المشاركة الأصلية كتبت بواسطة FearKillsDreams

هو ماينظر للموضوع من نفس منظورك , هو ينظر بشكل مختلف.
وأقول لك رأيي كرجل : واضح انه لاعاب وجالس يتسلى.



مسألة أنه حاول يتواصل معاك بشتى الطرق أنت تشوفينها أنه ممكن كان فيه سبب قوي مثل رغبة في زواج أو حب حقيقي وغيره , لكن هو أدنى من كذا بكثير , وعلى فكرة هالنوعية من الناس يستمتع في أنه يحاول في الشي الممنوع ويستميت في المحاولة لين يوصل لهدفه .. وفي حالتك هو في قرارت نفسه مبسوط : قدرت أجيبها , قدرت أطيحها , خصوصا اذا كان عارف انك انسانه محافظة وبعيدة كل البعد عن الحرام وهذا الظاهر من كلامك.. في قناعته قدرت أجيب وحده ماقدروا ولايقدرون عليها الشباب .. وفوق كذا -واعذريني على العبارة- خقت معي وصارت تتواصل ... وصدقيني الشباب إلي يتواصلون مع بنات يعرفون من وين تأكل الكتف ... دايم يركزون على الحاجات الناقصة عند البنت : الكلام العاطفي / الأمان / الزواج / المستقبل الجميل , ومع الأسف نسبة كبيرة تصدق وتنجر إلى مالايحمد عقباه , وأقلها أنشغال القلب والبال في وهم ماراح يتحقق.

بسألك سؤال مع أنه بعيد عن موضوعك : ليش فيه بنات من عوائل محافظة جداً ومع ذلك تغامر وتسوي حاجات تنافي أخلاقها وسمعتها وقبل كل شي دينها؟ مو كله سذاجه منها عشان تسوي حاجة مثل كذا, لكن يكون وصل معاها لمرحلة متقدمة وأغرقها لدرجة صارت تصدق كل كلامه وتحس بالأمان أنه مستحيل يضرها.

في قاموسهم كلمات مثل : (راح اتزوجك و و و) مايشوفها كذب , يشوفها ذكاء ... وحتى لو فرضا كان يبغاك زوجه أولى المفترض أنك تشكين في صحة كلامه خصوصاً و انت شايفه كيف طريقة تفكير الرجال في الوحدة الي يتواصل معاها قبل الزواج كيف يشك ومواضيع المنتدى هنا كافية , فمابالك إذا قال لك زوجه ثانية؟ هذا بكاش كبير وأستغرب انك حاطه إحتمالية انه ممكن يكون صادق , أو بالأصح ودك يكون صادق لأن فيه مشاعر تجاهه.

وعموماً حتى كتاباته الآن بعد ماتركتيه كلها محاولة أنه يستميلك عشان تلينين وتتواصلين معاه.

نصيحتي لك : لاتنشغلي فيه , هو أقل من أنك تعطينه 10% من تفكيرك لأنه مو صادق ولو كان صادق كان عمل خطوات عملية في النور + توقفي عن متابعة مايكتب تماماً ومع الوقت راح تنسينه.

واعتذر منك ممكن اكون قسيت في كلامي.