السلام عليكم ورحمة الله وبركاته..

أخوكم متزوج من سنة ونص.. زوجتي جيدة معي عموماً ولا اشكي منها إلا بعض الأمور الطبيعية الموجودة في بداية الزواج والتي نتجاوزها شوي شوي..
الشي الوحيد اللي عجزت اتعامل معه حشرية امها..

امها تعيش في مدينة ثانية، من بداية زواجنا تكلمها يوميا بواسطة النت وإذا ما اتصلت عليها تدق امها الف مرة وتسمعها كلام انك بعتيني ونسيتيني وتصير زوجتي تبكي..
زوجتي ليست كثيرة كلام.. ولكن يوميا امها تسحب منها كل تفاصيل حياتنا، كل صغيرة وكبيرة، عندها فضول بشكل ما تعودت عليه عند اهلي..
كل شي اسويه احس انه مراقب، اكتشفت بعدين ان مو بس تفاصيل بيتي بل حتى الأشياء اللي تصير في بيت اهلي تصير عند والدتها اول بأول..

حاولت مع زوجتي بأكثر من أسلوب، منعتها تكلم أهلها إذا إذا أنا في البيت، صارت تكلمها وانا في الدوام وباقي اليوم على الواتساب، تهاوشت مع أهلها، كلمت ابوها، وما في فايدة.. عرفت بعدين ان امها هي المتحكمة في بيت ابوها وهو ماله كلمة..

زوجتي احبها.. ما أقصر معها باللي اقدر عليه، ولكن امها، وكلامها معها بتفاصيل حياتي وحياة اهلي من وراي مجنني.. عارف المنع مو حل ولكن حشرية امها كادت تخرب بيتي أكثر من مرة..
وأكثر ما يقهرني أن والدتي تماما عكس والدتها، توصيني بزوجتي وترفض تدخل في حياتي وما عمرها سألتني عن شي مع زوجتي..

كيف ممكن اتعامل مع الموضوع؟

(تم تعديل العنوان ليتناسب مع المضمون)