السلام عليكم ورحمة الله وبركاته

لي زميل اعزه كثير واليوم صار شي ضيق صدري وماعرفت انصحه او اهديه
السالفه هو عنده عيال واكبر عياله عمره تقريبا 20سنه ومطلق ام عياله
وجلس في بدون زواج عشان مايبي يجيب لهم زوجة اب ورباهم
المهم اكبر عياله لما كبر صار اختلاطه بخواله وبعيال خواله
وخواله مافيهم خير وصاروا يحرضونه على ابوه ويقولون له انت رجال ولاتخلي ابوك يتحكم فيك ومن هالكلام وطبعا الولد طايش وسمع كلامهم وفعلا صار يعصي ابوه ويخالفه باي شي يقوله وجاه فجأه وقال ابي اروح عند امي واسكن عندها الاب رفض يقول ماابي عيالي يتفرقون المهم الولد عند وفعلا راح وسكن عند امه ويقول لما شفت ان مافيه فايده قلت له خلاص بس عدي علينا وشوف خواتك وش يحتاجون بغيابي لان دوامه مثل دوامي شفتات وساعات كثيره يكون خارج البيت وخواته ماعندهم احد
يقول صار بالشهور مانشوفه اتصل عليه ويطنش مايجي ولا نشوفه ابد
حتى لما مرضت وطحت في البيت مالقيت من يوديني للمستشفى الا ان احد اولادي الصغار استنجد بجارنا وماقصر الرجال شالني للمستشفى وحتى وانا في المستشفى ماجاني ولا شفته وحتى ان الولد ترك الجامعه وانا مدري وتوظف حارس امن وانا مدري وكل شوره واستشاراته تتم مع خواله وامه وانا صفر على الشمال
المهم الاب يقول سبحان الله اول احب ولد عندي هو وكنت ارحمه بشكل غريب اكثر من باقي عيالي
المهم ارسل لولد وقاله انا ربيتك وتعبت عليك حتى الزواج حرمت نفسي منه عشانك انت واخوانك الرجال ينبسطون براحاتهم وانا كنت استغل راحاتي بغسيل ملابسكم وتنظيف البيت والطبخ وغسيل الصحون ويروح كل تعبي لما اشوفكم مبسوطين ومرتاحين
كنت اتسلف عشان اسجلكم بمدارس خاصه لاني اخاف عليكم
المهم الرساله طويله
واخر الرساله كاتب اما الحين انا اعلن قدام الله وخلقه اني برىء منك الى يوم الدين
ولا انت ولدي ولا انا ابوك وقلبي وربي غضبانين عليك الى يوم الدين
وانا وصيت اخوانك اني ماراح اسامحهم لو سمحوا لك تمشي بجنازتي

رايك وش انصحه فيه
انا تاثرت بصراحه لما قريت الرساله