انا متزوجة من 4 سنوات عمري 29 وعمر زوجي 34 ، زوجي الله يشفيه مصاب بالسكر من طفولته ..
الحمد لله كنت مرتاحة بزواجي من كل النواحي ، وزوجي الحمز لله حنون وطيب ومكرمني وما قصر معي بشيء ويحترمني ويقدر اهلي ويحترمهم واهلي يحبونه بدرجة كبيرة، حتى والدة واخوات زوجي طيبات معي وفي تبادل زيارات كثيرة بين اهله واهلي بهعد زواجنا، وكأننا اهل.. اللي بوصله اني كنت مرتاحه جدا بحياتي الزوجية

المشكلة ان زوجي رجل ناجح في حياته. يعني ماشاء الله وسامة وغنى والكل يحترمه وله تقدير عند حتى الكبار بعايلته وصاحب واجب ويساعد المحتاج من عيال عمه واهله، والصراحة كنت اغار من حجم المدح اللي يجيه وخاصة من اللبنات، واسمع دايم مثلا " الكل يحسدك على زوجك" والا "ادعيلي يرزقن واح يدلعني مثل زوجك" ، وعرفت ان فيه اكثر من حرمه كانت تبيه لبنتها . مع اني ما اذكر شيء من حياتي وروحاتي مع زوجي. ولكم تتخيلون حجم الغيرة التي في صدري من كلامهم ..

سويت حركة دمرت حياتي، مرة كان وقت صلاة العصر وزواجي طالع يصلي ، كانت تكلمني بنت عمه، واتكلم معها عادي . الا جابت طاري زوجي وانه طيب وانه يا ليت زوجي مثل زوجك، غلطت وقلت "انه مافي احد كامل .. حتى زوجي فيه سكر وتعرفين تأثيره على العلاقة .وتعرفين كم قعدت بدون حمل" كنت الغيارة واصله معي بس بغيت اصرف عينها عن ذكر زوجي .. ماكنت ادري ان زوجي كان داخل البيت وسمع الكلام .. هو سمع وعطاني ظهره وطلع .. دقيت عليه يعطيني مشغول ..خفت عليه .. ارسلت له قلت " طمني عليك بس" خفت يجيه شيء .. قال"ايه صح انا مريض" قلت: "والله ماني قاصده" ثم قال "اجي بعد العشاء اتفاهم معك" .

جلست على اعصابي خايفه، اول مرة اشوفه كذا .. الا يجي عقب العشاء .. ويجلس ويقول تعالي "اجلسي ابي اسألك" جلست وقال " احلفي لي انا قصرت معك في شيء" قلت "لا والله" قال"انا مشبعك بالعلاقة" قلت "ايه والله" ماكنت اكذب، زوجي قال " بعد مشيأت الله .. انا السبب بتأخر الحمل" قلت " لا انا" والصراحة التأخر مني عندي مشكلة واتعالج منها ، قال " اجل ليه تكذبين وتقولين هالكلام ... ليه تنتقصين من رجولتي عندها" . بكيت وقلت له " والله ما اقصد انتقص منك .. بس غلطت وذبحتني الغيرة من كلامها عنك .. وغلطت " واترجاه يسامحني ، قال "الحين هالكذبة ما تترك حرمه ما راح تقولها لها " قلت له اني راح اكلمها واقولها كنت اكذب ، قال " ماراح تصدك ويتحس انك ماتبين احد يتكلم على زوجك بس" وبدى يقول "ماتوقها منك" او "ياحسافه على قدر الغلا الي فيني لك" واشوف معصب اول مرة بحياتي .. الا يقوم ويقعد بالمكتب ويصك الباب ، انا كنت ابكي بالصالة .. مرت ساعتين وخفت عليه ماطلع دقيت الباب الا يقولي من ورا الباب "لوسمحتي اتركينيمع نفسي شوي" .. بعد ساعة يمكن طلع وراح المطبخ .. انا لحقت عليه وقلت "انا طابخه عشاء" قال "ما اشتهي" وفتح الثلاجة واخذ تفاحين ورجع للمكتب ، بعده بفترة راح غرفة النوم وغير ملابسه وحط راسه ينام .. جيت اقرب منه واحضنه ، قال " لو سمحتي ابعدي" وانا في السرير جمبه كنت ابكي ،، واسمع يستفغفر وكأنه يبكي .. ما عمري وصلت مشاكلنا لهالدرجة .

بالصباح .. كنت مجهزة الفطور واحتريه يخص لبس ،، ويقعد عادي ، كل مابغيت افتح موضوعيرد بكلمه او مايرد ، ثم يوم خلص وهو يقوم قالي" فكرت بطريقة بتسكت كل اللي بتكلمون " قلت له "وشهي" قال "اخذ ثانيه" اول مرة يذكر التعدد عندي ، قلت "والله ما اقصد .." واترجه يسامحني .. طلع وتركني ابكي ..

كملنا اربع ايام وحنا ساكتين وما تكلم مع بعض ، كل مابغيت اتقرب واحضنه واعتذر يردني .. اطبخ يجي ياكل بس ، نظراته لي تذبحني، احس اني طحت من عينه ..

المفروض اروح عند اهله امس واهلي اليوم ، رفض قال ما ابي يحس احد بشيء

اسألكم كيف اخليه يسامحني ؟! احبه وادري انه هو بعد يحبني .. بس اخاف اذا استمرينا على هالحال ماراح نرجع مثل قبل.. فياليت تساعدوني.