وعليكم السلام ورحمة الله وبركاته ..

عاد تصدقي أنا عشت في هالمجتمع 3 شهور وشويا بس لكن كانت تجربه يَ لطيف ما ابالغ لو قُلت انو كان اكثر مجتمع دخلتو وكرهتو ..

كان اكبر غلط عملتو اني اخترت المدرسه اللي كُنت طالبه فيها لأنو الصوره النموذجيه المشرقه الحلوه اللي كانت عن ابلاتي انهدت وصارت سودا للأسف ..

أول يوم داومت فيه اتبرعت وحدا من الموجودات انها تعلمني على نظام شُغلهم .

خرجت من هنا جات زميلتها من هنا . انتبهوا منها ترى ترمي شُغلها على غيرها . تراها مهمله الخ الخ .

قومت قُلتلها طيب عيب تتكلمي عليها في قفاها وهيا زميلتك واحنا نعتبر ضيوف .

ومن يومها كسبت عداوتها هيا واللي مشتركات معاها في المكتب _ صحباتها _

يعني جد ايش هالأخلاق !!!

طبعا انا وصحباتي كنا _ متدربات _ ومانشاركهم لا في اكل ولا في قهوه ولا غيرو لأننا مانجي الا يومين بس في الأسبوع .. وهما أصلا ماقالولنا انو نظامهم مشاركه .

فمرا طلبت من صحباتي قهوه .. ادتها وحدا من الخالات ..

مرت أسابيع وطلبت صحبتي قهوه مرا تانيه .. جات الخاله قالت ترى الأبلات يقولوا لا تديهم قهوه اللي ماتدفع ماتشرب .. حسد حتى على الفنجان اعوذ بالله


حتى مرا افتكر طلبولهم فطور من مطعم وخبوه عننا ورى بابهم ههههههه استغفر الله ياربي ..

..

وفي نُقطه مدري هيا بس عندهم ولا عند أغلب المدارس .

المرشده الطلابيه عندهم وحدا من الأبلات .

والله لا يوريكِ لمن تحكيها وحدا من الطالبات مشكلتها . كُل طاقم التدريس يعرف عنها ..

طيب المفروض دا سر .. غير انو مافي أي نوع من أنواع الاحتواء للطالبه . بس سماع مشكله واللك فيها عند البقيه ..

..
وكان في حكاية التعليق ع المظهر ..

طيب مثلا انا شخصيتي غير شخصيتك .

انا حتى نقابي ما اطلع فيه الا اذا كان مكوي ومرتب فكيف ما اهتم بباقي مظهري ؟

ليه الانتقاد في هالجزئيه والإتهام بالسطحيه وكلمة _ مايهمك الا شكلك _ رغم انو مافي أي تقصير من جهتي في العمل ؟

بالمختصر . اتمنيت اني بقيت في نظري كطالبه جهة المعلمه بدال نظرة الموظفه للموظفه ..

تسلمي على موضوعك القميل