قلوب شكلي لوحدي هني...

مب مشكله... انا راح اكمل و انتي اقري كلامي...

قلوب.. ما ابيج تستعجلين النتايج... شفتي البنيان كيف... في لحظه ينهدم كل شي و لكن علشان تبني تاخذ وقت طويل و شهور و سنين... احنا الحين نبي نبني علاقتج معاه من جديد.. علاقه حلوه ان شاء الله تعالى...

الصبر ثم الصبر ثم الصبر...

ما راح تعتذرين.. و لكن اسلوبج و تغييرج اللي راح يلاحظه راح يغيره هو بعد ان شاء الله تعالى... و لكن الحين صبر جميل و الله المستعان..

انتي تبينه يفتقد اشيا تسوينه له... و راح نخليه يفتقد هالأشيا يوم تتزاعلون مره ثانيه (الله يبعد الزعل عنكم)...

كل شي يبي له صبر و صبر و صبر...

الصبح لا تنتظرين انه يقومج علشان الفطور... انتي قومي قبله... سوي الفطور و حطي له رساله "فطور الهنا" و روحي نامي... كرري هالحركه 3 ايام... و رابع يوم خليج منتظرتنه و افطري معاه... خليها لحظات حلوه تقضونها مع بعض... قبل ما راح العمل... استودعيه الله بابتسامه و ارجعي نامي....
أهم شي.. لا تزعلين اذا لقيتي انه ما اكل فطورج اول يوم او ثاني يوم او حتى ثالث يوم.. استمري الى رابع يوم.. رابع يوم ما أكل الفطور.. ففي الخامس انتظريه وقولي له شفتك ما تاكل الفطور و قلت يمكن وجهي يفتح شهيتك... او اي تعليق لو من عندج.. لأن هالشي وارد... و لكن كل يوم استمري و استمري و استمري... لا تيأسين... آخرتها راح يحس...

الإبتسامه لا تخلينها تفارقج ابدا... وقت خروجه و وقت دخوله..

صمته عالجيه بصمت هادئ بالمقابل... خليه شوي مستغرب منج... و يسأل نفسه... ليش هالمره هي ساكته... اشغلي نفسج بأي شي... بكتاب... ببرد الأظافر... بتحطين كريمات امامه... ودي اكتب اشيا بس للأسف المنتدى فيه رجال فما اقدر اخذ راحتي وايد هني...

أذكر وحده كان لها نفس المشكله... تزاعلوا و استمر الزعل فتره طويله... و عطيتها خطوات و اتبعتها بالحرف... احيانا كنت اكلمها عالمسنجر و تقول جالس معي و لا يحس و لا يناظرني... يلعب مع عياله و لا كأني موجوده ... و انا كنت اقول لها تتصرف بطريقه معينه و كنت اقول لها اصبري و اصبري و بتنالين كل خير... بعد اسبوع انهار الرجل وقال لها شو فيج شو مغيرنج... احسج معاي و مب معاي... ما اعرف زعلانه مني و عاديه معاي...و التغيير عيبه لأنه قال اول مره احسج غامضه و ما اعرف شو تفكرين فيه... و ذكر لها بعض الحركات اللي كانت تسويها (يوم كنت اقول لها تسوي الحركات... تقول لي سويت و لا طالعني.. كنت واثقه انه يطالعها و رجعت تبشرني بعدها ان الأمور تمام).. هي صبرت فتره و تحملت و ضغطت على اعصابها بس وصلت الحمدلله آخر شي للنتيجه اللي هي تباها...

لهالسبب بعد يا قلوب.. اصبري... بتتحركين بكل هدوء في البيت... بتكونين صامته و لكن مب صمت زعل و تبويز.. لا... صمت الهدوء.. صمت الإنشغال البسيط.... الصمت اللي يقول للرجل "انا في عالمي الخاص... بس وقت احتجتني بتلاقيني"..