السلام عليكم و رحمة الله و بركاته

والدي اتمنى منك مساعدتي و توجيهي
مشكلتي صغيره تكمن في ثلاثة أمور ..

سأتحدث بداية عن وضعنا
أبلغ من العمر ٢١ سنه بيني و بين زوجي ١٢ سنه ..
بيننا تفاهم كبير بتنازل مني في امور ثانويه .. و لطف تعامله معي ..
عمر زواجنا ٤ سنوات .. لدي طفلان آتو من غير تخطيط و الحمدلله على نعمه ..
انا آتيت من بيت مختلف من ناحية الطبائع بالنسبة ل بيت آهل زوجي
كلنا متدينين و كلنا نفس الطبقه الماديه ..
مختلفين من ناحية نظرتنا للحياة .. من ناحية الشده و اللين .. من نواحي متعدده لا داعي للتطرق لها ..
مشكلتي بدأت من ٦ آشهر تقريبا
في بداية زواجي كان زوجي حريص جدا جدا على صلاته كان يصلي الفجر بالمسجد
كنا في بداية زواجنا مو مظغوطين من ناحيتي من أجل الاطفال و من ناحيته كان عمله سلس كطبيب الى ان انتقل الى قسم اخر بالمستشفي و تغير جدا ..
اصبح مظغوط جدا
مشكلتي الآولى :
زوجي منذ ٦ اشهر اصبح يؤخر الصلوات الي امر غير مقبول ابدا
يجمع ٣ صلوات ينام عن الصلوات لا يصلي الجمعه و لا يحضر خطبتها ..
مخه يلعب عليه علي اساس انه مستهلك من ناحية الدوام ..
يصير دائما على وضع توفير الطاقه .. آفهم هالشيء لآجل هذا لا اظغط عليه بالطلبات لاني اعرف طبيعة عمله و اعرف كمية الطاقه اللي عنده و المزاج اللي هو فيه ..
ما ناقشته و لا مره بالموضوع .. بس اذا قلت له استغفرلله ما صليت "على اساس اذكره يقول بحزن (الله يعفو عننا ).
الاسبوع الاخير ما ودي اقول هالشيء و لا ودي اصارح نفسي فيه ..
بس ما اتخيل انه وصل مرحله انه ما يصلي بس ما اشوفه .. ما ودي اظلمه ان شاء الله انه للحين يصلي .. هو ما تركها او آخرها استهانه ب عظمتها .. من باب ظغط الحياة عليه ..
خصيصا انتقلنا ل بيت جديد جبت طفل ثاني انا و انشغلت عنه كثير ..
امور ماليه اخري تزعجه و التزامات .. كيف ممكن اوصل ل زوجي هالنقطه من غيرر ما يتحسس مني و اوصل لافضل نتيجه انه يرجع مثل اول ..

مشكلتي الثانيه :

بدآت من ٦ آشهر او اقل ..
ايام ملكتي سألت زوجي قلت له : آنت تدخن ؟
قال ايه بس ترى قليل جدا و اذا تبيني اتركه تراني ما اعده الا كولا و لا بيبسي ..
و فعلا تزوجنا ما قد شفته يشربه او شميت ريحه فيه ..
حتى بعض اصدقاءه قطعهم عشان الدخان و هالاشياء .. تزوجني و تعاهدنا نبني بيتنا على كل شيء يرضي رب العالمين و كان فالبدايه مثال للزوج الصالح كان يشد علي عشان اصلح ..
ما توقعت يجي اليوم اللي بكون انا اللي اشد ؟ ماني عارفه كيف تكون الشخص اللي يرفع الاخر و ياخذه معه للجنه .. كلمته مرتين عشان الدخان ، مره رساله طويله بالواتساب و قراها و هو جالس معنا و قال لي ابشري و كان سعيد برسالتي ، و مره و انا اكلمه عن الصحه الانجابيه و قلت له الرجال اللي يدخن بعد فتده تتضرر اموره الجنسيه .. عشان كذا اترك الدخان ..
ما عطاني ردة فعل ب موقفي الثاني .. كيف ممكن زوجي يترك الدخان رغم انه جلس ٣ سنين من غيره ؟

مشكلتي الثالثه :
هذه المشكله بالذات توجعني كأنثى ..
يوم جبت طفلي الثاني صار ينزعج انها تصحيه كل شوي فالليل ..
ف قرر انه ينتقل للمجلس قال لي بنام لين آخلص آمر معين .. كان هذا الامر يتطلب منه تركيز و بال و كان يحتاج يمكن شهرين و ٣ اشهر و يخلصه .. ف يقول انا ما اقدر انجز فالعمل و انا نومي كذا ، قبلت على اساس اني ابي اكون العون له ب امور شيء لي و لاسرتي و لكن ما توقعت يضرني كذا ،، \خلص الامر المعين اللي كان شاغل باله
طول هالثلاث شهور صارو اطفالي ينامون معي بالسرير
رحت شريت لكل واحد سرير و نقلتهم ل غرفه اخري جنب غرفتي
و قلت زوجي تعال نام معي ما ابغى استوحش .. قام جاء و نام ..
قام الصباح ظهره يعوره و راح الدوام ظهره يآلمه ف هو حط ف باله ان السرير يآلم ظهره ف صار يقول لي ابشري بس نغير المرتبه برجع انام بالغرفه معك ..
و للاسف اني وافقت .. زوجي له فتره طويله ينام بالمجلس ..
يقول بعد الحج بغير المرتبه ، طبعا هو من يوم شرينا المرتبه يشكي منها
بس بعد ما تعود علي كنب المجلس ما تقبلها ..
المهم انا حزينه جدا صار بيننا بعد عاطفي
علي انه يحبني جدا و انا صرت متآقلمه مع عيوبه
بس كيف اخلي زوجي ينهي آمر المرتبه ؟
هو مو عادته يخلف وعده بس له فتره يصير تعبان و كسلان من الدوام ف يقول خليها بعدين ..

مو من ظغط مادي ما يبغي يشتري المرتبه
لما اكلمه يقول المرتبه هذه شريناها حول ٥٠٠٠ و شراها على عجل و هذه النتيجه
ف يقول ما يبغى يروح يشتريها الا بمزاج رايق جدا و مرتاح و هو وقته ضيق و طاقته محدوده ..



شاكره لك حسن قراءتك و تفهمك ..
احتاج نصحك .. و للمعلوميه زوجي مثقف جدا فاهم جدا و ما شاء الله ذكي و متمسك برأيه ف بصعوبه اقنعه ب آي آمر ..