اكتب لكم اسباب فشل وانهيار زواجي بعد 10 سنوات و 3 اطفال.. يمكن الاخوات الزوجات يستفيدون من اخطائي لتفاديها.. وانا صراحة كنت اعتبرها مميزات لكن لما راجعت نفسي عرفت انها اخطاء كبيييرة.. ولازم اعترف واراجع نفسي بدون مكابره..

1-كان يرفض يعطيني مصروف بحجة اني اذا احتجت شي اطلب منه.. وانا وافقت وبعدها صار بكل خلاف مايصرف ريال واحد لمدة اشهر.. بعدها صرنا حتى وقت الصفاء يرفض يصرف ريال.. ويقول زي ماعشتي ذيك الفترة كملي.. وفلوسه يرميها عاللي يسوى واللي مايسوى ويقول انهم اهم مني.. نصيحة لاتتنازلي عن حقك بالنفقة..
2- كان يسبني ويشتمني بأتفه الامور وانا اعمل نفسي راقيه ومؤدبة واسكت.. واذا ماصالحني اروح اصالحه بحجة اني عاقلة ومحافظة على بيتي.. وهذا غلط غلط غلط..
3- كنت اقدم له نفس الخدمات (بالطبخ والتنظيف والدلع) سواء كان مزعلني او لا.. وللاسف هذي نصيحة غبية من امهاتنا.. فصار مايفرق زعلت او رضيت..
4- لما فقت بعد سنوات وصرت اطلب الاحترام والنفقة صار يشوفني انانيه واقارن نفسي بغيري ويقول احمدي ربك متحملك.. نصيحة لا تكبتوا بداخلكم سنيييين وسنييين..
5- كان يمدح ويتغزل بالبنات قدامي وانا اسكت واظهر عدم الاهتمام حتى ماتصير بينا مشاكل وكنت احسب هذي ثقة بالنفس.. لقيته يتمادى ولا يعمل لي اي حساب..
6- اذا مد يده كنت ابكي واكتم بخاطري.. فهو يعتقد اني ما سكت الا لاني استحق الضرب والاهانه.. نصيحة الضرب بالذات خذي فيه موقف كبير ولا تعديه بالساهل..
7- كان يسافر ويروح رحلات ويقفل علي باب البيت وانا ارتب له الشنطة بنفس حلوه واقول اذا هو انبسط اكيد راح انبسط.. القاه راجع بنفس شينه ويقول كنت مبسوط ورجعت شفتك وراحت الوناسه.. نصيحة لا تعطي احد اكبر من حجمه..