السلام عليكم ورحمة الله وبركاته
كيف اقوي من شخصيتي واضع حدود بيني وبين اهله , بما اني اسكن مع اهل زوجي في نفس البيت
أمه بالرغم على انها طيبة إلا انها قوية ولازم يكون عندها خبر بكل شي يسير في البيت او مع عيالها
ومو اقصد بأنو زوجي يقول لها كل شي عننا بالقصد , بس هو بسلامة نية يتكلم , وهي تسحب الكلام منو
مو من غباء زوجي او عباطتو
شي ثاني مثال ( بنتها تدرس في الجامعه بس في مدينه غير عن اهلها , مره ونحنا سمرانين قالت افتكر مره غبت وماحضرت , استغربت الام وقاطعتها وقالت متى دا , وليش غبتي ؟ وليش ماقلتي لي , كذا ماتقولي لأمك
وبنتها ترد عليها بأنو عادي عدت سنه وانتهت وكان غياب عادي , وسكتنا الا انها رجعت فتحت الموضوع تاني الا تبغى تعرف ايش سبب الغياب وليش ماخبرتها .!!!
مواقف زي كده تبين لي كيف ام زوجي , وغيرها من المواقف وسرت اعرف طبعها كيف تقريبا
كم مره احس انها تجبرني على اشياء ما ابغاها أو تحطني قدام الأمر الواقع .! أو تحرجني , او تسوي حركات قاصدتها وبعدين تبرر وكأنها ماسوت شي .!!
مثال ( كنت في قسمي وغرفتي مسدوحه والوقت متأخر ( بما انو صالتهم ومكان جلوسهم قريبه من غرفتي , انا اسمع اصواتهم دايما ) , ولقيت الشغاله تدق عليا الباب , وانا وقتها كنت عجزانة اقوم وافتح الباب , وطنشت ومارديت , وسمعت امه قالت للشغاله هيا ادخلي , وفعلا اتفاجئت بالشغاله تدخل قسمي وهيا تنادي عليا وراحت صالتي وخرجت
انا استنكرت واستغربت حركتها , في الصباح لمن صحيت , فتحت الموضوع هيا وتقول لي انتي كنت تكنسي في بيتك قلت لها لا والله كيف اكنس وانا ماعندي مكنسة , ضحكت وقالت , كأني سمعتك تكنسي فقلت للشغاله ادخلي ودخلي لها اغراضها يمكن ماسمعت عشانها تكنس .!!
ومره وانا عند اهلي ( اتفاجئت بأنها دخلت بنات اخواتها لقسمي بدون ما اعرف ..!! ( قسمي يتكون من غرفه نوم وحمام الله يعزكم , وغرفة ملابس مفتوحة , وصاله صغيره ومطبخ تحضيري صغير , يفصل عن صالتهم ومكان جلوسهم وسهرتهم واكلهم , باب خشب زي السحاب وتقريبا كل شي في قسمي مفتوح على بعضه !! )
ومره كنا في عزيمه مع صحباتها, اخدتني معاها , ولبست انا فستان لونو اسود , وهي لبست فستان سكري طول السهره بان عليها الزعل وتقول انها ندمت ولبست سكري لو لبست هي اسود .!؟!!
واقربها ( كنت في عزيمة لبنتهم ( بما اني عروسه جديده واول مره اجتمع بأهل زوجي كلهم في عزيمه كبيرة, في نهايه السهره جات واعطتني وجه اخيراً وكلمتني بصوت عالي قدام الحضور واقاربها ,
فلانه رايحه , قلت لها ايوة خلاص
قالت : مين بيوديكي قلت لها السواق , قالت خلاص طيب ولفت وجهها عني وقالت لوحده صحبتها , مع عيلتها
خلاص روحي مع حرمه ولدي هيا بتوصلك , وكملت كلامها معايا , ايش نوع سيارتك , انا مع الصدمه بان على وجهي الاستغراب وانكسسفت مره , قلت لها نوع السياره وقلت لها بأنها كبيره وتشيل لأن العدد كبير ( بدون ما استوعب )
استغربت كيف تبغاني اوصل ناس ماعرفهم والوقت متأخر مره وكانوا عيلتين .!!
طيب على الاقل تكلمني بالاول وتستأذني مو تفجعني كده !
بس الحرمه كانت ذوق وحست بيا انو انحرجت واعتذرت , وكانت ام زوجي تصر على الحرمه وكأنها هي اللي بتوصلها , انا وقتها جاملتها وماعارضت انو اوصل الحرمه .!!
وغيرها وغيرها من المواقف , اللي تخليني اكون متخوفه منها بعد الموقف الأخير ,
قلت لأاخواتي انها مو سهلة بالمرة وماينقدر عليها !! الا وحده زيها او اشطر منها
قلقانه انو في المستقبل بتسير بيننا مشاكل بتأثر بيننا وبين علاقتي مع زوجي مع العلم انو ما ابغى زوجي يدخل ويكون في النار بيني او بين امه ( لأني جربتو في موضوع مع امو وقال لي بطريقة غير مباشره انو ممكن يكون فيها زعل , وانه ماله دخل , فغسلت يدي منو )
, انا بطبعي طيبة ومسالمه بس اخاف اقلب عليها وابدأ اشتغلها في الازرق والاحمر والمستنيل على عينو ههههههه
من جد كيف احط حدود بيني وبينها وافهمها انها مالها سلطة عليا , ومو كل شي لازم تعرفه عني !!
, ولمن اقول لها لأ يعني لأ , مو تجبرني بطريقتها على اني اخرج معاها وقت ماتبغى .!!
وكيف اقوي من شخصيتي سواءً معاها او مع الكل , حتى زوجي
( مالهم امان الرقاله , ما ابغى اطبطب عليه كل شويا )
اخاف اجاملها واسكت ويتراكم كل شي عليا وانضغط ويجي يوم وانفجر ( دايما انا اسوي كده ) ( لأني شايفه حال اخواتي كده .!! )
ابغى من البداية اكون واضحة معاها , احسها مو قايمتني من ارضي , يمكن مستصغرتني , او يمكن ماهضمتني
أغلبية الناس كده ( يستصغروني او مايتوقعوا اني اسوي كده , يمكن عشان شكلي يبين اصغر او عشان هاديه بس انا اكون هادية مع الناس اللي ماعرفهم او يمكن طريقتي او اسلوبي غلط !! )
من جد ابغى اتغير للأفضل وللأحسن بإذن الله في تقوية الشخصية , ابغى اتعلم فنون الردود
كيف اتصرف واتعامل في مواقف محرجه وكده
نصايحكم والله يجزاكم خير
10-04-2014, 04:49 AM
مشكلتي مع ام زوجي
ضوابط المشاركة
العرض الشجري