السلآم عليكم
حابه تشاركوني قصتي وتفيدوني وتوجهوني .. أنا انسانه متزوجه عندي بنت وولد الله يحفظهم عمري29 سنه وزوجي 31 سنه كلانا موظفين والحمد لله عمر زواجنا5 سنوات .. عايشين ببساطة وسعاده مع وجود بعض المنغصات والمشاكل الزوجيه البسيطه التي نتجاوزها بهدوء وتفاهم .. ولكن تظل هناك بعض الأمور المعلقه اللي ما أقدر أكلم زوجي فيها لأنه خط أحمر بالنسبه له ولأني بطبعي هادئه وما أحب المشاكل وأتنازل دائما رضخت .. أدري انها سلبيه مني ..بس زوجي عصبي جدا لدرجة انه ممكن يرمي ويكسر أي شي في يده ..وعلى العكس اذا كان مبسوط ورايق يكون وديع ولطيف جدا ..
راح اعطيكم ايجابياته قبل ما أخوض في المشكله الأساسيه ..
هو انسان مثقف وطموح وواعي وحنون معي ومع اولاده لأبعد حد يساعدني في المطبخ ودااايم يجيب لي هدايا باستمرار حتى لو يسافر يوم واحد ويرجع مستحيل ما يجي وفي يده هديه كريم جدا ولطيف وخلوق مع أهلي وامي وابوي يحبونه كثير ..
مشكلتي معه في الزيارات طبعا زياراتي لأهلي بالقطاره واذا وداني يا اما يكون متضايق او طفشان رغم ان بيت اهلي مايبعد دقيقتين بالسيارة .. اما زيارات خوالي وعماني وعماتي وخالاتي هذي ممنوعه الا اذا سمح لي مره في السنه بتقولون ليش اقولكم يكره بعض اقاربي عداوات واحقاد قديمه من قبل الزواج وما عرف صلة قرابتي بهذولي الناس الا بعد الزواج ومنعني تماما من السلام عليهم عشان كذا يمنعني من زيارتهم .. احيانا اقول مو مشكله اهم شي اني مبسوطه في زواجي ومع عيالي والزم ماعلي هم ..بس احيانا اتمنى ازور قرايبي وابادلهم الزيارات ولو في الأعياد خاصه انهم داااائما يعاتبوني ويسألون عني ويستغربون ليش ما ازورهم مثل بقية خواتي ..
واساسا هو من النوع اللي يكره خروج المرأه من بيتها وانا ما ازور جيراني ولاهم يزوروني حسب رغبته .. رغم انه مضايقني هذا الشي ..بس ماقدرت أغيره.
الموضوع الثاني او المشكله الثانيه هي..راتبي.. هو مضيع بطاقته الصراف وشهريا ينزل راتبه ويحوله ع حسابي ويستخدم بطاقتي طبعا راتبي دبل راتبه اطلب منه يحول لابوي وامي مبلغ معين شهريا وياما حاولت فيه يوديني البنك عشان افعل خدمة الهاتف المصرفي او مباشر ويرفض تماما. والباقي اذا صارت فرصه ننزل للسوق اشتري اللي ابي رغم انه يدقق ع مشترياتي وما اكون براحتي اشتري اللي ابغاه يعني لو القى مثلا علبة مكياج وتكون غاليه ما يخليني اشتريها .. وبقية الراتب يتصرف فيه هو واذا دققت وحاسبت يزعل ويقول فلوسنا ما بيننا فرق وأنا اتضايق من هذا التصرف..وهو والله كريم وعنده مشاريع والله معطيه وفعلا ما يحاسبني على فلوسه اذا اخذت منها قبل ما اتوظف كان يجيب ارباح مشاريعه ويحطها واذا ودي بفلوس يقول خذي اللي تبين فدا رجولك ..بس مدري ليش احس انه الحين يستغل فلوسي وراتبي ويبي يكون هو المسيطر والمتحكم .. طبعا مر بظروف وكان مديون وانا طلعت له قرض خسف بثلث راتبي ..
شي أخير أحب أضيفه انا أحيانا اكون مرتاحه ومبسوطه وراضيه ..بس أحيانا تاكلني نار داخلي ليش انا كذا .. اشوف خواتي يجون ويروحون براحتهم وين ما يبون ورواتبهم هم المتحكمات فيها وازواجهم طيبين مره واتحسف على نفسي واذا ودي اصارح زوجي اتراجع كثير .. أولا لاني ما اقدر اتكلم واذا تكلمت اتلعثم وابكي وماعاد افدر اقول اللي بداخلي وثانيا ما احب المشاكل وزوجي اذا زعل مني يهجرني ولا يكلمني ويطلع من البيت ويستمر الوضع بالايام حتى انهار من داخلي واضطر اصالحه وأوافق على كل مطالبه ..
هو دايما مشغول .يجي البيت يرتاح واذا طلع مشغول .. احاول اصطاد فرصه يكون فيها رايق وفاضي عشان اتكلم معه بس ما قد لقيت الفرصة المناسبه خاصه مؤخرا .
أنا حاسه ان لو ماكنت سلبيه كذا ودايما اتنازل عن حقي كان قدرت اغيره من زمان بس وش أسوي هذا طبعي .. زمان قالت لي أمي جمله والله انها ترن في ذاكرتي كل يوم
..قالت يارب تتزوجين انسان طيب ويقدرك ويخاف الله لأنك كتومه وماراح تآخذبن حقك لو تنظلمين ..
محتاجه آراء .. وتوجيهات .. ودفع معنوي .. ومؤازه منكم ..