السلام عليكم ورحمه الله وبركاته

اتمنى لكم الصحه والعافيه واطفال مو عنيدين

ااااه يالعناد اكتب لكم وانا انتفض من القهر زين ماتجيني جلطه من هالولد

ولدي الاول حملت فيه بعد خمس شهور زواج تقريبا او اقل بشوي كانت بيني وبين ابوه انواع المشاكل كنت اعيش في عذاب نفسي مخيف

ولدته ولاده مبكره ولاحسيت اصلا تجاهه بااي احساس احسه مو ولدي مادري هو عشان اول حمل ولاجاني اكتئاب ولاده وقتها كان بالعنايه وكان توقع حياته نسبه بسيطه كان مره تعبان سبحان الله محيي العظام وهي رميم

طلع لي بعدها فرحت وطرت كان هيكل عظمي ومناعته ضعيفه جداا ودايم مريض
المهم كنت الاحظ عليه من وهو صغير زنان وعنيد كل شي يرفضه خلاص مايغير رايه فيه

عدت سنه وتحسنت صحته وصار جميل ولاكانه هذاك النحيف المهم صار عمره تسع شهور وحملت انا بولدي الثاني

لما صار عمره قريب السنتين خلفت الثاني ولا اهتميت بالثاني اهتمامي كله فيه

ينام بحظني ومدلعته يطلع معاي كل مكان والصغير محبوس مع الشغاله كله لاني حاسه اني ظالمته عشان جبت فوقه وهو ماتدلع ولا اخذ حنان حتى النوم هو معاي والصغير مع الشغاله

كبرو الله يحفظهم اخوه مرح ويحب اللعب والوناسه وهو النقيض لبني البشر كلهم
يدور الصياح لو مالقى شي يبكي عليه يخترع حاجه عمره ثلاث سنوات وكم شهر
يعاند في كل شي لبس حمام اكل طلعه جلسه

يعني مهما عاقبت احرمت هددت مايخاف مني ابد

طبعا سلوكه بس بالبيت خارج البيت طفل طبيعي ومعقول يعني يخاف مني لاطلعنا وهددته يعقل مع انه نادرا ماياذي احد

يضرب اخوه وبقسوه جداا مع اني اشتري لهم نفس الحاجات بس يغار منه غيره مو طبيعيه
كرهني في كل شي احيان احسه مجنون او غبي اعيد الكلام مليون مره ومايفهم واضرب ولايرضخ

يعني يكسر العابه مثلا واهدده لما جاء اليوم يجيب السيكل ويمشي فوق العابه عشان تنكسر ونهيته اربع مرات ماطاع يناظر فيني ولايرد علي وقمت ضربته جلس ساعه ونص يبكي وياليته يبكي زي الاطفال لا يصارخ بقوه صوته يخرق الجدران عشان يستفزني

وطايح بحركه ينزل الملابس اللي بالدولاب يطلع الا غراض من الثلاجه هو مو راعي خراب بس يجتهد في اي حاجه تستفزني احس بينه وبيني عداوه والله اشك اقول محطوط عمل لي انه يعاديني لين اذبحه

حتى لو عاقبته وشلت لعبه له ماينساها يجلس يصيح لو شهر ويعاند ويتفل ع الارض وينقز بوجهي يتعمد اني اضربه

مايروح عن وجهي لين اضربه

مابي اضرب طبعي هاديه وحنونه خلاني اكره كل الاطفال والله اني اخاف يجلطني بعناده
لما ناكل وجبتنا مايغسل الا بالقوه لما يقوم الصباح يغير البجامه بالضرب مايرضى يبدل كل الا وامر يرفضها

عذبني عذاب الحمام وانتم بكرامه والله يجلس من الصباح للمغرب يحبس نفسه عشان يعاندني ادخله بعد الضرب يقول ماراح اسوي انا مابي بس عناد لي

تكفون ابي حل له تعبت وتعذبت من عناده
عطوني حلول وتجارب