ياريت نكمل الحديث هنا اختي بياضة لانه انسب لموضوعك. وبالنسبة لبقية اسئلتك سوف اجاوبها هنا بعد ردي هذا ان شاء الله

فهم وحب وشرح

- انتي فهمتي وهو لم يفهم.

-انتي تحبينه وهو يحبك (مع انك تقولين انه لم يصرح، وانه لازم يحبك لأنه موفرة له كل شيء يحبه).

-انتي شرحتي له وهو لم يشرح لكي (هو رفض شرحك، وانتي لم تحتاجي لشرحه وطبقتي له مايريد).

الخلاصة : نحتاج من زوجك ان يفهم + ان نشرح له ماالذي تريديه منه بالضبط.

عندي سؤال : كم عمر زوجك ؟ اليس في الثلاثينات او بدايتها؟ الهذه الدرجة دقة قديمة (مثل الشيبان)

السؤال الثاني مارأيك في التالي :
الرد رقم 73 مع الفارق ان الاخت كانت تعطيه حب من الجهتين، بينما انتي تعطيه حب من جهة واحدة ( لأنه اصلا لايعترف بالجهة الثانية (العاطفية) فلماذا لاتطبقي نفس الخطة بعد تعديلها لكي تناسبك؟



1- الرومانسية التي تريدينها:
اسمحي لي الذي تريدينه ليست "رومانسية" وانما "انسانية"
هذه اقل متطلبات البشر
بالنسبة لحكاية قومي لاتتمارضين وش اللي يصير بعد كذا؟!
تقومين صح!!!!
طيب لو جيت وانا سألت زوجك ياأخي حرام عليك ارحم هذه الضعيفة ترى النساء حالتهم النفسية تتأثر مع "الدورة الشهرية" والهرمونات مو الهرمونات والعلم يقول كذا .
ايش تتوقعي بيرد علي؟
انا اقولك
بيقول : ياأخي هذه كذابة، والدليل على صحة كلامي انها قامت وكملت شغل البيت ، اللي معاها دلع، والرجال اذا سكت لهم بيركبونه فلازم اوقفها عند حدها!. عرفتي منطق اغلب الرجال.

انا نفس زوجك ، اي الم اي وجع من زوجتي ازعل واطربق الدنيا على راسها (من باب انه دلع زايد ومايجي الا في اخر الليل او يوم جمعه (مافي مستشفيات ) وهي كل مرة تبكي وبعدها تشرح لي ان المقصد استعطافي وسماع كلمة حلوة مني ليس الا، وما استوعبت الا بعد التكرار ومن ثم اقتنعت وبعد التكرار مرة انجح ومرة ارسب، والان والحمد لله نجاحي اكثر من رسوبي.

وغير كذا اللي خلاني ارحمها والدتي، كنت اشتغل انا وهي في اعمال المنزل (دهان - ونجارة. وغيره (اوامر الوالد) ) وكانت تشتكي لي انها معها الدورة ولكن ابوك مايفهم، فلما تزوجت اقتنعت ان الحرمة تتعب وقت الدورة وخاصة مع القراءة في المنتديات وسماع الاشرطة ولكن لم انفذها الا بعد فترة طويلة بعد مانضجت.


2- الغيرة:
فكرتها تتلخص في اني (الزوج) مسؤول اني احميكي من نظرات الاخرين، لأني اعرف وقعها على الرجال بحكم اني رجل، والنظرة لن ينساها الرجل حتى لو كانت مرة واحدة بالاضافة لااريد اسمع كلمة جارحة من اي احد شاهدك ولو بالخطأ فهذا عيب كبير في حقي. انا الوحيد الذي اشاهدك فقط. اما غيرته من كل شيء تقومي به فهذي تحتاج الى تفصيل (ولكن ليس هنا- بامكانك فتح موضوع يخص هذه الجزئية).

3- تدخل اهلك:
وهذا مااريده من موضوعي وهو عدم الانتظار حتى يطفح بك الكيل، ممن قرأت من كلامك حتى الان ارى انه لابد من التدخل (ولكن بعد انتهاءك من العمل على نفسك + ترسلي له موضوع التمثيلية الصادقة (والافضل انك تطبيعها على ورق وتضعيها في مكان ممكن يصل اليه ويراه من غير ضغط مباشر منك + جاءتك الدورة الشهرية وتعبتي ارسلي له رسالة قبلها بيوم ترى بكرة سوف تأتيني وسأكون تعبانة وياريت تحضر معاك غداء (رضي ولا مارضي مش شغلنا ، انتي نبهتيه وخلاص) بعدها ان جاء وزعل (لاتشدي معاه (وانتي ابخص بزوجك) المهم نبغى نوقف الموضوع هذا عند حده، وهذا من حبك له ولضمان استمرارك معاه. ( على فكرة اوقات كثيرة لما توقف زوجتي بوجهي وانا الغلطان ماأقدر اكمل وارخي على طول (ثواني وتكون وصلتها الرسالة انه معاكي الحق) وبعدها لازم تحافظي على كرامته كرجل امامك (حتى لو غلطان ومثلّي انك ضعيفة امامه)
اذا لم تثمر الخطوات السابقة يمكن زوجك يحتاج وقفة رجال (مثل قريبي اللي قلت لكي قصته) وهذه ممكن تكون بأنك ترسلي للوالد رسالة ( السلام عليكم ياوالدي عندي اشكالية بسيطة واستحي اقولها بوجهك واحتاج مساعدتك بحكم انك رجال، بعدها برسالة ثانية : هل من الممكن بطريقتك ياوالدي ومن غير زوجي مايعرف اني خبرتك، تشرح له او توصل له معلومة الرفق بزوجته وقت عذرها الشرعي، وتراها مشكلة بسيطة جداً ولكن النار من مستصغر الشرر) طبعاً يعتمد هذا على علاقة والدك مع زوجك.