السلام عليكم

أريد أن يكون هذا الموضوع نقاش عام لكن حابه أول أبدء بموقف صار لي مع زوجي عشان تفهمون الموضوع

أنا انسانه أشوف اني ماقصرت مع زوجي يعني ماشاء الله لا قوة الا بالله قايمه بأموره على أكمل وجه رغم اني موظفة وأدرس بعد

البيت نظيف والفواحات شغاله على طول وأهتم بنظافتي الشخصية جدا وبلبسي حتى ملابس زوجي أنا اللي أغسلها وأكويها ما أخليه يوديها برا ومريحه زوجي على الآخر من ناحية الطلبات والمشاوير وحتى الأمور المادية ما أكلف عليه بشي كل احتياجاتي الشخصية علي

والطبخ <<< ركزوا الآن لأني راح أدخل في صلب الموضوع

يوميا ماشاء الله أطبخ وأتفنن في الأكل وفي طريقة التقديم وأطبخ طبخات مختلفة أولا لأني أمل من الروتين في الأكل وثانيا لأني أبي أبسط زوجي وأحسسه ان وظيفتي مش عائق للاهتمام به وبأكله وبالبيت

اليوم جاني وقال انه واحد من أصحابه حصل على ترقية وانه بهالمناسبة يبي يعزمه عندنا بالبيت هو وباقي شلة الأنس وطلب مني أبيض وجهه وأسوي أنواع من الحلى والمالح (فيه شغلات معينة طلبها تاخذ وقت في التحضير)

قلت ليه ياحظي صاحبك يترقى وأنا آكل ت... وبعدين الشغاله مسافره وأنا هالأيام مشغوله

صار بيننا نقاش من ضمنه قلت اني عمري ماقصرت معاه لا هو شخصيا ولا مع أهله وأصحابه أكثر من مره أبيض وجهه قدامهم وأسوي سفره فيها مما لذ وطاب لما يجون عندنا وأهله فوقها أستقبلهم أحسن استقبال

قال أنا عارف بس كملي جمايلك هالمره

قلت لا كفايه انت كل مره تقول هالمره بس وأنا انسانة مشغوله ماني فاضيه وغير كذا مو مزاجي الطبخ أبد بس أضطر أطبخ دائما عشانك انت لكن الناس ماعلي منهم مو مسؤولة عنهم

قال أنا ماهمني كل هذا أنا أبي وحده تبيض وجهي قدام الرياجيل

قلت الحين صرت ما أنفع أنا ولاني مبيضه وجهك؟ الزبده اعزم صاحبك في مطعم

قال ايه بعزمه في مطعم.. شكرا ماعاد أبي منك ولا شي

السؤال اللي تبادر الى ذهني وقتها: يعني لو الزوجة معيشه زوجها في راحه وسعاده ومو مقصره عليه في شي لا في طبخ ولا غيره لكن ماطبخت لضيوفه (وبيضت وجهه قدام الناس) خلاص تعتبر ماعاد تنفع؟؟!!

ولو هي مسوده عيشته بس مبيضه وجهه قدام الناس خلاص تصير ممتازه وماعليها قاصر؟

ليه الرجل مهما كانت عقليته متفتحه تهمه هذي الأمور؟!

ليه الرجل كمان لما يفكر يتزوج يبحث عن الجميلة المتعلمة ذات الدين والأخلاق والحسب والنسب واذا تزوجها تغاضى عن هذا كله وركز اهتمامه على طبخها؟

صرت أفكر أضرب عن الطبخ لزوجي.. نصير نمشي بالأكل الجاهز وأوفر طاقاتي وقت العزايم (عندما تكرم المرأة أو تهان )

شرايكم في الموضوع؟


تم تعديل العنوان ليتناسب مع المضمون

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا