رد: كوفي شوب الصبايا 2 ( المشاركة للنساء فقط
زين أبيها .. باقول لج كلمتين.
فاهمة تماماً كلام البنات اللي يقولن خليج رسمية مع عيال زوجج .. وقنني علاقتج فيهم .... أو اللي يقولن مالج شغل أبداً فيهم .. إنتي لج بزوجج فقط ومالج شغل بعياله.
لكن...
مسألة العيال كانت حيوية ومطروحة من البداية بينج وبينه .... ونقدر نقول إنها كانت أحد شروط زوجج قبل الزواج .. وأحد المسؤوليات اللي طالبج فيها من البداية .. وإنتي وافقتي عليها.
فما ينفع الحين تتراجعين وتقولين مالي شغل!
في نفس الوقت معاج طبعاً وأكيد إن الاحترام ضروري .. ومن حقج 100%
عشان جذي الحل هو إنج تشتغلين على هالاحترام والأدب في علاقتج معاهم .. مب تسحبين نفسج وتقولين أنا باطلع من الموضوع وما لي علاقة بأمورهم.
لما البنت كلمتج بقلة احترام عن الغرفة .. كان المفروض وعلى طول تقولين لها: الغرفة موجودة والمفتاح موجود .. لكن لما تتكلمين معاي باحترام وأدب بافتحها لج وادخليها مثل ما تبين.
وعقب لا تسمحين لها بدخول الغرفة إلا إذا اعتذرت بشكل مباشر أو على الأقل رجعت تتكلم معاج بأدب.
شي طيب إن أبوها أنصفج .. لكن مب معقول بتدخلينه في كل موقف أو مشكلة تحصل .. خصوصاً إن هذه مسؤوليتج إلى حد ما حسب الاتفاق اللي بينج وبينه .. ومن حقج تتصرفين بالطريقة المناسبة وباللي تشوفينه .. طالما هو واثق وإنتي عارفة عمرج إنج ما بتظلمين عياله .. لأنج في النهاية مب بيبي سيتر.
وإذا عقب كل مشكلة هو اللي بيتدخل ويحلها ويفصل بينج وبينهم .. فعياله عمرهم ما بيفهمون غلطهم في حقج .. ولا عمرهم بيصلحون أسلوبهم معاج .. لأن رد فعلهم (الاعتذار أو تعديل السلوك) بيكون بناءً على خوفهم أو احترامهم لابوهم .. مب لج انتي.
__________________
اللهم طِيبَ الأثر .. وحُسْنَ الرحيل.