يسعدلي مساكن وكل اوقاتكن يا احلى عسولات ⚘⚘⚘

اليوم جايبتلكن كذا طريقة لعمل الودجز
وما عندي صور كتير ما كنت مفكرة نزلها بموضوع
بس في كم صورة كنت عم صورهن وابعتهن عالجروب

وعملتلها صوص كتير طيبة



طريقة الصوص
تلات ملاعق طعام مايونيز
ملعقة خردل صغيرة او وسط او كبيرة حسب الذوق
ملعقة طعام كاتشاب
ملعقتين طعام عسل
ملح رشة
ملعقة وسط بابريكا
وبنخلطهن سوا ليصير عنا صوص متجانس

بالنسبة للبطاطا اول طريقة بالفرن



اول شي بنسلق البطاطا المقطعة أصابع مع ملح وخل وبنحطها وقت تغلي الماي ومن بعد ما تغلي البطاطا بالماي دقيقتين بالزبط بنصفيها وبنحطها بماي مثلجة
وبنرجع بنصفيها ونتركها تنشف او بنشفها
وبنحطها على ورق الفرن مع ملح وعقدة صفرا اي كركم وبابريكا وكاري وفلف اسود وتوم وبصل بودرة ورشة كزبرة بودرة وزنجبيل وزيت وفينا نضيف زعتر وأوريغانو وإكليل الجبل وريحان
وبندخلها الفرن لتشقر




وفينا البطاطا بس نسلقها دقيقتين ونبردها وننشفها نتلجها لوقت الاستعمال اذا الكمية كبيرة



الطريقة الثانية



بنقطع البطاطا الى قطع على شكل أصابع
بنقلي البطاطا نص قلية
وبنحط بوعاء كوب طحين مع كوب ماي وملح وبابريكا وثوم وفلفل وباكينج باودر وفلفل اسود وبنخلطهن



وبنصير نغمس البطاطا بالخليط ونقليها وبتطلع مقرمشة من الخارج وهشة من الداخل وبتشهي يمي يمي



وبالنسبة لثالث طريقة




فينا نخلط البطاطا من بعد ما نقطعها أصابع بالبهارات اللي بنحبها من بابريكا وكاري وزنجبيل وكركم وملح وتوم وبصل بودرة وفينا نزيد عليها اعشاب متل ما بنحب من زعتر وأوريغانو وإكليل الجبل وريحان وبعدين بنحطها بكيس نايلون فيه طحين وبنخلطهن وبنصفي الطحين منها وبنقليها نص قلية
متل هيدي الصورة




وبعدين بنتركها لوقت التقديم بنقليها مرة تانية وبنسمع قرمشتها
متل هالصورة ممممم كتير طيبة 😊😊😊😊




وكمان بس نقليها نص قلية فينا نتلجها لوقت الحاجة اذا عملنا منها كميات كبيرة وبنقسمهن على وجبات

ملاحظة لازم نعرف نعدل الملح بحيث يكون شوي ظاهر بالبطاطا ليعطي نكهة مع البهارات والاعشاب

وان شاءالله يكون الشرح واضح



احترامي⚘⚘⚘⚘⚘⚘⚘⚘⚘

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه