السلام عليكم ورحمة الله وبركاته
تحيه طيبه لجميع اعضاء المنتدى
ترددت كثير بالكتابه ولكن قمت بذلك بعدما وجدت الكثير من الاجوبه التي تدور في رأسي لديكم ومن ردود الاعضاء التي تدخل القلب والمنطقيه ..

سأتكلم بالعاميه لكي يسهل علي سرد المشكله

* مشكلتي شخصية زوجي
* علاقتنا


‏حلمي مثل اي فتاه
اتزوج شخص واتشارك معاه الحياه
شخص له هيبته
شخص ابني معاه عائله ونربي عيالنا باسس ونخليهم اشخاص مميزين

*** تزوجت رجل بعمري 27 طبعا زواج تقليدي وما عندي مشكله بهالشي .. وقالوا لي انه بنسكن مع اهله في البيت وما اعترضت قلت احنا باول طريقنا وعادي هالشي الى ان نبني حياتنا ..

دخلت الشوفه الشرعيه وارتحت للرجال وملكنا بعد شهرين

خلال فترة الملكه كنت اتخيل اني نفس خواتي يسسون
مكالمات اخر الليل وطلعات وسهر لاخر الليل ازواج خواتي كانوا بالوكيند يطلعون من بيتنا اذان الفجر وهالشي عادي عندنا

لكن انا وضعي ما ادري ليه كان غير
خلال 3 شهور فترة ملكتنا ما طلعنا مع بعض الا مرتين او ثلاثه وكلهم انا كنت اقوله شرايك نطلع
جاني في البيت مرتين او ثلاث وكلهم انا اقوله تعال ولو طلعنا نتكلم شوي ونجلس ساكتين ! انا بطبعي خجوله مع اي شخص اجل معه اول مره فيكف لما اكون مع رجال ؟

مراسلاتنا كلها واتس اب !! ونكون عصفورين حب كل واحد يقول للثاني كلام حب .. لكن اذا تقابلنا نكون ساكتين

كرهت الواتس اب كره لانه خرب اكثر لحظات بينا ما كان يدق ابد بسببه

واول مكالمه بيننا انا دقيت الصباح شوي ونقفل وبس
يعني مكالمه ما تستمر 5 دقايق
يا ما حذفت الواتس اب واقوله خربان من عندي
وعادي يجلس يوم يومين ولا يدق ولا شي
وارجع الواتس اب ويرجع يكلمني فيه
واهلي كلهم يسالون وش فيكم ما تطلعون ؟
ليه ما يجيك ؟

المهم قلت يا بنت الحلال كل شي يتغير بعد الزواج.. تزوجنا وسافرنا شهر العسل وكانت ليالي حلوه

رجعنا
اهله ما يضايقوني ابد بالعكس معتبريني وحده من بناتهم
لكن المشكله اكتشفت انه زوجي اتكاااااااااالي ومخه فاضي بشكل ومو مستوعب انه احنا تزوجنا
يعني
لو خرب شي بالجناح حقنا ما يعرف يتصرف يا يرسل السواق يجيب الغرض او يسال ابوه او امه
ما يبي يسوي شي كله يقول انتي سوي انتي دقي انتي احجزي انتي انتي انتي
ما يعرف يحجز طيران ؟
ما يعرف يحجز فندق ؟
صرت اتندم اننا عشنا مع اهله ما يعتمد على نفسه ابد

انا شخصيتي واقعيه بشكل كبير
تفكيري اكبر من عمري
انسانه يعتمد علي بشهادة الكل


شخصية زوجي
اكتشفت انه زوجي مزوح بشكل !!!! يضاااااااااايق 24 ساعه يمزح ما عنده جد الا اذا كان معصب لو توه صاحي من النوم
حتى لما نكون بالسياره ونسولف طول الوقت يا يتطنز بالكلام او يمزح او يغني طيب وبعدين ؟
حتى لما يقول لي كلام حلو يقول لي باسلوب مزوح ما احس له معنى ولا اتقبله
يعلق علي باسلوب جارح .. ويذب ذبات ما تنقال الا للصديق او لاحد غريب
.. يعني لو طحت بالغلط قال احسن !
يعني لو طقت يدي بالطاوله قال من التنح اللي فيك !
لدرجة مره انفجرت بوجهه قلت بسسسسسسس تراني زوجتك مو واحد من ربعك
بدال لا تقول لي بسم الله عليك .. ما تشوفين شر احترمني ..
قال امزح ترى لا تدققين .. قلت هالمزح مابيه
ابيك تقلل هالمزح ... وما صار يذب
لكن مزحه لازال يضايق .. ادري هاذي شخصيته لكن احيانا يحرجني حتى بالاماكن العامه
لدرجة اني اخزه بعيوني علشان شوي يسكت
تعبت والله تعبت
تدرون اني انحرج منه !
انحرج من شخصيته اذا طلعنا مع اهلي وقدام الناس ومع اهله
صرت انا امشي امورنا ليه !!! ليه ليه الزواج مشاركه مو اتكال على طرف واحد
انا وصلت لمرحله بنفجر فيها

افكر بعيالنا شلون بيكون قدوه لهم ؟
كيف بتصير شخصيتهم اذا شافوا ابوهم كذا


والمشكله الثانيه يقول لاهله كل شي حتى اتفه الاشياء بيننا يسولف فيها لدرجة تخليني انهبل
استوعب يا زوجي ترى هالسوالف ما تنقال لانها بيننا
يعني لو تناقشنا بنشتري شي فكرنا بس!
سولف لهم
يعني لو بنسافر بالصيف بس نفكر قال لهم !!
لو طلعنا اماكن وشرينا اشياء قال لهم بالتفصيل وبالاسعار وكل شي
يعني اذا ركبتي تالمني ورحت المستشفى يقول لهم ! طيب ليه هذا الشي خاص شنو خليت يبقى بيننا؟

بسبب هالشي فقدت وحده من احلامي بالزوج .. اني احذ راسي على صدره واشتكي له واسولف معاه عن اللي بخاطري كاني اسولف مع نفسي
صرت كتومه ما اسولف ولا اعطيه خبر عن شي .. ولو قلت شي قلت له لا تقول لاهلك ويعصب ولازم ابرر له ..
ادري قلبه طيب ويقول هالشي بحسن نيه .. لكن مو حلو



الشي الثاني راتبه 10 الاف بوظيفه حكوميه
الراتب يخلص بسرعه ما يكفي ليه ؟ ما ادري لدرجة انه مطلع له ماستر كارد علشان يصرف منها
يتدين مني احيانا مع اني مو موظفه ومصروفي منه
يتدين من اخوانه ولا من ربعه
انقهر وتنفقع كبدي
افكر احنا ماعندنا مصاريف اساسيه لا اجار ولا مويه ولا كهربا واحنا الان شخصين كيف اذا جو لنا عيال ؟؟؟
اقعد افكر وافكر واقول له شبتسوي لازم تفكر بالمستقبل لازم تفكر تجمع وتستفيد من عيشتنا ببيت اهلك ترى ورانا عيال وترى مصروف العيال مو سهل.. فكر بمشروع فكر بشي يقول يوه كافي دوامي الصباح مابي شي يتعبني الليل .. يقول يصير خير لوقتها ربك يحلها
آاه
هل تفكيري غلط ؟
هل انا ابالغ ؟
هل المشكله مني ؟
صرت احس مخي بينفجر من التفكير تعبت
***علاقتنا
تدرون وضعنا غريب
خلف الشاشه عصفورين حب وكلام غزل وتعبير عن المشاعر واشتياق وكل شي
لكن اذا تقابلنا شخصين مختلفين كاننا اصدقاء
يعني ما اسمع منه كلام حلو ابد لدرجه اني استغرب
بنكمل سنة الى الان من تزوجنا
اقسم بالله العظيم انا ما قالي كلام حب وغزل ابدا
ليه ؟ مو عارفه
يحز بخاطري هالشي ! بشكل كبير ومأثر على نفسيتي
ادري انه طبيعة الرجل الشرقي ما يعرف يعبر عن مشاعره وافعاله هي اللي تدل

وماني من النوع اللي يتاثر بالمسلسلات او الافلام لاني واعيه وعارفه انه الحياه مو نص مكتوب ولا شي ومالي اهتمام يالمسلسلات
تدرون ما اسمع منه مدح وكلام حلو الا لما اكون زعلانه او كنت ابكي عنده
اسمع مدح ! يبرد الخاطر
واذا كنت زعلانه وهو مايدري وش فيني
اشوف كمية حب واهتمام ورومانسيه ما ودي ارضى علشان ما تنقطع


احيانا البس واتزين له ولا القى ردة فعل !
صرت اقول له شرايك بلبسي ويتكلم ويمدح
اقول له اذا عاجبك ليه ما تتكلم من نفسك؟ لازم تتعود اذا شفت شي تعلق عليه
لان هالشي له اثره على النفس
من جهتي انا دايما امدح واحيانا انفخ فيه وينبسط
امدحه اذا سوا شي بالبيت ما توقعت منه


تدرون اذا رحنا مشاوير نادر ما نتكلم واحيانا يكون المشوار ساعه ساعتين وكلمه وكلمتين بس
اذا جلسنا ناكل على سفره وحده ساكتين
مع اني احب اسولف واحاول اخترع سوالف اساله عن يومه وش سوا واسولف له وش سويت بيومي وبعدين نرجع نسكت

ولا يلمسني ابد ابد ولا يقرب مني الا لما يبغاني للسرير
وحتى وقت العلاقه ما نتكلم ابد ساكتين
احاول قد ما اقدر اني اتقرب منه ادلعه اعوده على اشياء لكن احيانا تضبط واحيانا ازهق اني انا كله اسوي له وهو ما يسوي شي لي
واحيانا يصدني

افكر احيانا اني سلعه بس علشان يفضي حاجته بالجنس مالي قيمه ابد ..

احيانا اعذره لان اكتشفت مع الوقت زوجي شهوته زايده فأي لمسه او اي حركه مني او حتى اي لبس .. ممكن تثيره
طيب انا وش ذنبي ما يلمسني ابد يعني وش اسوي طيب اذا كنت ابي زوجي يضمني .. زوج احط راسي على صدره

مو عارفه ياربي

يحب النوم بشكل !
اول ما تزوجت انتهى عقد شركتي وجلست في البيت وانا اكره جلست البيت
المهم يرجع من الدوام الساعه 4 يتغدى وينام ويصحى الساعه 7 او 8 يا نقضي شغله برا البيت ونرجع على 10 او 12 ينام له حق
واذا ما طلعنا ممكن ينام الساعه 10 يعني كم ساعه جلسنا ساعه مع بعض 3 ساعات ! معقوله يا نشرب قهوه يا نتعشى ويقول دايخ بنام !!!!!
متخيلين جالسه 12 ساعه لحالي صح اقضي وقتي باني اقرا او امارس هواياتي او اجرب وصفات حلويات او خبز او اجلس على النت لكن مو معقوله !
كلمته كم مره بكيت بوجهه قلت استح على دمك الوضع لا يطاق
قلت له اللي بيريح بعد الدوام ساعه ساعتين ويصحى بمنبه مو ينام ومتى ما صحى كان بها
استوعب انك متزوج! .. قال طيب وتعدل يوم
وبعدها قال يا عمي روحي هناك بعيد انا كل شي ولا النوم محد يكلمني فيه ولا له علاقه بنومي ولا يتدخل فيه
ما تتخيلوا كمية القهر والتعب وضيقة الصدر اللي تجيني
احيانا اذا رحت لبيت اهلي مابي ارجع له

لا تقولون اجلسي مع اهله .. مااقدر لوجود اخوانه الاثنين الكبار وصعب اجلس معاهم بناقبي وعبايتي
وثانيا روتين اهله مختلف مع روتيني لو جلسنا معاهم يكون بعد العشا وساعه ونقوم

احيانا اقول طنشي وعيشي حياتك
واحيانا اقول حرام !!!!! ما كأننا صار لنا سنه من تزوجنا كاننا من سنين وش خلينا لبعدين

نبهته كلمته وصارحته في كل مره اتضايق منه واصارحه يقول لي ليه انا فيني عيوب وانتي مو قادر القى عليك شي واحد لهالدرجة انا سيئ
تعبت ولا فيه نتيجه
صرت افكر الف مره قبل لا اناقشه علشان ما اصير بنظره اني انتقاديه اني نكديه اني ادقق

قولوا لي يا عالم هل انا ابالغ ؟
ادري ما فيه احد كامل بهالدنيا لكن ادري انه وضعي له حل لكن مو عارفه شلون..
ما اقدر اشتكي لاهلي علشان ما يفكرون فيني .. ولا اقدر اشكتي لصديقه علشان ما تحس اني مو مبسوطه وتطالعني بنظره
ادري انه اول سنة زواج صعبه لكن هل وضعي طبيعي؟؟
علشان كذا لجأت لكم
صرت اتندم اني وافقت اتزوجه
افكر الف مره بالانفصال علشان ارتاح
اعض اصابع الندم يوم وافقت عليه
لكن ارجع افكر اقول يا بنت شوفي ميزاته يحبك ... يسوي اي شي انا ابيه
اهله كويسين معاي ... قلبه طيب .. محترم مع اهلي ويحبهم وماقد ضرنا بشي
نمارس حياتنا بشكل طبيعي عندي صديقات وما قد منعني عنهم
وعنده وربعه يشوفهم باوقات ثانيه

بس ماني قادره اتقبل شخصيته الوضع لا يطاق
ساعدوني وريحوني

اسفه على موضوعي الطويل