كان عندي نفس السؤال.. لان ملكتي لازم تطول حوالي سنة.. لضروف خارجة عن الارادة..

بصراحة: لايوجد جواب على هذا السؤال.. اهم شيء، هو وعي الطرفان.. بخطورة هالمرحلة..

لان ممكن يصير فيها سوء تفاهم كبير، لذلك الاهم هنا هو، صبر الطرفان .. وان كل واحد فيهم يوجد لشريكه العذر في اي مشكلة تطرأ حتى يتسنى لهما فهم الشريك الاخر..


عن نفسي، بالعامية.. كنت رايح فيها.. ومتخرفن! لدرجة ان بعد تقطيعة الكيك وتصوير الملكة مباشرة، اكلمها واتساب...

والان لنا شهرين..تقريبا، نكلم بعض كل ثلاث ايام تلفون، وواتساب بشكل يومي.. لكن لو تسالني الحين اقولك اني اقدر اكمل سنة... الين الزواج باذن الله..

ليش؟ لانها ايضا انسانه.. وقتها مشغول، على الاقل 50 في المئة من يومها وانا انسان عملي.. بس بنفس الوقت كلنا لنا احتيااجات ونشتاق لبعض..

احيان يوم تقفل معي لانها مسويه ثقيلة، احاول اشغل نفسي باي شيء!

لان لو جلست تحتريها... بيرتفع ضغطك.. وماتدري البنت وش تفكر فيه.. يمكنها ماجله كل شيء لبعد الزواج


واحيان يصير العكس البنت مصفيه الطبلون ومتخرفنه... والولد داق ام الثقل

لذلك نرجع نقول.. مافيه جواب عام لهالسؤال... كل واحد ادرى بخطيبه او خطيبته... اذا هي من النوع المتفهم.. والصبور.. يمكن تطول وقت الملكة.. واذا هي من النوع الشكاي.. والفاضي .. والي دائما يلوم او يبحث عن الاهتمام وانت منت رايق لهالدراما... توكل على الله واعرس بدري



في كل الاحوال لو الامر بيدي... كان تزوجت الان.. ولا انتضرت ثلاث شهور
لان انا وياها وصلنا لمرحلة التعارف.. والميانة شوي طاحت فيما بيننا خصوصا اننا من عائلة واحدة



اتمنى من كل مقبل على الزواج ان يحكم على نفسه وشريكة حياته.. بناءا على ضروفهما وخلفيتهما العلمية والعملية.. لان مب كل البنات سوا.. فيه البنت الي تصبر وتتفهم.. وفيه البنت الكتمومة جدا وماتبان الا بعد العرس.. وفيه البنت الي ماتنفع لها فترة ملكة طويله لانها مندفعة بزياده.. اعرف نوع خطيبتك وبناءا على معرفتك.. حاول توجد استراتيجية في التواصل معها