ليـــلة الحنــــاء - منتدى عالم الأسرة والمجتمع

29-08-2005, 10:13 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

ليـــلة الحنــــاء

فيه ناس أول ما هيشوفوا العنوان هيقولوا هو احنا لسه اتكلمنا عن حاجة في تجهيزات الفرح لما نتكلم عن ليلة الحناء؟!!

ماهو يا بنات ليلة الحناء برضه ليها تجهيزات زي ليلة الفرح...

علشان كده أنا قلت أكلمكم عنها شوية علشان لو ناوية تعملي ليلة حناء مختلفة تعملي حسابك من دلوقتي وتجيبي مستلزماتها في وسط باقي الحاجات..

النقوش أنواع...

نقوشات الحناء طلع ليها أصل وفصل.. وطلع فيه أنواع مختلفة مش للحناء بس لأ ده كمان لنقوشات الحناء نفسها يعني فيه مثلاً:

النقش السوداني ويكون برسومات عريضة.
النقش الخليجي ويكون برسومات ناعمة.
النقش اليمني رسوماته صغيرة ودقيقة.
النقش الهندي وهو صغير جدا وناعم وبتكون كل رسمة قريبة من التانية.
النقش المجوز وده بيكون جامع مع بين نقشتين وعادة ما بيكونوا الخليجي مع السوداني...

خليكِ ناصحة...

دلوقتي طبعاً ليلة الحناء بقى ليها ناس متخصصين بييجوا يعملوا الحناء ويغنوا أغنيتين ويخلوا العروسة تلبس كام طقم وطبعاً ياخدوا مبلغ وقدره في الآخر.. هو آه فداكِ فلوس الدنيا كلها يا عروسة بس برضه ليه ماتستغليش الفلوس دي في شهر العسل مثلاً؟!! يعني وفري الفلوس دي وقومي إنت وأصحابك وأهلك بالليلة وأنا هاقول لك تعملي إيه بالظبط... ونبدأ كلامنا بازاي تعملي الحنة وترسميها...

ازاي تعملي الحناء

الحناء الأصلية لونين؛ حناء حمراء ودي معروفة وحناء سوداء ودي اسمها الدايج... إيه الفرق بينهم؟!!

الفرق بين اللونين إن فيه لون بيليق على بشرة ولون مش بيليق على بشرة...

إيه بيليق على إيه؟

- البشرة السمراء بيليق عليها الحناء السمراء أكتر.
- البشرة البيضاء بيليق عليها الاتنين.

نعمل الحناء بقى..

الحناء الحمراء:

لو هتستخدمي حناء حمراء يبقى من الأحسن إنك تشتري من عند العطار "ورق حناء" بدل الأكياس اللي بتكون جاهزة إلا لو كنتِ متأكدة تماماً إن مفيش أي اضافات عليها..

الكمية المطلوبة من الحناء هو نص كيلو وتضيفي عليه ملعقة سكر ناعمة وده علشان العجينة تبقى متماسكة ولينة في نفس الوقت وبعدين بقى تبدأ في إضافة عصير اللمون مع تقليب الخليط لغاية ما توصلي لقوام مناسب للعجينة وبس كده هي جاهزة للاستخدام...

الحناء السمراء (الدايج):

لو هتستخدمي الحناء السمراء فلازم تعرفي إنها بتكون يا إما على شكل بودرة في كيس يا إما بتكون قطع متماسكة.. وبيتم أخذ القليل من الماء الساخن بمعلقة صغيرة والتقليب لغاية ما يتم مزج الحناء مع المياه.

يلاّ بينا ننقش...

- لو هتستخدمي الدايج.. فهتحتاجي لفرشاة تلوين صغيرة أو أعواد القطن اللي بنستخدمها في تنظيف الودان.. لأن طريقة استخدام الدايج بتكون عامله زي طريقة استخدام ألوان المياه... بتاخدي بالفرشاة أو عود القطن شوية مياه ساخنة وبتدوبي بيها الحناء وتبدئي ترسمي (عارفة مش بتعرفي ترسمي اصبري شوية وهاقول لك على الحل)

- لو هتستخدمي الحناء الحمراء فدي حكاية... مطلوب من سيادتك إنك تعملي قلم ورق وده ببساطة عامل زي القرطاس الصغير بس الفرق إنه مصنوع من ورق الهدايا -اللي بيلمع ده- علشان يكون متين.. وطبعا بتخرمي طرف القرطاس ده بالإبره وتمليه بالحنا وتبدئي ترسمي بيه.

مابعرفش أرسم

عادي جداً ممكن تكوني مش بتعرفي ترسمي بس أكيد بتعرفي تنقلي الرسومات... لو لأ برضه يبقى إنتِ محتاجة شوية تمرينات علشان كده اطبعي الكام صورة دول واتمرني عليهم بإنك تمشي بفرشاة ألوان على الخطوط وشوية بشوية هتكسبي ثقة وهتقدري تعملي ده على إيدك أو رجلك.. ولو مش فاضية فممكن جداً إنك توكلي المهمة دي لحد تثقي في قدراته..

ودي مجموعة من نقوش الحناء

شوية حاجات:

بعض ما تخلصي رسم فمن الأفضل إنك ماتغسليش مكان الحناء بالصابون لمدة 12 ساعة.. ومن الأفضل إنك ماتحطيش أي نوع من أنواع الكريمات المرطبة مكان الحناء.

عند نقش الحناء لازم الإيدين تكون ثابتة على سطح مريح.

جلابية بارتي..

خلصنا من الحنة ندخل بقى على لبس الحناء وعادة بيكون لبس الحناء عبارة عن جلابية بلدي بس فيها تطريز وشغل يدوي...

زي المجموعة دي:

دي مجموعة اتفرجي عليها.. لو عندك وقت تفصلي زيها ماشي... لو مش عندك وقت يبقى تخلّي الموضوع في دماغك علشان وإنت بتشتري باقي الحاجات تفتكري تجيبي لبس ليلة الحناء...

إكسسوارات الحناء
الحناء بيكون ليها إكسسوارات معينة وعادة بيكون مبالغ في تصميمها علشان تلفت النظر..

زي المجموعة دي:

البخور

مهم قوي في ليلة الحناء مش علشان يبعد عنك عيون الحساد... علشان بيخلّي للبيت ريحة بتريح أعصابك رغم الضغط العصبي اللي بتكوني فيه بسبب الزحمة الشديدة حواليكِ وفيه أنواع من البخور اللي بتكون قوية وريحتها بتدوم فترة طويلة وكمان هتلاقيهم عند العطار زي:

- العود.
- الجاوني.
- السعد.
- الصندل.
- الكافور.

بس كده لبستِ أحلى لبس.. عملتِ أحلى حناء ولبستِ أحلى أكسسوار وبخرتِ البيت بأحسن أنواع البخور.. عايزة إيه أكتر من كده؟
ولا هو لازم ندفع دم قلبنا علشان نرتاح؟...

آه بمناسبة نرتاح خلّي بالك الحناء مدتها ماتكونش طويلة وتخلص بدري علشان تلحقي تاخدي كفايتك من النوم لأن هيكون قدامك يوم طويل قوي.. وربنا يتمم لك على خير..

__________________

التعديل الأخير تم بواسطة البتول ; 30-08-2005 الساعة 08:50 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه