(مميز) زوجة معدد؟ ...... تفضلي - منتدى عالم الأسرة والمجتمع
logo

الملاحظات

المتزوجين مواضيع تهم المتزوجين من الرجال والنساء.

 
أدوات الموضوع
انواع عرض الموضوع
قديم 08-06-2014, 01:31 PM
  #11
مهره
عضو المنتدى الفخري
 الصورة الرمزية مهره
تاريخ التسجيل: Aug 2003
المشاركات: 17,491
مهره غير متصل  
رد : (مميز) زوجة معدد؟ ...... تفضلي

مب فاهمة انتو ليش معتقدين إن ردة فعلي عاطفية ومندفعة؟!

ليش معتقدين إني مصدومة لأني اكتشفت إن الموضوع مب نزوة؟!

أنا من زمااااان عرفت إن الموضوع أكبر من زواج مؤقت أو علاقة عابرة .. من وقت ما شفت بطاقة التأمين الصحي اللي عملها لها .. من وقت ما كان وهو عندي يشغل سورة مريم أيام حملها .. من وقت ما بدا يبني لها بيت وهي حتى بعدها ما كانت حملت.

مشكلتي إن دخولها في حياتنا معناه إنه وقته معانا بيتقلص .. معناه إني إما أرضى إني أشوفها أو أنحبس في بيتي.

طول السنة ونص كان ما يبات برا .. الحين بييبها بيت أهله عشان تقعد بروحها مثلاً؟


هو وعدني ان حياتنا ما تتغير .. وأنا صبرت على هذا الأساس .. والحين كل شي قاعد يتغير!

كذب عليّ .. خذني على قد عقلي عشان أبلع الموضوع وأسكت .. وهو مخطط لشي ثاني!

كذب على أمه وقال لها أنا باشاور ام سلطان ولو رضت بييبها ولو ما رضت خلاص .. والحين لما ماما سألته قال لها ام سلطان راضية!!
.
.
.
أمي كانت معي منذ قليل وسألتني عنه .. قلت لها ما ادري.

قالت: تراني مهاوشته يوم الخميس .. قلت له ليش مزعّل أم سلطان .. قال: من قال مزعلها؟ .. قلت له طيب تعال خلنا نيلس ونتكلم .. قال ما في شي نتكلم عنه .. قلت له عيل خلاص سير الله وياك .. وسكرت الباب في ويهه.

قلت لها: يمه خلاص ماله داعي تهاوشين ولا تعملين مشكلة .. خليه يسوي اللي في راسه .. الموضوع منتهي بالنسبة لي خلاص.

انصدمت شوي .. قالت: أم سلطان! شو تقصدين؟

ما رديت.

قالت كلام كثير .. إنتي بنتنا .. وإنتي العزيزة اللي مالنا غنى عنها .. وانتي في كفة وهو وهي في كفة .. واحنا والله سألنها عن رايج قبل ما تيي وقال: خلاص أم سلطان راضية .. بس ما دام انتي مب راضية خلاص ما راح يصير إلا اللي يرضيج.

قلت لها: يمه خلاص ما في شي يرضيني .. وحتى لو طلقها ما راح أرضى .. ولدج كسر كل شي فيني .. ووالله لو ما كنت مفهمته كنت قلت ما يعرف .. لكني قلت له خلها مكانها وسوي اللي انت تباه بعيد عن البيت .. بس هو ماشي بشوره وما عليه من حد .. وانا ما أقدر على جذي .. أنا ما تزوجت عشان كل هذا يصير فيني .. هو ما خذني من الشارع عشان يسوي كل هذا واتم ساكتة.

قالت: لا والله انج عزيزة ومحد يقدر يرخص فيج وانا موجودة .. خليه برايه يسوي اللي يباه ويروح وين ما يبا.

قلت لها: لا .. ما في شي اسمه يروح وين ما يبا .. وأنا اقعد مكاني منتظرة .. يمه هو في شغله ثلاث أسابيع .. ثلاث أسابيع انا بروحي مثل المعلقة .. أنا وعيالي أولى بوقته لما يرجع .. أنا وعيالي أحوج انه يعوضنا عن غيابه .. مب يروح يوزع وقته هني وهناك! .. يغيب كل هالوقت ولما يرجع يقول لي: انتي تبيني لاصق فيكم 24 ساعة؟!!

حاولت تطيب خاطري وقالت لي: لا تزعلين مني يا أم سلطان .. قلت لها: حشا مب زعلانة منج يمه .. إنتي ما قصرتي ورايتج بيضا .. وانا ما أقدر أطالبج بشي فوق طاقتج .. بس خلاص يمه اللي صار صار .. خلوه يسوي اللي يباه .. وأنا والله ما اباكم تزعلون من بعض ولا تعملون مشكلة بسببي .. هو في النهاية ولدكم وأنتو اهله.

قالت لي: أنا ما راح اقدر اعارضج في شي ولا راح أقدر اطلب منج تتحملين شي ما تقدرين عليه .. اهم شي صحتج وعيالج .. انا ما اباج تشيلين هم ولا تفكرين في شي ولا تقهرين نفسج.

قلت لها: امبلا يمه .. أنا مقهورة وايد .. ومجروحة وايد .. وخلاص وصلت حدي.


طبطبت علي كثير .. ومسحت على راسي وباستني.
__________________


اللهم طِيبَ الأثر .. وحُسْنَ الرحيل.
 

مواقع النشر


ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:11 AM.


images