السلام عليكم ورحمة الله وبركاته
عندي موضوع أحتاج رأيك فيه،
وشكرا مقدما لوقتك.

خطبني قبل شهر ونصف تقريبا شخص (خطبة غير رسمية،يعني ماجاء البيت مع أهله،مجرد كلام) وتواصل معي بعلم أهلي وحسيته شخص مناسب لي إلا بما يخص شهادته، فيه توافق بيننا و تفكيرنا متقارب نوعا ما ، وبيننا أمور مشتركة، وبالنسبة لشهادته فهو متوسط و أنا جامعية، لكنه انسان جدا طموح و عنده مشروعه الخاص، ومشروعه تقني، طور نفسه بنفسه إلين ما قدر يفتح مشروع خاص فيه وحاليا مشروعه في البداية وحاب يكون له اسم وسط السوق، أنا بصراحة ماكنت مقتنعة بعمله ومدري كيف يكون هذا عمله اللي يشتغل فيه، وماعنده شهادة !
حبيت يكون الشخص اللي برتبط فيه يكون عنده وظيفة مرموقة وشهادة جامعية، لكن بعد تفكير طويل لقيت إني قاعدة أطلب نمط معين من الرجال و مو شرط هذا النمط يكون هو الشخص اللي بكون سعيدة معاه،
المهم انا حاليا مقتنعة فيه بنسبة كبيرة لكن من خلال تواصلي معه كثير مايتواصل معي أو يتأخر بالرد وهوكذا من أول ماتواصل معي (وهو اللي طلب التواصل ) و السبب انه مشغول في عمله وماعنده وقت يتواصل معي دائما، فأنا أضايق وأوضح و هو يبرر لي إنه هذي الفترة حرجة ولازم يركز في عمله عشان يأسسه صح و يكون له اسم في السوق، وحتى موضوع خطبتنا أجله عشان مشغول في عمله، يبى يركز فيه، أقوله متى ؟! يقولي لمن يرسي قواعد عمله و يستقر فيه.
أهلي بعد مدة من تواصلي معه، قالوا لي اذا شايفك مناسبة خلاص يجي يتقدم كفاية تواصل، لاعاد تتواصلي معه خلاص.. وصلت له هذا الكلام وقالي والله اشوفك جدا مناسبة لي وبس ارتب مع العمل والاهل ونزوركم في أقرب وقت .. ومن وقتها قطع تواصلي معه أسبوعين(على أساس أنا اللي طلبت انه مانتواصل لمن يجي يخطب ) ، لما أرسلت له: أيش صار معك؟!
قالي كل خير و الموضوع ماشي .. ما أعطاني تفاصيل.
ولما قلت له مرة طولت، قالي (بما معنى كلامه) إنه أنا اللي طلبت إنه مانتواصل
لما يجي يخطب.
و طلبت منه يبلغني بمستجداته أول بأول ولايتركني وقت طويل بدون أي خبر أو مستجد، رد علي انه ممكن ماراح افهم مستجدات عمله وانه عنده مواعيد ومفاوضات مع اشخاص و جهات ..
أنا مو عارفة هل فعلا الواحد ممكن يكون مشغول في عمله لهذي الدرجة؟!
طيب ليش بدأ موضوع خطبة و هو كذا مشغول في عمله؟!
مدري حسيت عمله كل حياته، ماعنده شيء مهم في حياته مثل عمله والخطبة موضوع مايهمه لذلك مؤجله عشان عمله.
أنا بصراحة مرة متضايقة من انشغاله بعمله لهذه الدرجة وأشك انه ممكن يتحجج، كل شوية يعيد ويزيد علي انه مشغول في عمله ويبى يركز في عمله، مافهمت عليه، يمكن يبى ينسحب وقاعد يتحجج بعمله!!!
أنا صرت ما أوضح انزعاجي من انشغاله و أتركه براحته،
بصراحة هو بشكل عام تعامله كويس ومحترم لكن احسه انسان مرة جاد وعملي وكلامه ووقته محسوب.

رأيك ؟!
أعطيه مهلة شهر أو شهرين زيادة و لو ماحدد موعد للخطبة
أعتبر موضوعي معه منتهي ؟!
كيف ممكن أتصرف معه؟!
كيف أعرف هل هو صادق و جاد ولا قاعد يصرفني؟!
ولو خلال هذه الفترة تقدم لي شخص آخر ، أسحب عليه و أشوف الشخص الاخر ولا كيف أتصرف؟!
لأني للأسف وعدته وقلت له إني بإنتظاره، وقلت له ركز بشغلك و الله يوفقك ووووو وأبديت له إنه الموضوع عادي عندي، و هو أبدا مو عادي !
مدري ليش قلت شي انا ما أحس فيه، ولاعندي استعداد أنتظره.