بنتي وعتابها اللذي صدمني *_*
ابنتي الصغيره ذات الاربع سنوات ونصف !!
وجهت لي عتابا لم يخطر على بالي اني سأتلقاه منها يوما ما !
في هذا العمر بالخصوص ومع هذه المراعاه مني لنفسيتها
مساء الامس كنا في بيت والدي أنبتها على إلصاقها وجهها في
التلفاز لمتابعة افلام الكرتون وكنت اؤنبها مرارا واوضح لها خطر ذلك
توعدتها بأن امنعها من المشاهده ان تكرر الامر فابتعدت عنه
ذهبت ثم عدت بعد نصف ساعه لأرها تكرر الامر وتقرب عينها لمسافه
تبعد 2 سم على الاكثر من التلفاز !
غضبت وأزلت اسلاك التلفاز ولأنها مدمنة افلام كرتون غضبت وصارت
تبكي وتصرخ وتردد جملتها الشهيره ( كل يوم كذا )
لننتقل للهجه العامه لأنقل لكم عتابها بشكل دقيق : )
كل يوم كذا ماتخلوني اتابع ! *_*
انا تعبت خلاص مقدر تعبت منكم
انتٍ دائما تخطئي علي وتقهريني
انا مانسيت لما ضربتيني هذيك المره
وهذيك المره
ووصفت الاماكن علما انها المرتين
اللي استفزتني فيها بشكل كبيييير عجزت فيه عن تمالك اعصابي
لاني اشوفها كيف تضحك لي ضحكات صفرا تنتظر مني اغضب
مره من المرتين طرحت عنها موضوع في هذا القسم
المهم
اكمل لكم عتابها وبكاها اللي استمر ساعه كامله وبكاء ونشيج
انتي فتانه تقولي لبابا عشان يعاقبني لما اخطأ
قلت لها وش استفيد !
قالت كل يوم كذا تستفيدي من الضحك علي
انتي ماتحبيني
خليتي قلبي ينجرح ودموعي صارت حزينه هههههه :|
(هم يضحك وهم يبكي)
قلت لها خلاص انا بروح البيت وانتي خلي جده تصير امك
اذا تشوفين اني مخطئه وكل يوم اخطأ
قالت تخلوني وحيده في هالعالم :| هههههه
سمعت جدتها بكاها وسألتني وعلمتها وقالت لها خلاص لاتبينهم
جيبي ملابسك وعيشي عندي
وراحت تصلي
صارت تبكي وقالت دائما تخبري الناس عني اني اصيح
قالت لها امي انا ناس ؟. قالت مو انتي الناس كلهم
قلت لها انا مااخبر هم يسمعون البكاء بانفسهم
وتخليني وحيده انتي تبين تروحين وتستانسين انتي وابوي واخوي
وانا تخلوني وحيده
وبكاء ماوقف
انتي تسوين اللي تبين وانا ممنوع !
يعني عشان انتي الام تتحكمين فيني ؟ اصلا انتي تحبين تشوفيني
ابكي عشان حلقي ينجرح ويألممني واتعب
كل يوم كذا انا تعبت
يعني انتي تسوين اللي تبين وانا اسوي مثلك لااااااا
تخلين االفرحه في قلبك والحزن في قلبي < صدمتني بها الجمله
الحره كلها تحطيها فيني
كل يوم كذا < مليون مره
انا تعبت وانتي تحبين اخوي وماتحبيني وحتى لما ألعب مع اخوي
ماتخليني
( فعلا انا مااخليها على طول لانها تلعب معه بدفاشه وتخليه يكره حياته
تصير تحمل فيه وتعرضه لمخاطر مره نزلت فيه من فوق لبيت اهل زوجي
افهمها واعلمها انها لازم ماتطفشه بس ماحولك احد مجرد يطفي الايباد
او تسكر سبيس تون تحط حرتها على قولها هههه في اخوها )
رغم اني موفره لها انواع التسالي الا انها ماترتاح الا بافلام الكرتون
طبعا هذي اهم الجمل اللي ذكرتها واللي تحضرني الآن
انا حليمه معاها الى ابعد حد لكني ان انفجرت اعاقبها شر العقاب
وصراحه انا عصبييييه مليون فيادوب متمالكه نفسي معها ومع عنادها
ودلعها الزايد اللي عودها عليه ابوها
اذا عصبت جدا جدا جدا مدري شيصير فيني اقول لها كلام جارح
ومخيف
لاني انفجر منها
رغم اني اجرب معها اغلب اساليب التربيه الصحيحه واشتري افضل
الكتب واقراها الا انها مايفيد فيها شي
تعبت منها وعليها
وكسرت قلوبنا انا وامي يوم شفناها بهالوضع النفسي الخطير
وبديت اكون اكثر استيعاب لها
ماانكر هي ذكيه وعليها حركات يعني جايز انها تستغل الاشياء هذي
عشان نرضخ لرغباتها
علما انه في الفتره الاخيره صارت تقلل من احترامها لي وماتبالي بشي
والله اعلم انه من ام بي سي ثري لانها جلست كم يوم عند اهلي
وكانت تتابعها لاني حاذفتها من البيت
وكلكم يعرف كيف هالقناه هذي سلبيه ومدمره وهدامه !
وش الحل معها !
يمكن يكون عندكم حل ماتعلمته من الحياه ولا الاطباء ولا الكتب !
واسأل مجرب ولاتسأل طبيب !
ابي طريقه افرمت فيها ذاكرتها ! وقلبها المجروح ! هههه
06-02-2013, 05:58 AM
ضوابط المشاركة
العرض الشجري