بسم الله الرحمن الرحيم

أول مرة أتجرأ وأطرح مشكلة لي في منتدى عام، مادري يمكن لأن صدري ضايق واحترت شلون أتصرف وأعالج الموضوع.

قلت أطرح مشكلتي وأسمع آرائكم، يمكن عل وعسى..

انا متزوجة عن حب من شخص يحبني ويحترمني ومو مقصر علي بأي طلب أطلبه منه، عندي ولد واحد الله يخليه لنا، يعني باختصار أطالع ربي وهالأثنين (زوجي وولدي).

قبل الزواج زوجي كان له بعض المغامرات، طحت عليه ، واعترفلي، وسامحته، وبعدها صار انسان مخلص، ماعنده سوالف كلش.

تزوجنا وما شفت عليه شي يشكك، بس قلبي كان دايما يتذكر لحظات خيانته لي اللي قبل الزواج، سواءا لو صادفت اللي كان يكلمهم مثلا، أو سمعت قصة عن خيانة، دايما يرجعلي شبح الذكريات وصورته واهو يخونني !

لو أقولكم ان ثقتي فيه 100% مراح أكون صادقة مع نفسي ومع ربي، لأ أشك فيه أحيانا !

في سنتنا الأولى..
كان طالع، وناسي موبايله بالبيت، الشيطان وزني وقلت خل أتعبث وأشوف شنو فيه ما فيه، والصدمة إني لقيت بالرسائل المستقبلة رسالة تقول: " فلان دق على فلانة اعزمها على الحفلة باجر --- وحاط رقم تلفون البنت" !
والرسالة هذي من رفيج مقرب له، صادف اني اعرف رقمه بالصدفة.

أنا حسيت ان قلبي انشلع من مكانه ! شلون..؟ أي حفلة..؟ ومنو هذي..؟

ما قدرت أتحمل الموقف، واجهته..

وكان رده ان المسج هذا واصله بالغلط من رفيجه، كان بيدزه حق واحد نفس اسمه بس دزله اياه بالغلط !

طبعا اهو ما يدري ان اعرف رقم رفيجه هذا، فقالي في البداية ان المسج واصله بالغلط، وما عقّب ان من رفيجه، ولمن قلت له ان هذا رقم رفيجك، نكر، وأصر على نكرانه.. لين دقيت على الرقم وطلبت رفيجه بالإسم وقالي نعم، وقتها اعترف ان رقم رفيجه وما كان حاب يقولي عشان ما يعقد السالفة !

طوفت الموضوع، ومرت السالفة على خير..

طبعا عقب، ترجي وزعل وسوالف وايد دامت اسبوع تقريبا..

هذي السالفة الأولى، قلت أذكرها لكم يمكن تربطونها بالسالفة الثانية اللي صارت قبل يومين.

كنت حلمانه ان ماسكة تلفون ريلي جان ألقى رقم بنت، قعدت من النوم متضايقة وقلت له السالفة على ضحك وعادي مر اليوم.

العصر، راح ينام وكان تلفونه بالصالة، قلت خل أشوف الأرقام يمكن ألقى الرقم اللي شفته بالحلم !

خذيت الموبايل وقعدت أطالع، دخلت على الرسائل المرسلة..
وايد مسجات تهنئة من ربعه، وتعزية ونكت وسوالف عادية موجودة بموبايل أي شخص.

بس الصدمة لمن طحت على مسج يقول:" جهز حالك فلانه تبي تجي معانا" وكان بالرسائل المرسله يعني ريلي اللي داز المسج !

والرقم اللي دازه له رقم رفيجه نفسه صاحب المسج القديم، اللي عن الحفله !

طالعت التاريخ، وتذكرت هاليوم اهو وين كان بهالوقت، تذكرت انه قايلي انه بيروح البحر وكنا متزاعلين، بس ماقالي مع منو بيروح، أذكر قلت له:" الله معاك"، وما كلمته طول اليوم لين رجع بليل.

حدي ينيت، وقلت هذي اكيد البنت اللي بالمسج مال الحفلة، وقتها انا كنت محتفظة بالرقم اللي بالمسج القديم، مادري شلون مسكت تلفوني ودقيت عليه، وشالته وحده، وقلت لها:" ألو.. منو فلانه"، جان تقول:" لأ النمرة غلط".

يعني مو اهية...!

قعد زوجي من النوم، وكان قاعد يطالع مباراة (أنا نوعي كل شي يبين على ويهي اذا تكدرت)..
قالي:" شفيج " !
قلت له:" حلمي تحقق" !
قالي:" أي حلم " ؟
المهم قلته له كيت وكيت.. عطني تلفونك.

عطاني اياه، وقالي وريني شفيه تلفوني..؟

المهم رحت على المسج ووريته، وقلت له أحب أعرف منك، شنو هالمسج..؟

اهو ويهه انقلب، وحسيت ان قلبه قام يطق بسرعة،أول ما قراه، قالي والله مو أنا اللي داز هالمسج !!

هااااااااااا !! شنو مو انت اللي دازه واهو بموبايلك وبالرسائل المرسلة، ومنو بيتجرأ يدز مسج من تلفونك !!

طبعا اهو قالي:" مادري والله مادري" ..!

قلت له:" هذا المسج اندز الصبح نفس اليوم اللي انت رحت فيه البحر، وكنا متزاعلين ما نكلم بعض".

جان يقول:" اي امبلا يمكن فلان أخو رفيجي دازه حق أخوه لأني كنت عنده الصبح بعطيه أوراق من التعليم العالي يوديها معاه لمن يسافر يسألي عن جامعة بره بما انه واهو يدرس بره - وصج اهو يدرس بره - "

قلت له:" يا سلام، وأخو رفيجك هذا ما عنده تلفون" ؟

قالي:" لأ ماعنده، حتى اهو كان يدق عليه من البيت وكلمه ومادري شقاله تواعدو بيروحون المحكمه جنه، وبعدها دق عليه وما يشيله، عاد خذا تلفوني والظاهر دز المسج هذا... وانا على فكرة توني أدري بهالمسج ولا شفته أصلا.."

وقال انه اهو كان رايح البحر مع ولد اخته، وهذا رقم ولد اختي اخذيه ودقي عليه وسئليه، والا دقي على اختي وسئليها ولدج يوم الثلاثة وينه ومع منو، أكيد أمه تدري ولدها وين رايح ومع منو..!

وخذا التلفون ودق على ولد اخته وحط سبيكر وكلمه قاله انت مع منو يوم الثلاثة، والولد كان نايم مسكين اخترع وقال رحنا البحر الظهر جان يقوله والجمعة جان يقول اي كنا بالبحر ليش...!!؟
(( دق علي ولد اخته اليوم الثاني، يعني في احتمال يكونون طابخينها سوا.. احتمال لا أكثر !! ))

أنا السالفة ما دشت مخي، اشمعنا رفيجه هذا نفسه اللي صايره السالفة معاه قبل، وشلون هذا يدز مسج من تلفون، ومعقولة حتى لو يدرس بره يكون ما عنده تلفون...!!

يعني ما يدش العقل !!

حلفلي بالله، وقالي أحلفلج على المصحف، وحلف بحياة ولدنا، وقالي ان المسج ما يدري عنه !!!

أنا موقفي كان جدا بارد، وحيل هادية، وما عصبت ولا تنرفزت، اللي قلته له:" ان السالفة هذي ما تطوف علي بسهولة، وأنا ما أقدر أعيش مع واحد يستغفلني".

أحب أسمع رايكم بالموضوع، لأني قاعدة أفكر بأفكار حيل هدامة... تعبت ودي أحط حد لمعاناتي هذي، ما أقدر أعيش مع انسان اشك فيه وبتصرفاته، ولا أقدر أعيش مع انسان يستغفلني !!

دلوني الله يجزاكم خير...