* هذه المستجدات *

قمت الصبح بدري ، و استهديت بالله و قلت بأجلس أذاكر و افتكرت ردودكم الرائعة و حسيت قد إيش
إني ( هبلة بنظرها ) .. و ما كنت حاسة بخطورة كلامها عن ولدي ،، لإنه يوم أختي سمعت كذا و زوجة
أخوي ، حذروني منها و قالوا كلمتها ترى ( خطرة و لازم تاخدي حذرك منها ) .. بس كنت أقول ما تقصد

المهم ،، قمت و ما أبغى أشوف وجهها ،، لإني تحملتها كثير و قمت بأكلمها و ما قدرت أسكت ..
و صليت ركعتين و استخرت ،، لإني ما عمري جرحتها و لا ضايقتها بالكلمة ، علشان لا تقل أدبها ،، و إذا
وصلنا للمرحلة هذه فما راح أخليها يوم واحد عندي ،، حتى لو دفعت عشرات الألوف..

كانت توها صحيت ،، و أنا جالسة بشرشف الصلاة ناديتها بإسمها .. و كنت مقررة إني خلاص ما أبغاها
و يصير اللي يصير .. ( يكفي انذليت علشان خاطر ولدي ) ..

جات و وجهها كالعادة ( كشرة ،، يعني وجهها دايما عابس و تتكلم من طرف خشمها ) ..
قلت لها ( أنا كلمت أمس مستر ( زوجي ) .. و قلت له إنت تبغي تسافري .. و قال لي .. هي عقدها
سنتين و لو خلصت السنتين من عيوني أسفرها .. بس دام تبغى تسافر من بدري .. فخليها تجيب قيمة التذاكر وو أحجز لها من اليوم و سافري خلاص ..)

قامت تكشر كالعادة هي حجمها ضعفي مرتين ماشاء الله ، و زادت هنا ضعفين كمان من قلة الحركة ..
بس أقصر مني .. و خفت تهجم علي
و ترد علي ( و تقول و ليش غيرتوا كلامكم ؟؟؟ )
قلت لها ( أنا ما كنت أدري و يوم قلت له أمس .. قال لي قوليلها كذا )

قلت لها ،، هو يقول ليه ما قلتي لنا من زمان من قبل لا تجي إنك تبغي تجلسي بس سنة وتسافري ..
كنت طلبت وحدة تانية و تجي تجلس معاي هنا ؟

قالت ( أنا سألت أمك و قالت بس سنة و خلاص و تسافري اندونيسيا ) ..
قلت لها ( و إنت ليه تسألي أمي ؟ ليه ما تسأليني ؟ بعدين أنا اتفاقي معاك سنتين و إنت وافقتي ) ..

( هي كذابة ، لإني من يومين ، يوم قالت لي سفروني - تهددني عشان عارفة إني محتاجة لها - ..
و سألتها متى المفروض تسافري ؟ - علشان أبغى أسمع الإجابة منها - قالت لي : في رمضان )

___________________________________________

قامت تقول لي ( طبعا أنا قلت إنها ترد بدل الرد عشرة ) ..

و قبل كذا قالت لي - ترى أنا جالسة بكيفي ، و لا أقدر بكل سهولة إذا ما عجبني الشغل أشرد ؟؟؟
( تقهرني لإنها تجي تقولي كذا و أنا أكون معاملتها بكل احترام ؟؟؟ يعني بجد عيييييب كلامها )

جلست تقول لي ( إنت إيش اللي قالبك اليوم ؟؟؟ أمس ما كان فيك شئ ؟؟؟؟؟ و هاتي كم قيمة
التذكرة و دحين ألم أغراضي )
ملاحظة : ( طبعا أنا ما راح أخليها تدفع قيمة التذكرة .. مو علشانها ،، علشان ربنا ) ..

قلت لها ( أنا أمس تضايقت من كلامك ، يوم تقولي سفارة اندونيسيا و شرطة ؟؟؟؟؟؟ مافهمت معنى
كلامك .. فهميني إيش تقصدي ؟؟؟؟ أحد مضايقك بشئ ؟؟؟ أنا عمري عاملتك بقسوة ؟ عمري
ضايقتك بشئ ؟؟؟؟؟ مو بأعاملك مثل أختي ؟؟؟؟؟ و خرجت و أنا متضايقة مرة منك )

صرخت علي و قالت لي ( بس خلاص ، ما أبغى كلام ) ..

( طبعا أنا أول مرة أعاملها كذا .. بس خلاص من جددددد ما ينفع معها و ربي اللي شايف كل شئ ..
و دايما يوم تتكلم و ترد علي ،، أستناها تخلص للأخير و أسمع لها )


قلت لها ( تعالي هنا أوقفي ، إيش اللي خلاص كلام اسكتي ؟؟؟؟ أنا شغالة عندك تسكتيني ؟؟؟؟؟ )
قالت ( لأ .. أنا الشغالة .. إيش فيك معصبة ؟؟؟؟؟ و أنا اللي مجلسني بس إنت علشان و علشان
ولدك ) ..
قلت لها ( أنا عمري أذيتك بشئ ؟؟؟ ردي ..؟؟؟؟ فهميني إيش تقصدي بكلامك لي أمس ؟؟؟؟ )

طنشتني و راحت غرفتها و صكت الباب .. قلت لها ( تعالي هنا ما خلصت كلامي ) ..
رحت غرفتها و دقيت الباب أول شئ ثم فتحته ،، و جالسة تلم أغراضها و معطيتني ظهرها و تقول ما أبغى أتكلم ..

- طبعا طول الوقت و أنا أتكلم معها بحزم ،، بس بهدوء و بإتزان - ..
و هي تنافخ كل شوي .. بأوصف الموقف علشان أشوف هل أنا غلطت ؟؟؟؟

قلت لها ( شوفي ،، أنا عمري ما عاملتك مثل ما أختي الكبيرة تعاملك - طبعا هي تخاف من أختي ،
لإن أختي تشغلهم مضبوط و شغالاتها كلهم زي الألف - و يوم كانت أختي تزور أمي ، كانت تجري هذه
الشغالة و تلمع البيت ،، أنا أتعامل معاك زي أختي و لا عمري ضايقتك بشئ ،، بس ربي هو الشاهد ..
أنا اشتكي لربنا و ربنا ياخد لي حقي .. إنت سافري و ما أبغى منك شئ ،، بس ربي ما راح يضيع
أجري و شايف كل شئ ) <- أخدت بنصيحة مشكلتي أصدق ..

قامت ترد و تقول دحين ألم شنطتي و معطيتني ظهرها ،، قلت لها جهزي شنطتك ..

و جات تبغى تدف يدي و تطلع من الغرفة ،، قمت قلت لها - قبل لا تسافري أعطيني صور ولدي كلها و
أي صورة لنا عندك و أنا الغلطانة اللي تعاملت معك كذا .. بس بعد كذا إذا بيوم جبت وحدة تانية تشتغل
عندي .. مستحييييييل أعاملها زي ما تعاملت معاك ، و كله بسببك إنت .. و يوم القيامة نتقابل و ربي
شايف كل شئ .. و أنا ماني مسامحتك على كل شئ تعمليه ) ..

__________________________________________________ ________________

بس تركتها و رحت غرفتي ،، و اتصلت على أمي سألتها و قالت لي ( لأ ما عمري قلت لها ؟؟ )
بس قلت لأمي .. خلاص أنا ما أتحمل أكثر من كذا .. بأسفرها و ولدي بأتصرف معه و أشوف كيف ؟؟؟

و قالت لي ( جيبيه عندنا يجلس كم شهر ) .. و أمي أمنيتها إنه ولدي يجلس معها ..

طبعا ولدي يحب أمي أكثر مني .. و أنا باقيلي 4 أشهر و أخلص الترم التاني إن شاء الله ..
و مشروع التخرج مو لازم أداوم فيه غير مرة بالأسبوع و يكون زوجي بدأت إجازته و ولدي دخل المدرسة.

أنا بجد تعبت منها و صارت مواقف من قبل و كنت أحط لها أعذار ،، لكن مع آخر موقف لها ،، إنها تقول لي بس خلاص
اسكتي ما أبغى أتكلم ،، و تروح غرفتها و تطنشني و أنا ما عمري قاطعت كلامها و أحترمها لحد ما تخلص ( ردها علي )
؟؟؟؟ و تعاملني كذا .. و كل شوي أقول عشان ربنا .. بس ربنا ما يرضى بكذا ..

خلاص بجد ..