بسم الله الرحمن الرحيم

((زوجي يطردني من منزلي بعد خلافاتنا ))
بدخل بالموضوع على طول واتمنى الكل يساعدني ب إبداء رأيه
وياليت تفيدوني وتنصحوني ..

أنا متزوجه من خمس سنوات والحين دخلت السنه السادسه وباختصار
صارت معاي مشكله صغيره ف بداية زواجنا ووكانت هالمشكله السبب
في انه الشك يدخل قلبه رغم برائتي وربي وحده عالم وشاهد ..
بس بعدها عدت على خير وعشنا حياة طبيعيه فيها شوية مشاكل
مثل اي زوجين ..

بس الفتره الاخيره لاحظت انه كل ماصارت بينا هوشه ومشاداة بالكلام
على طول يقول يلا شيلي ملابسك وبيت اهلك ومايعطيني اي فرصه ادافع
عن نفسي ..
واروح لاهلي واجلس اسبوع اسبوعين مرات شهر ويكون مطنش الين ابادر أنا
برساله احاول اصلح الامور واحنن قلبه شوي وكانت هالطريقه احيان تصبط
واحيان لا ..

وكل مره على هالموال ،، اخر مره صارت بينا مشكله كبيره وتركني عند اهلي
3 شهور أنا وبنتي عمرها سنتين وكنت حامل وماكان يسأل ولا يصرف
ولا شيء واهلو لما جاهم خبر صراحه وقفوا معاي واتفاهموا معاه وجاء
ورجعني رغم أي ماكنت أبي ارجع له على طول بس قلت يلا ما يخالف
عشان بنتي وعشاني كنت حامل مابي اصير حمل ثقيل على اهلي

بعدما رجعت حسيت انه تغير شوي للأحسن وصار يعاملني افضل من قبل
وانا بعد تغيرت وغيرت من نفسي واسلوبي وطريقتي وكان كل واحد فينا
يحاول يرضي الثاني عشان نتجنب المشاكل ..

بس للأسف قبل اسبوع صارت بينا مشكله وراح اقولها لكم ب التفصيل
عشان احطكم ف الصوره وعلى اثرها تعطوني نصايحكم وارائكم...

زوجي كان جالس على جواله وانا كنت ف الغرفه انيم بنتي الصغيره
وبنتي الكبيره اللي عمرها سنتين كانت تلعب ف جوالي قبل لا تنام
وتفتح طيور الجنه .. المهم سمعت صوته يناديني قلت وش فيه
قال ليه ما يطلع عندي اخر ظهور لك قلت مدري يمكن الشبكه
او معلق ولا شيء .
قال هاتي جوالك اشوف اعطيته الجوال وجلس يفتش وكذا وولما جاء
يرسل ب الواتس من جوالي ل جواله طلع له حظر ..
قال ليه مسويتلي حظر ،، قلت مدري يمكن ب الغلط او يمكن
البنت لما كانت تلعب ف جوالي لانها احيانا تدخل ع الواتس وتقعد
تخربط ..
قال لا تحطينها ف راس البنت .. انتي سويتي كذا عشان
ما اشوف متى تدخلي ومتى تطلعي في الواتس ..
قلت لا والله مو كذا وليه اعطيك حظر اصلا ..
قال لا تبررين انتي وحده مالها امان ومدري ايش
وحركات اللف والدوران هذي ماتمشي علي ان شاءالله
لو كانت امي .. قلت ياابن الناس عيب عليك مسرع حكمت
علي من راسك والله ماسويت شيء الحظر يمكن بالغلط
ولا دريت عنه ،،
قال يلا الحين شيلي اغراضك وملابسك وروحي بيت اهلك
أنا انصدمت صراحه .. مأتوقعت عشان هالمشكله يطردني
من البيت. ..
حاولت معاه بس مافيه فايده وكأنه ماصدق لقاها فرصه عشان
يطردني ،،
لانه قال لي كلام جرحني حيل .. قال انتي وانتي وانا اصلا بتزوج
وان شاءالله ماعاد لك رجعه ل هالبيت وطز فيكي وف بناتك
ماتهموني و و و ..
وقال الحين الحين دقي على احد من اهلك يجي ياخذك والله ماتنامي
هالليله ف بيتي ،،
أنا صراحه انقهرت وقلت له حسبي الله ونعم الوكيل فيك ودقيت على ابوي
وجاء اخذني من البيت وحلف ماعاد يرجعني له الا بشروط قويه ..

هذا كل اللي صار والحين لي اسبوع عند اهلي ..
وحبيت اضيف نقطه :
يمكن تقولون هو قال هالكلام ف لحظة غضب او كان معصب ولا شيء
بس احب اقول لكم بالعكس كان يكلمني بكل برود
وبكل هدوء ولما كنت الم اغراضي ف الشنطه جلس يلعب مع البنات
ويضحك معاهم ولا همه شيء ،،

وهذي مو اول مره يطردني من البيت ..
بس المره هذي حسيتها قويه ف حقي وعاهدت نفسي
اطنشه واعيش حياتي ولا عاد ارسل له مثل كل مره واذل
نفسي واترجاه يرجعني ،،
ف ياليت تفيدوني ي جماعه لان اعصابي تعبانه
أنا كنت متزوجه من قبل وهو بعد كان متزوج وطلق.
ومعاه ولد ،، والحين أنا بين نارين
ما ابي اتطلق للمره الثانيه والله صعبه علي
وصعبه اكثر عشان بناتي الصغار ،،
وكمان حسيت من كلامه انه خلاص يبي ينهي كل
شيء بينا رغم أني قبل لا اطلع من بيتي قلت له
رجاء طلقني لحد هنا وخلاص ماابي افرض نفسي
عليك اكثر من كذا قال ابشري ولا يهمك قلت لا ابي
الحين تطلق عشان اطلع من عندك وانا مقتنعه ان اللي
بينا خلاص انتهى ،، قال طيب اصبري انتي الحين روحي
لاهلك وبتشوفي ..


هذا كل اللي صار ،،
شورو علي ،،. ارجوكم
أنا عمري 27 وهو 35

((تم التعديل ليتناسب مع المضمون))