السلام عليكم ياجماعة هذي اول مشاركة لي بالموقع واتمنى من كل من يقرأ ياخذ الموضوع بجدية ولا يقعد يطقطق لان الموضوع حساس جداً
انا شاب عمري 19 سنة تخرجت من السنة التحضيري بمعدل عالي والحمد لله خلال السنة التحضيرية كان فيه قروب للتقلرام لتبادل المنفعة سواء من اجوبة لاسئلة او مساعدات الخ..
انا بحكم اني احب اساعد الناس شرحت لاكثر من بنت وكنت اجواب بالقروب ويعلم الله كانت نيتي وقتها اني اشرح من باب المساعدة وبس .
المهم شرحت لاكثر من بنت لين جت ذيك البنت اللي سألت في القروب وساعدتها علا طول بالخاص وخلصنا ولا صار شي
بعدها ساعدتها مرة ثانية بمادة ثانية وطلعت ...
بعدها صرت اسولف معها برسمية اسألها من وين انتي وكذا والله العظيم ماكان لي نية اني احبها او شي من ذا القبيل لين جا نهاية الترم الاول وصارحتها بمشاعري اني احبها
طبعا ياجماعة جاني ذا الشي بدون سابق انذار تعلقت فيها بعدين استهديت قلت ياولد امسك نفسك لكن ماقدرت المهم وللمعلومية ترا فيه بنات كنت اشرح لهم بدون ماقول لهم شي بس سبحان الله مادري ليش مع هالبنت تعلقت ..
المهم صارحتها وبكت وبعد كم يوم جتني وصارحتني بمشاعرها وبدينا المشوار
طبعا ياجماعة وقتها كنت مقصر بصلواتي وبطاعتي لامي ولابوي والبنت ذي ماشاء الله عليها والله من يوم عرفتها صرت احافظ على صلاتي وابر بامي وابوي فضل الله ثم فضلها لان كانت تنصحني وهي ملتزمة ماشاء الله عليها تصلي قيام الليل دايم وتقعدني بعض الاحيان لصلاة الفجر الله يعطيها الف عافية
بعدين صارت مشاكل بيننا والحمد لله حلينها لين ماجت المصيبة العظمى لما امها درت
ايه ياجماعة امها درت وتحسب اني لعاب واطقطق عليها ومادري وش
ياجماعة البنت صار لها تقريبا اسبوع ماترسلي شي ابداً ولا ترد علي ولا شي انا ياجماعة يمين بالله احس مستقبلي ضاع حرفيا صار مالي نفس للدراسة ولا لاي شي يمين بالله كرهت حياتي خلاص وش اسوي بالله ساعدوني !!
البنت ماشاء الله دين واخلاق وحرام والله تروح علي
امها من النوع القديم واول مادرت عنا عصبت عليها وقالت لها لاعاد اشوفك تكلمينه ومادري وش المهم وهي كانت تكلمني وبعدها اتوقع امها عرفت واخذت الجوال وللحين مادري وش صاير فيها
تكفون ساعدوني كيف اصلح الموضوع ياجماعة تكفون💔