قصة كفاح طالب جامعي من أجل الزواج!! - منتدى عالم الأسرة والمجتمع

27-03-2005, 10:35 PM

=الحبيب=

عضو جديد

تاريخ التسجيل: Mar 2005

المشاركات: 30

قصة كفاح طالب جامعي من أجل الزواج!!

السلام عليكم ورحمة الله وبركاته ...

اعزائي الكرام ..

أرجوا أنكم تتحملوني وتقرون القصة الى النهاية ....وخاصة الجامعيين أو العزابية..

وأنا ما وضعتها من فراغ ...بل اني اريد ان نتبادل الخبرات ليستفيد الجميع ..

والى القصة :

هاأنا أشعر بسعادة تغمرني بعد أن من الله علي وأصبحت لدي مخطوبة ...

ننتظر سوياً نتائج الفحص الطبي وكلنا في شوق ولهف الى بعضنا .

تمر الأيام بنا ...وكل يوم يزداد نبض الشوق إلى بعض

ولكن الذي يحدث من خلف الكواليس ..مختلفاً تماماً ...

خطيبتي ....لم تدري بما حدث من معارك قبل الوصول اليها ....نعم هي معارك ..وقاتلة أيضاً .
الحالة المادية ميسورى وجيدة ولله الحمد ولكن كانت هناك معارك كادت أن تطحن الجميع ...في عائلتنا لولا ستر الله! .والوصول إلى حل سلمي يقتضي تزويجي وأنا ما زلت بالمرحلة الجامعية !!

ماهي العقبات التي واجهتني امام الزواج :

1- الوالد : لديه قاعدة مثبته من 50 سنة " لا يتزوج ولا نفر من عيالي حتى يتوظف يستقل بمنزل خاص (يفضل ملك) !!!! لديه قدرة على تحمل تكاليف وأعباء الزواج من طقطق الى سلام عليكم .

2- الوالدة : ما اريكم الا ما يرى ابوكم !!! ومن خالفه فلا كلام له معي ...ولا عندي أي استعداد للمناقشة !! اسمع من ابوك ولا تناقشة !!

3- أخي الأكبر : لا تتزوج الا بعدي وانا ما اتزوج حتى أتخرج !!! حتى لو أنت سابقني بالدراسة ...فما يهمني !!
وحتى لو أنت موظف وتاجر ومليونير ...تنطق في البيت الين اتزوج ..ما يهمني !!!
وحتى لو ما اتزوج الا بعد 30 سنة فانتظرني وتزوج بعدي ب5 سنوات ...ولا تهمني !!!

4- اخوي المتزوج والساكن في بيتنا: أنت ما زلت طفل عمرك 21 سنة يعني اصبر الين تكبر !!!
وبعيدن يا طفل اذا تبغى تتزوج لا تسكن معنا في البيت لأنني أنا موجود >> ( يخاف اخرب عليه ويطلعه أبوي)
وراح تسبب زحمه في البيت شفلك بيت مستقل بعدما توظف يعني بعدما يتزوج اخوك الأكبر ...يعني لا تحلم في شي اسمه زوااااااااااااااااج !!!

أنا

: آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآخخخ

كنت عازم على الزواج رغم الظروف الصعبة ....ورغم معارضة الجميع لي ...حتى زملاي في الكلية ..كانوا يتمنون التخرج والتوظف لمدة سنتين حتى يتزوجون !!!

وانا ما زلت طالب بالسنة االثانية في الجامعة ....كانت عندي فكرة أن الإنسان من حقه ان يعيش حياته بطريقة مكتملة ....يعني انا غير مقتنع أن الإنسان يفقضي نصف عمره وهو ممسوخ عاطفياً !!
كنت أعد الأيا والليالي في انتظار الزوجة ...زوجة المستقبل !!

ماذا فعلت من أجل تحقيق الفكرة...فكرة الزواج رغم معارضة الجميع:

البدء في استراتيجيات تكتيكية من الداخل

أقصد أبدأ من رأس الحية مو من ذيلها ..

بدأت مع الوالدة ...صحيح هي عقبة ..وقاعدة " ابوك ما يقول شي غلط!!" ..تعتبر قاعدة مدمرة لإستراتيجيتي

لكن قلت ..نبدأ على مدى بعيد ...
1- قمت بتحديد موعد الزواج مع نفسي وحددت الهدف بالظبط ...يعني قلت بعد سنة من الآن ..
وفي الإجازة القادمة لا يتبقى لي في الجامعة الا سنة واحدة ...وهذا يعني أني مضمون التخرج بإذن الله ...وهاذي حجة دامغة للوالد اللي يخاف على دراستي ( الله يخليه لي)
يعني اني أبتزوج فيها بإذن الله ....وطبعاً تحديد الهدف وموعد الزواج لازم يكون هو مفتاح حل المشكلة ...كيف بدأت ؟؟

2- رحت للوالدة ...وتقهويت معها وبديت اسولف عليها سواليف تحبها مني ...على عكس اول مطنش الجميع ...و24 ساعى طالع مع ربعي واذا انا في البيت تلقاني صاد في غرفتي ..يعني ما فيه جلسة مع الأهل ...غيرت الطريقة هاذي وصرت أجلس مع الأهل ...وبصراحة الجلسة مع الأهل اكتشفت فيها لذة أحسن من الطلعة والروحة والجيه !!!

3- لمحت للوالدة عن اني ابغى اتزوج .....طبعاً هي رفضت رفض شديد ...وكأني قلت شي غلط يخالف العقيدة !!!!..فمسكت راسها وبدت ...تون وتقول ما هقيتها منك يا وليدي ...كذا مرة وحد ..ما تحترم راي ابوك ...وتبي تسابق اخوك ...تبي تورطنا مع بنت الناس ..خلاص رح عني تكفا !!!!
بعدها ضحكت وقلت : ما يحتاج اذا انتي ترفضين انا ما راح أوافق اصلاً( تكتيك

)

بس خذيها قاعدة ولدك بإذن الله بيفرحكم لو يتزوج ...
بديت أعطيها عرض عن زوجتي وش ممكن تتعامل مع أمي وكأنها بنتها ..وكيف انها تفرح فيها امي ...وكيف امور البيت بتزين مع وجود مثل البنت هاذي ....

طبعاً امي ما اقتنعت ....

قلت الى خطة( 1/ب/58 طوارئ)

غيرت لهجتي مع ماما ....وقلت : يا يمه أنا محتاج جلسة طويلة معك ....بس لا تفاتحين أي احد في الموضوع ...تراه خطير ومثير!!

مرت الأيام وأنا اكلم امي بطريقة جميلة ....يعني انسدح مثلاً ..وامثل اني اتكلم وكأني اتخيل زوجتي ..وكيف بيصير البيت ...وكيف بيصيرون عيالي !!

طبعاً ..ما اخفيكم امي رحمتني مرررة ..وأعتقد لو عندي بعير ...على تمثيلي هذا اكيد بيرحمني..فأنا جيت مستر ماما من خلال العاطفة ..

طبعاً من هنا دخلت عليها ...واخيراً وقعت واحد من الحصون في المعركة ..بعد موافقة ماما ..بل انها طار قلبها تبي تزوجني ..لأني ذكرتها بعيالي!! وياليتها تشوفهم !!
طبعاً هذا بعد مرور شهرين تقريباً ..

لكن الكارثة في راس الحية (بابا) ...استخدمت معه اسلوب التمثيل !!!

قلت الخطة الأخيرة عندي اسلوب العقل ....أقنعة بالأرقام !!...يعني أحسب كم بيربح من وراء زواجي ..مانفع!!

مرت 3 شهور وابوي ما اقتنع في فكرة الزواج ....طيب وش اسوي ؟؟

أخيراً قررت اتزوج من غير ابوي ولا امي ....كلمني واحد من اخوياي على اساس بيجيب اخته من فرنسا الى الرياض ...
يعني وده تعيش بين مسلمين ...وكان يريدني ابحث لها عن زوج !!
نطيت بحركة لا ارادية وقلت : طيب ما ينفع أنا !!
استحيت بعدها ونزلت راسي ...قال الرجال : أبشر والله بس بشاور البنت ...مرت الأيام ..وقالي البنت موافقة وهي فرنسية حافظة للقران
قلتله بس اصبر اشوف اوضاع الأهل ...طبعاً اهلي ..طبو في بطني صاروخ واحد ورى واحد وكلهم يلمزوني ...ويشتموني على فكرتي هاذي .

لكن ماذا حدث بعد ذلك البقية في الحلقة الثانية لأني طولت عليكم

__________________
إن أفضل قرار أتخذته في حياتي هو زواجي في سن مبكر.

التعديل الأخير تم بواسطة LittleLulu ; 27-03-2005 الساعة 11:25 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه