مساء الخير اخواني واخواتي الاعزاء
ولله الحمد مرت ال24 ساعه الماضيه بدون مشاكل
طلعنا بالليل تعشينا ورجعنا نمنا بدري
هو ماتقرب مني.. بس كان لطيف بالتعامل معي
ما اخفي عليكم ان اللي صار أثر فيني
صرت ألوم نفسي كثير.. ولا ابي ابتعد عن زوجي
واحس اني روتينيه زياده عن اللزوم
نفس الاكلات.. نفس التسريحه.. نفس الروج.. نفس الكلام
وكنت طول الفتره الماضيه عايشه جو ان زوجي ماتفرق معه
وهو كان دايما يكرر انه مايهتم لهالشكليات مو زي باقي الرجال

حابه اكسر الجمود اللي بينا بس مو عارفه كيف
لي يومين اقرأ مواضيع وأفكار كثيره
للامانه زوجي ماشاءالله مايرد لي طلب
اذا بطلع يطلعني وانا اللي اختار المكان واخذ اللي ابي
ولاعمره قال لي كثير والا غالي والا اجليه بعدين
رغم ان امكاناته المادية محدوده.. وانا تعودت على اسلوبه

الان لما اقارن بينه وبين ازواج معارفي.. اشوف زوجي الافضل
رغم عصبيته وسلاطه لسانه وقسوه كلامه اذا زعل

وانا كنت سابقا فيني دلع ورقة.. مع كثرة المشاكل تغيرت
انا مو حابه اتغير قد ما انا حابه ارجع زي اول عالاقل
كانت حتى وقفتي عند المرايه فيها دلع.. حتى مشيتي وكلماتي
الان لما وقفت مع نفسي وتذكرت اول سنه زواج
صرت احس قد ايش تغيرت سلوكياتي مع المشاكل ومسؤولياتي وبنتي

وردودكم نورتني لاشياء كثيره كانت غايبه عني
اعترف اني محتاجة اثقف نفسي بالحياه الزوجيه
مو بس اكتفي بحل المشاكل.. يبي لي اعاده نظر بنفسي
واعترف لكم اني لأول مره اخاف افقد زوجي.. اخاف يروح لغيري
صرت حتى اتعكنن اذا شفته يطالع وحده حلوه ودلوعه
اقول بنفسي لايكون يفكر بنفسه ويتخيل لو ماخذها علي
لكن اول كنت عااااادي وكان براسي قناعه: لو يلف الدنيا مايلقى مثلي

اعرف كلامي الاخير يدل على ان ثقتي بنفسي اهتزت
لكني محتاجه اكون صادقه اكثر مع نفسي