فـــــــن العـــــــزايم - منتدى عالم الأسرة والمجتمع

26-09-2005, 12:06 AM

princees

من كبار شخصيات المنتدى

تاريخ التسجيل: Mar 2005

المشاركات: 2,815

فـــــــن العـــــــزايم

رمضان شهر الخير واللمة بيلم الناس دايماً حواليه، من الجد للحفيد ومن البعيد للقريب كله صايم، ووقت الفطار تحلى العزايم والولايم، لكن برضة الأمر مايخلاش من شوية مشاكل بتحصل لما الناس بتنسى حاجة اسمها فن العزايم علشان كده لازم نتعرف على الفن ده ونعرف إيه هو وإيه حكايته وإزاي نستفيد منه.

مين المسؤول عن نجاح العزومة؟؟!

نجاح العزومة بيكون معتمد على عاملين أساسيين:
1.المضيف.
2.الضيف.

على الرغم من أن المسؤولية بتقع على الاتنين ولكن العبء الأكبر بيكون على المضيف علشان كده حنتكلم عنه أكتر من الضيف.

الدعــوة

المضيف:

أول حاجة بيقوم بيها المضيف هي بالتأكيد دعوة الضيوف ولكن الموضوع مش سهل كده يعني مش تتصل بالتليفون وتبلغ الضيف إنه معزوم وخلاص...

فيه اعتبارات تانية لازم تاخدي بالك منها في البداية وهي:

1- ميعاد الدعوة يكون قبل العزومة بـيومين على الأقل.

2- لازم تحددي موعد حضور الضيف وطبعاً علشان إحنا في رمضان فالميعاد المناسب بيكون قبل الفطار بنص ساعة.

3- لازم يكون فيه حد غيرك في استقبال الضيوف لأنك بالتأكيد حتكوني مشغولة في المطبخ.

4- من الأحسن إن الأشخاص المدعوين يكونوا متقاربين على المستوى الثقافي والاجتماعي.

الضيف:

لو كنت الضيف فبرضه فيه حاجات مهمه لازم تخلي بالك منها:

1. عند قبولك للدعوة لازم تكون متأكد تماماً إنك فعلاً حتقدر تروح.

2. لو حصل أي ظرف طارئ لازم تعتذر فوراً للمضيف عن عدم قدرتك لقبول الدعوة.

3. حاول توصل في الميعاد المناسب للدعوة يعني بلاش تروح بدري قوي عن الميعاد علشان متحرجش المضيف لأن من الممكن جدا يكون لسه غير مستعد وبلاش تتأخر قوي علشان متتسببش في قلق للمضيف.

4.اعرض مساعدتك للمضيف ولكن بدون إلحاح يعني بجملة بسيطة مثل "أي مساعدة أقدر أقوم بيها".

خلّي بالك من راحة ضيفك

لازم تخلي بالك من راحة الضيف يعني لازم يكون قاعد على السفرة مرتاح...

إزاي ده يحصل؟؟؟

ده ممكن يحصل لما توفر للضيف مساحات مناسبة للتحرك المناسب والمساحات المناسبة دي تتمثل في الآتي:

مكان كرسي السفرة:

مكان السفرة طبيعي بيكون في غرفة السفرة بس المهم إنه يكون ورا كل كرسي من الكراسي مساحة ما بين (60:45سم) وده علشان نسهل على الضيف القيام والجلوس من على الكرسي والحركة ورا الكراسي وقت تقديم الوجبات.

حركة الذراعين على السفرة:

علشان يكون فيه فرصة للضيف إنه يحرك ذراعيه بحرية بدون إحداث أي خسائر مادية لازم يكون المسافة بين كل ضيف والتاني حوالي 60 سم في حالة إن الكراسي من غير ذراعين ولكن لو كنت الكراسي ليها ذراعين بتزيد المسافة 5 سم.

حركة القدمين تحت السفرة:

طبيعي المسافة المناسبة لتسهيل حركة القدمين تحت السفرة هي نفس المساحة اللي وفرناها لتسهيل حركة الذراعين بس من المهم برضة إننا ناخد بالنا من المسافة اللي بين ترابيزة السفرة وقاعدة الكرسي نفسه والمسافة المناسبة بتكون حوالي 25سم من قاعدة الكرسي للسفرة نفسها.

مفيش مساحة:

لو كانت السفرة نفسها صغيرة فممكن في الحالة دي تزودي عدد من الترابيزات الصغيرة بس لازم تكون في نفس مستوى السفرة ويكون عليها مفارش من نفس لون مفرش السفرة الأساسية أو على الأقل ملائم ليه.

لو كانت مساحة الغرفة نفسها ضيقة فممكن تستعيني بترابيزة تانية في غرفة تانية وتكون للضيوف الأصغر في السن وفي الحالة دي بيتقدم الأكل كله على الترابيزة الأساسية (بوفيه) وكل واحد بيحضر الطبق الخاص به وبيروح لمكانه على الترابيزة التانية.

بعد الضيف ما شرفك بقبول الدعوة ووصل وإنتِ اطمنتِ على راحته... أقابلك المرة الجاية علشان أقولك على الخطوة اللي بعد كده إن شاء الله ورمضااااااااااان كرييييييييييييم

__________________

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه