من أخواني يقول .. شلنا نصيبك بس إنت ( يعني مو لزوجك )..
خلي زوجك يجي يمر و ياخد نصيبك ..؟؟؟؟ قلت لأخوي .. معليه شكرا و زوجي مو فاضي ..
مع إنه زوجي لو قلت له ، ما كان قال لأ .. بس أنا بأقدره و أرفع من شأنه أمام أهلي ..
ما أفرضهم عليه فرررررررض ..

و الحمد لله ،، ألحين يقولوا مافي أحد مثل زوج روح الطير ..
و السبب ،، إني حافظت على صورة أهلي أمام زوجي و نفس الوقت دافعت عنه أمام أهلي
و ما أستغليت محبة زوجي و احترامه لأهلي من أجل مصالحهم و خدمتهم ..

يعني أنا بنتهم من عيوني أخدمهم و يعملوا فيا اللي يبغوه .. لكن ما أجبر زوجي ..

-----------------------------------------------------------

هي أخطأت و اعترفت بغلطها .. لكن هو مو شايف أغلاطه و لا
عيووبه و لا عيووب أهله .. و الكل شايف و متابع .. علشان كذا ما
سلطنا الضوء على أخطائها و اللي هي أصلحتها ..


وقت ما هو يعترف بأغلاطه و أغلاط أهله و أمه و يقر بها ..
وقتها نحن اللي راح ننصفه بنفسنا ..


و أخيرا ، إذا عندك دراسة و مشغولة ،، فنحن نفس الشئ عندنا دراسة و مشاريع تخرج ..
لكن ما عمرنا قللنا من قيمة أي رأي و من قيمة أصحابها و وصفناهم :
بإنهم من الذين أعمى الله بصيرتهم .. هناك شئ اسمه احترام الرأي الآخر ..


و إذا إنت مؤيدة لتصرفاته ، فمو معناها إنك صح ،، و نحن غلط ..
و نحن اللي أعمىى الله بصيرتنا .. و إنتم اللي أنار الله بصيرتكم ؟؟؟؟؟؟؟

لكن الناس أجناس ..
طبايعهم الإثنين ما اتفقت .. و علشان كذا قلنا له إذا تزوجت فخليك من البداية واضح
يمكن يلقى وحدة تتفق معاه و مع أهله ؟؟؟؟؟؟؟؟؟؟