رد: زيارتي للطبيب النفسي (أخي عضو قديم)
اقتباس:
المشاركة الأصلية كتبت بواسطة عضو قديم/
قرأت من بعد الرابط هذا اربع صفحات تقريبا ( كل صفحة 40 رد) ومازلت مستمراً في القراءة
سؤالي : ماهو انطباعك الحالي عن ماكتبته مهرة في الرابط اللي ارفقتيه لي؟
هل هي نفس نظرة مهرة الان بعد 10 شهور من الموضوع؟
|
لستًُ متأكدة أنني فهمت قصدك .. ولكن إن كنت تقصد أنني انفعلت فتسرعت .. أو أنني ندمت على طلب الطلاق حينها .. فبصراحة شديدة لا.
أنا لستُ حريصة على الطلاق .. وإلا كنتُ طلبته منذ البداية .. ولكنني لم أستطع أن أتقبّل ما يحدث حتى الآن .. وهو لا يريد أن ينتهي!!
قلت له يومها: ما بيفرق معاك الطلاق لأن عندك بدايل.
استنكر استخدامي للجمع بشدة .. وصمم إنه ما عنده غير الأخرى فقط!
اعتقدت أن التلميح قد يكون كافي ويجعله يتوقف .. ولكنه لم يتوقف!!!
طيب لين متى؟!!! .. الأمر يتطور وزوجي صار يخربط في الأسماء جدامي!!!!
الدكتور يقول: في النهاية بيتعب ويترك كل هذا!
بعد شو؟؟ .. بعد ما تطلع روحي وتتدمر نفسيتي؟!!!!!
ليش ما يكون الطلاق هو الحل المناسب؟!!
بعدين ليش أضحك على نفسي؟ .. إحنا أصلاً حياتنا مب طبيعية .. هو إنسان غامض وصامت وكتوم .. ما في كلام أو سوالف طبيعية مثل أي اثنين .. ناهيك عن أي زوجين .. الوقت اللي يكون موجود فيه إما يقرا جريدة أو يشوف تلفزيون أو آي باد .. وطبعا الواتس اب العظيم اللي ما يتركه من من ايده ثلاثة أرباع اليوم.
نطلع مرة في الأسبوع مع اليهال .. نروح المول نتغدا ويلعبون أقل من ساعة .. ويحسب لهم عدد مرات اللعب .. ونرجع!
ومرات يطلّعني الصبح نتريق برا .. وبعد ما في سوالف .. وغالباً ياخذ الجريدة اللي في المطعم عشان يقراها!
ياخذني طبعاً مشاوير الجمعية والسوق والمول والمستشفى .... لكن كلها مشاوير أعملها بروحي لما يكون مداوم .. وأكون مرتاحة أكثر عكس زمان.
لما يكون في شغله يبعث يصبّح علي .. أما المكالمات فما عاد لها طعم .. كم دقيقة وبس .. لأنه ما يسولف (شخباركم .. شو بتسوين اليوم؟) وخلاص! .. حتى اليهال أنا اللي أتكلم عنهم بس هو ما يسأل عنهم من نفسه .. لدرجة إني صرت أكره أكلمه عنهم.
صرت أكره أكلمه بعد مشواري للجمعية مثلاً .. لأني بعد ما أدفع ببطاقته يوصله مسج بالمبلغ .. فيتصل: (كل هذا؟؟ .. شو ماخذة انتي؟؟ .. لا لا انتو تستهلكون وايد .. لازم نشد الحزام .. لا تاكلون وايد .. خذي الأساسيات ومالها داعي الكماليات) ...... كل هذا مزح ومشاكسة مب جد وأنا متأكدة تماماً من هذا .. لكن هذا الحوار يتكرر حرفياً كل مرة ..... لهالدرجة ما في كلام ولا سوالف بينا!!!!!
وقلت له هالكلام وما في فايدة.
زمان كنت أقنع نفسي إن هذا طبعه .. وإن الرياييل ما يحبون الكلام الزايد والهذربة ...... لكني مب شايفة الحين إني المفروض أتفهم شي .. لأنه يتكلم ويهذرب مع غيري .. إذاً السالفة مب طبع ولكن قرار واختيار .. وهو قرر واختار إني أنا للبيت وتربية اليهال .. والكلام والسوالف لغيري!
حتى المرض اللي كان يدعي إنه ما يحب يتكلم عنه ولا يقول لحد .. السنة اللي طافت عمل عملية تفتيت لحصوة في الكلى .. وبالزور رضى أروح معاه .... وبعد العملية اكتشفت إنه قال لهن كلهن إنه في المستشفى وعمل العملية!!!!.. وفاهمة إنها حركات جذب واستعطاف وما أًدري شو .... لكن ليش المفروض أتفهم أو أتحمل؟!!!!
فإذا كانت السالفة بتقتصر على البيت واليهال .. فأنا أصلاً أعتبر أربيهم بروحي .. ماله داعي أتم على ذمته عشان أقدر أكمل هالمهمة.
بالمناسبة .. قبل الموقف الأخير وإرسال الإيميل بعدة أيام وأنا أفكر في الطلاق .. لدرجة أنني كنت أنوي الاتصال بمحامي لأطرح عليه بعض الاستفسارات .. وكلمت أخي أسأله متى ممكن نبيع البيت عشان أقدر أشتري لي بيت خاص.
كنت أفكر أصبر لحين أرتب وضعي .. لكن حركاته قبل ما يرجع الدوام قهرتني وعجّلت بطلبي .. اللي كنت أفكر فيه أصلاً.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 03-05-2015 الساعة 08:01 AM
03-05-2015, 07:51 AM
ضوابط المشاركة
العرض الشجري