انا رجل متزوج جديد , وما عندنا اطفال , تقريبا نفس وضعك انت وزوجك , وحتكلم من وجهة نظري

اولا , ردك عليه لما قلتي " خلاص تعال مع انه فالينها مع والبنات " هذا الرد خاطئ , ليش ؟ هذا يعطيه انطباع انك ناسيته وما اهتميتي له , تلاقي الرجال منتظر اتصالك من اول عشان تقولي له خلاص تعال خذني , ولما بادر هو واتصل يسمع منك هذا الرد , انا لو مكانه بزعل صراحة , لاني بحس ان زوجتي مو حاسة بالمسؤولية , حتى لو مرة وحدة سويتيها , المفروض حركة زي كذا ما تطلع منك , خلاص انتي متزوجة وعندك زوج مسؤولة عنه ومسؤول عنك .

الخطأ الثاني : انك رحتي مع اخوك بدون علمه , هذا اكبر خطأ , ضروري جدا تعطيه خبر متى ما بتروحي او تطلعي اي مكان مع اي احد , حتى لو ابوك , اذا كان حتى الصدقة ما يجوز تتصدقي الا بإذنه .

ونومك خارج بيتك وزوجك زعلان منك , هذه لحالة مشكلة . ما اتخيل تصير معي , والله انام وانا مقهور وثاني يوم حكون مجهز رد شديد اللهجة , ما الومه لما تكلم عليك ورفع صوته , تلاقيه مقهور من ليلة امس , انه نام وهو زعلان ومقهور منك , وهذا يفسر انه قالك العزوبية احسن لي .

اكبر غلطة سويتيها : لما قلتي " منت مجبور بتصل على اخوي ياخذني " , هذا غلط كبير جدا , هذا يعطيه انطباع انك مو مهتمة له , وما يهمك قعدتي معه ولا لا ,, ما بيحس بالامان في بيته , وزوجته في اي وقت ممكن تسيبه ومو هامها . ما اتخيل الكلمة هذه تطلع من زوجتي , صراحة بأحس بالاهانة , انه عايش مع وحده ممكن تتركني ولا همها .

انا مو قصدي احط اللوم عليك , بس هذه اخطائك اللي عملتيها ولازم تعدلي من نفسك وتبيني الاهتمام لزوجك , فيه خطوط حمرا لا تتعديها , وغالبا اللي تمس كرامة الرجل , ترا الرجال اعز ما عليه كرامته , ممكن يخرب بيته بس عشان ما تمسي كرامته , وهنا المفروض تجي الحكمة والعقل , الواحد يقدم تنازلات حتى لو على حساب كرامته عشان تمشي الحياة , زوجك حساس على ما يبدو وضروري تداريه وتاخذي بخاطره .

الله يوفقكم