السلام عليكم ورحمة الله وبركاته
اطرح لكم مشكلتي لأنه تعبانه ومحتارة.. متزوجة لي 10 سنوات تقريبا ومثل اي زوجين نمر بخلافات ومشاكل.. لكن زوجي بالسنة الأخير صار يضخم الامور ويفتعل الخلافات ويهجر بالاسابيع ويرفض الصلح.. احيانا ينام برا الغرفة اسابيع ويهملني ويتجاهلني ويعاملني بحقد ويحاسبني على الريال.. انا كنت اركض وراه بعدين تعبت ومليت وتركته براحته وصار يهجر بعدين يرجع من نفسه..
صار بينا خلاف تافه قبل 3 شهور.. طلب حاجة مني وانا اعتذرت.. اهاني وشتمني انا واهلي ورمى كل اغراضي عالتسريحة وكسرها.. تكسرت كل عطوري ومكياجي وطلع وتركني وانا خايفه وابكي.. رجع ثاني يوم صاد ومتجاهلني ومايكلمني وانا كنت متضايقه وجالسه بغرفتي.. مرت ايام واسابيع وهو معتبر البيت فندق وقت النوم وبس.. وانا لما شفته متجاهلني رحت السوق وشريت لي كم عطر ومكياج بدل اللي كسرهم.. حتى اقدر اعيش حياتي زي الناس.. وهو طول هذي المدة هاجر ومخاصم ومايرد السلام ولا يعطي مصروف ولا فسحني ولا مشاني.. مرت 3 شهور على هذا الحال.. يعني كل اجازة الصيف.. وانا خلال هالفترة جيته 5 مرات احاول اصالحه واتفاهم معه وهو رافض.. ويقول: جايه عشان مصلحتك.. عشان تقولي ابغى اتفسح وابغى اسافر بالعيد الخ الخ..

كنت اقول له لا والله حتى العطور اللي كسرتها فداك.. انا كل همي حياة سعيدة وكريمة ولا في شي يستاهل هذا التصعيد.. وهو كان يرفض ويمشي ويتركني ويعاند اكثر واكثر واكثر..
ظلمني وحرمني من كل حقوقي الزوجية من عاطفة من جنس من مشوار من فسحة من سلام او كلام او اي شي.. وبأي فرصة كان يرمي علي كلام زي السم.. وانا كنت صابره وساكته واحاول اتماسك حفاظا على بيتي واولادي.. واقول يمكن يراجع نفسه يمكن ويمكن..

مرت 3 شهور والحال على ماهو عليه من نكد وخصام ورفض للصلح او حتى التفاهم.. الى قبل امس كنت محتاجة شغله معينة وطلبت يسمح لي اروح اشتريها (من فلوسي انا).. قال لا.. سألته ليه؟.. قال بس مزاج لا وبس..
انا هنا انهرت وبكيت زي الطفلة.. بكيت بكيت بكيت وكان ممكن يغمي علي من القهر والبكاء والدموع.. حرام عليك حرام عليك خلاص خلاص انا تعبت ذليتني بما فيه الكفاية بدون سبب وقهرتني وانا ما اذيتك ولا ظلمتك.. بكيت واخذني عالغرفة بعيد عن الاولاد..
ولما خلصت بكاء وصياح وسكت.. قال لي: لأول مره احس في انثى بالبيت! شكلك وانتي تبكي حسسني بضعفك.. طول الفترة الماضية عامله نفسك قوية ومو هامك اي شي يصير..

بعدين قال خلاص نعوض الفترة اللي راحت.. لحد هنا ويكفي اللي جاك مني.. ويقول نفتح صفحةجديدة بشرط تنسي اللي صار.. وماعطاني مجال اتكلم وقال يلا قومي نطلع نتمشى.. قلت له اسفه تعبانه من البكاء.. كان جسمي يرجف ومسكني صداااع.. راح اخذ الاولاد يمشيهم وقال ارتاحي بالبيت وجاب اغراض البقالة ونوم الاولاد وبالليل قرب عشان العلاقة وقلت له اعذرني مصدعة ومرهقه.. نمت وانا مخنوووقه.. كسرني كسرني وذلني كثير وخلاني ابكي عند رجوله وانا اصلا ماعملت شي كبير ولا كنت استاهل هجر وحرمان واستفزاز 3 شهور.. تعبانه ومنهاره وحاسه اني محتقره نفسي ولا لي قيمه