السلام عليكم ورحمه الله وبركاته

اخواني واخواتي من ثلاث ايام صار لي موقف من زوجي بصراحه صدمني
زوجي حبوب وطيب ودايما يقول اهلك مثل اهلي ودايم يفكر فيهمويهتم فيهم
وفي بدايه زواجنا يقول ابي اكون بالنسبه لاهلك مثل ولدهم لان اخواني الاولاد كلهم صغار
المهم من حوالي شهر كانو خواتي رايحين زواج وقاعه الزواج بعيده مره بالنسبه لبيت اهلي
بس لبيتي مو بعيده مره يعني حوالي ثلث ساعه
المهم وكانو اهلي جايين عندي وراحو من عندي للزواج واتصلو علي وقالي خلي زوجك يجي ياخذنا
قلت له وكان طالع من الاستراحه والاستراحه مو بعيده عن القاعه وقال ماعلي منهم مانيب رايح له ترجيته وقلت له حرام عليك تخليهم في القاعه والمكان بعيد وانت عارف ان مافيه احد بيجيبهم وصعبه يجون في ليموزين بنات واخاف عليهم
المهم وافق بعد ما ترجيته وراح لهم من دون نفس
المهم سكت وعديتها له ولا فتحت معاه الموضوع
ومن ثلاثه ايام كانت امي معزومه وكانت العزيمه في نفس الحي الي فيه بيتي قالت امي اجل بجي عندك عشان يوديني زوجك قلت طيب
المهم كان زوجي طالع واتصلت عليه قلت له بعد العشاء تجي وتودي امي لانها معزومه عند وبنت خالتي والبيت في نفس الحي حقنا وكان زوجي قريب من البيت قال مانيب مودي احد انا انصدمت لان المشوار قريب وامي واخواتي جو لبيتي في ليموزين لان اخواني الاولاد صغار على السواقه يعني مافي احد يوديهمويجيبهم قالت امي بنجي في ليموزين وزوجك يودينا للعزيمه لانها قريبه من بيتك قلت طيب لاني متوقعه انه بيوافق بس لما كلمته قالي مانيب مودي احد قلت له الله يخليك ود امي قال لا مانيب والمشكله اني امس مسويه له حفله وشموع وحركات رومانسيه وعطيته هديه بس مانفع معاه قلت له ترا هذي امي مو وحده من خواتي عيب عليك قال لا المهم انا عصبت وسكرت السماعه في وجهه
المهم صرفت الموضوع وقلت لامي ان جاه رجال ويقول بيتاخر بيجي يوديك الساعه عشر قالت امي لا ما يمدي هذي عزيمه مو زواج
المهم راحت امي في ليموزين وخواتي كانو معزومين في زواج ودو امي للعزيمه وراحو للزواج
المهم زوج اختي الثاني راح وجاب امي من العزيمه واتصلو خواتي قالو بيجي احد ياخذنا والا نجي في ليموزين قالت امي لا تجون في الليل في ليموزين راح لزوجي وكنت مسويه العشاء اخذت امي مني الصينيه وراحت سلمت على زوجي وقالت له الله يعافيك روح جيب البنات من الزواج تراه قريب من البيت زوجي قال ما اعرفه وينه فيه المهم امي وصفت له وطلعت
بعدينناداني وقالي ترا ماعلي من احد مانيب جايب احد
انا عصبت وقلت له ليه ماقلت لامي انك ماراح تجيبهم
المهم قلت لامي ترا زوجي يقول مانيب جايبهم
امي ضاق صدرها قالت ياليتني ماقلت له
وقالت لاخواتي تعالو في ليموزين وخلونا نروح لبيتنا انا قلت لا بتنامون هنا لاتروحون في هالليل بس امي ضاق صدرها من موقف زوجي لانه ما اهتم في كلامها
انا بعد عصبت المفروض يروح عشان امي حرمه كبيره تجي لعنده وتطلب منه ويرفض ويخلي خواتي يجون في الليل في ليموزين
والله اني انقهرت وحقدت عليه ليه يفشلني عند اهلي
ولا يحترم كلامي والله ما كان كذا
انا زعلت عليه ولا اكلمه من هذاك اليوم امس كنت طالعه ولا جلست معاه ابد واليوم بعد ما اكلمه اصحيه للصلاه وبس
واحط له اكله واجهز ملابس يعني اسوي واجذباتي بس ما اكلمه
وهو مطنش وساكت وجالس بس عند التلفزيون
اليوم غسلت اسوار البيت وكان مدخل سيارته وكانت ومغبره غسلتها ومسحتها له رغم اني زعلانه من موقفه ومصدومه فيه لانه فشلني عند اهلي ولا احترم اهلي رغم ان امي طيبه ودايما توصيني عليه
مو مثل امه ام المشاكل
المهم اليوم مثل ماقلت لكم مطنش وساكت وهذي عادته اذا زعلت مايراضيني رغم انه اهو الغلطان
وطلع من البيت من دون مايسئلني مثل العاده اذا ابي شي قبل لا يطلع
بس لما شاف السياره ارسل لي رساله على الجوال
وقالي شكرا ياروحي على تغسيل السياره اسف يا بعد عمري احبك
بصراحه انا نزلت دموعي وضاق صدري ليه يطنشني كذا رغم انه الغلطان انا قررت اني اطول الزعل ولا اتنازل عشان يحس بغلطته
وش رايكم وش تنصحوني فيه انا ابيه يحس انه غلط ويعتذر لي ويوعدني انه مايسوي الشي هذا مره ثانيه للانه يعرف ضروف اهلي وهو قال انه مثل ولدهم والحين يغير كلامه

والله انا واصله معي وزعلانه من موقفه كثير بشكل ماتتخيلونه وكل ماتذكرت الموقف بكيت والي قاهرني انه ما اعتذر ولا حس بغلطه

قولولي وش اسوي؟