السلام عليكم ورحمة الله وبركاته
تحية طيبة للجميع ...

قعدت فتره طويلة أتابع المنتدى وخصوصا المشاكل المحلولة وفي كل مره أقرأ إن زوجين تصالحوا ورجعوا لبعض تدمع عيوني والله من الفرحة , ردود الأعضاء في هذا المنتدى تشجع إن الواحد يطرح مشكلته هنا لعل وعسى ترجع الأمور.
بادخل لكم في الموضوع أنا عمري 33 سنه وزوجتي أصغر مني بخمس سنوات متزوج تقريبا من 8 سنوات وعندي بنتين طبعا زوجتي هي بنت خالتي , في بداية زواجنا طلبت مني زوجتي أن تكمل دراستها وقلت لها ابشري وقعدت تقريبا 3 سنوات ونص وأنا ساكن مع اهلي بنفس العمارة وهي عند أهلها تكمل طبعا المسافة بين اهلي واهلها تقريبا 80 كيلو طبعا قلت لها عشان ماتتعبين خليكي عند اهلك وتعالي في الاجازة وفي بعض الأيام إذا طفشت أطلع لها واقعد معاها المهم خلصت الدراسة ورجعت حياتنا طبيعية و بعد الدراسة حجينا ولله الحمد أنا وهي .
المشكلة اللي طلعت لنا إنها ماتهتم بي وبالبيت والأطفال كثير وتحب تتفرج على الأفلام كثير يعني عادي ادخل وانا جاي من العمل وألاقي البيت وصخ والنحاس مكوم وبعض الأحيان أجي من العمل وألاقيها فوق عند اهلي وكل شويه تقول أبغى أبات عند أهلي كم يوم وفي غيرها الاشياء الكثير وأنا طبعا كنت في أغلب الأوقات قاسي معاها كنت أسبها وأسب أهلها وكنت أحقرها واسمعها كلام جارح احيانا ويعلم الله أنه مو من قلبي وإن أهلي يقولون إني طيب وحنون بس لساني متبري مني , طبعا أنا بعد ماأحس إني زودتها معاها أروح أعتذر لها أو أجيبلها وردة وطبعا هي ماكانت تزعل كثير لأنها كانت تموت فيني.طبعا العلاقات الزوجية لاتخلو من المشاكل وأنا كنت أحاول قد ماأقدر إني ماأزعلها بس كانت تحس بالقهر مني وتكبت في نفسها.
طبعا أمها اللي هي خالتي دايما كانت تتصل على بنتها تقريبا كل يوم وزوجتي تعطيها النشرة وهذا سبب رئيسي للمشاكل اللي أنا فيها , واكتشفت إن كل اللي تقوله لي زوجتي من زيارتها لأهلها أو روحتها للإستراحة أو السوق أو زيارة أقاربهم كله يتم عن طريق تخطيط أمها
وفي مره كنت زعلان من زوجتي وقالت لي بأروح بيت اهلي عندنا عزومة ورفضت قاموا زعلوا اهلها , طبعا حياتنا ماكانت ابدا سيئة كنا نطلع كل اسبوع نتمشى وماكنت مقصر معاها في طلباتها وكانت حياتنا ماشية .
اللي زاد المشاكل في الفتره الأخيرة هو مطالبتها انها تتوظف وطبعا اللي دخل الوظيفة براسها أمها طبعا ودخلت معاها على الخط أختها وبعدها حياتنا اختلفت كنت في بداية الموضوع متردد لأني الحمد لله وظيفتي ممتازة والراتب يكفينا ولكن قلت لها ممكن تتوظفين في مدرسة خاصة قريبة من البيت دورت لها مدرسة وماكان لها نصيب بعدها قعدت فتره وحياتنا حلوة وبعدها كملت دراسة البكالريوس وكانت هذي أصعب مرحلة في حياتي لأني كنت مداوم شفتات وبعض الأحيان اروح من العمل للكلية واحيان اروح من الكلية للعمل كنت مضغوط لدرجة لايعلمها إلا الله طبعا قبل لا أبدأ دراستي بكم شهر توفى والدي رحمه الله وهو مازاد جروحي مع الدراسة , كل اللي قاعد اسويه من تعب والله والله والله لأجل زوجتي وبناتي , طبها في هذي الفتره كانت زوجتي تروح لأهلها كم يوم واذا رجعت لازم نتزاعل عشان الوظيفة وتقول لو إني موظفة بتحترمني وإنت الان قاعد تدرس وتشوف حياتك وأنا طيب أيش أسوي (طبعا كلامها كان غريب جدا وفهمتها إني أنا وهي واحد وأنا اللي ملزوم اصرف عليها وعلى بناتي وانها معززة مكرمة بالبيت) البنت صار كلامها غريب.
المهم كنت في الترم الأخير من الكلية وقبل الأختبارات النهائية بشهر ونص قالت لي باروح عند اهلي وقلت لها طيب روحي وانتبهي لبناتك وبعدها بكم ساعة ارسلت لي رسالة بالجوال فتحت الرسالة وكنت اظن انها بتطمني بوصولها ولكن تفاجأت أنها تقول أنا تركت البيت وغيرت رقمها والله يوفقك بحياتك أذكر وقتها كنت قاعد على موقع بوكينق كنت بأحجز لنا سفرية بعد التخرج زي ماوعدتها وكانت الرسالة صدمة لي حسيت بقشعريرة بجسمي وحسيت بتنميل في اطرافي وقعدت أسأل نفسي ليش راحت مع العلم إنها لمن راحت كانت حياتنا طبيعية وأكثر من طبيعية كنا مقضين مقاضي للبيت وكنا نتناقش بأمور بناتنا وأنا والله أكتب لكم والله منصدم للان منها .
مر على هذا الكلام تقريبا 6 شهور وهي للان رافضة تقابلني أو تكلمني تركتها 3 اسابيع ورحت أنا وأمي للتفاهم لأنها اختها تفاجأنا بردهم كانوا زعلانين ومتضايقين وتقول خالتي ماراح يتوافقوا ابد , سبحان الله والله ان هذي الدنيا غريبة تفاهمت معاهم امي بس كانوا مقهورين وزعلانين وقبل لانروح قالوا لي جيب نسخة من بطاقة العايلة قلتلهم ليش قالوا عشان سجلنا لبنتك عندنا بالروضة ,بهذا الوقت كنت اتوضا باستعد للصلاة وقتها قلبي كان بيوقف من جرأتهم وقلت كيف تنقلونها وانا ولي امرها المهم مسكت اعصابي ومشيت عشان لا ازيد المشكلة طبعا اهل الخير حاولوا كثير بس للاسف البنت رافضة وأزيدكم من الشعر بيت عرفت إن زوجتي بعدين أنها توظفت بس وظيفة بسيطه وهذا الشي زاد من قهري كيف بالله اهلها وهم عارفين ان بنتهم بمشكلة مع زوجها تروحون توظفونها طبعا فوق كل هذه الاشياء إلا اني ماسك اعصابي للحين كله على أمل ترجع حياتنا.
طبعا تواصلت مع ابوها وقال مااقدر اجبرها قلت لاتجبرها على الرجعة ابغاك تجبرها اننا نتقابل واتفاهم معاها ولكنه حاول معاها ولا فاد وقالي إن شاء الله يصير كل خير. وأنا عن نفسي مااصبر على بناتي دايما وهم بحضني واحس قلبي متقطع عليهم وبعد كل فتره اخذهم عندي فتره بس بنتي الكبيرة كل ماأرجعها لأمها تصيح وتبكي وتقول ماابغى اروح لماما لأنه بكل بساطة امها مشغولة بالوظيفة وتسيبهم عند جدتهم إلين ترجع ويمكن تنام وماتشوفهم إلا الليل وكمان شافت ابوها يحن عليها اكثر من امها.
طبعا أنا معروف بحبي لبناتي واني مااقدر اصبر عنهم فسجلت لبنتي الكبيرة يالمدرسة اللي جمب بيتنا طبعا لاتفكروة وسيلة ضغط على امها لا والله لكن انا أبغى بنتي وماابغى أي شي يحرمني منها كفايه وانها كبرت وهي بعيدة عني,
عارفين الشعور لمن واحد يحب وحدة وتكون اول حب في حياته واقرب له من انفاسه وتروح عنه كذا بكل سهولة.
طلعت شريحة ثانية بما انها مسويتلي حظر لرقمي القديم وارسلت لها رساله فيها كلام كثير من ضمنها أن حياتنا بتتغير للأفضل إن شاء الله وكل واحد فينا يعدل الخطأ اللي عنده وذكرتها بأيامنا الحلوة وردت أنها ضحت عشاني وإني أنا ماضحيت عشانها وأنها توظفت الأن وانها مبسوطة عند أهلها وانها نسيت شكلي كمان وأرسلت لها اني بادق عليكي ولازم نتفاهم ردت علي إنها برا البيت وماتقدر ترد وبعدها حظرتني
أنا والله ودي حياتنا ترجع أحسن من أول ورغم كل اللي سوته أنا مستعد أسامحها ونبدأ حياتنا من جديد وأن محاولتي للصلح والله ليست ضعفا ولكنها حب صعب اني اكتبه
ودايما ادعي الله انه يجمعني بها لأني عارف إنها طيبة جدا وعلى نياتها بس حسبي الله على اللي كان السبب في تغيير تفكيرها