رد : هل انت فضولي ؟
في الحقيقة انا عندي فضول لاكن مو في حياة واسرار الناس الخاصة فضولي انه يهمني اني اطلع على كل ماهو جديد واحب اجمع المعلومات عن الأشياء المهمة في حياتنا واحب افيد واستفيد بهذا الخصوص مثلا احب اسأل عن صناعات الأجهزة المنزلية وعن مدة ضمانها وعن اسعارها حتى تكون عندي خلفية وكمان كثير من جاراتي وصديقاتي يسألوني بهذا الخصوص واذكر وحدة من جاراتي اشترت من السوق ترامس قهوة وجابتها لي علشان اشوف وش صناعتها وايش هي من ماركة وكمان الذهب اذا اشترت وحدة من البنات طقم او غوايش او حلق تجيبه لي علشان اشوف كم العيار وهل هو يستحق السعر اللي دافعينه فيه او لا وكمان نوعية الذهب هل هو من النوع الثقيل او الخفيف
طبعا عندي فضول في المستشفيات مع المرضى احب اتقرب منهم واساعدهم اذا كانوا يحتاجون مني مساعدة طبعا بعضهم ذوي احتياجات خاصة وكبار في السن يحتاجون مساعدة واذكر مرة حصلت امرأة كبيرة في السن وبنتها معها لاحظت عليها نايمة على الكراسي في استراحة النساء وطولت وهي جالسة انا جيت ودخلت لدكتور وطلعت زوجي راح صرف الدواء وهي باقي على ماهي عليه جالسين ينتظرون وشفت بنتها تتصل على واحد من قرايبهم وكان مايرد عليها سمعت البنت تقول لأمها يا امي فلان جواله مايرد واحنا تعبنا من الجلسة كل هالمدة وانتي تعبانه لما سمعتها قربت من امها وسلمت عليها وقلت خير سلامات وش فيك ياخاله ناقصكم شئ تبون اخدمكم بشئ قالت لا والله سلامتك يابنتي بس بنتي تتصل على قريب لنا نبغاه يجي ياخذنا من المستشفى وجواله مايرد كلمتها وقلت لها خلاص انا اوديك بيتك انتي وبنتك قوموا امشوا روحوا معاي لو ماعندكم مانع البنت ترددت شوية بس امها وافقت وقالت لها انا تعبت من الجلسة بالإستراحة وابغى اروح البيت ارتاح فيه وافقت بنتها بعد ماكلمتها امها طبعا اعطوني اسم الحي اللي هما فيه وعنوان البيت وكلمت زوجي وشلناهم وديناهم لبيتهم كمان مو اول مرة تصير معي تكرر معي الموقف ثلاث مرات بس الأشخاص مختلفين وكمان انا من طبعي لو شفت شخص مريض قدامي ويتألم بالمستشفى سوى طفل او امرأة كبيرة بالسن او صغيرة ما ارتاح لازم اني اقرب اجلس يمها وادعي لها واقرأ عليها الأدعية والرقية وتبتدي هي من نفسها تتكلم عن مرضها وعن حالتها عاد انا ما اقصر اجلس انصحها تروح لشيخ الفلاني اللي يرقي والدكتور الفلاني بالمستشفى الفلاني اللي مختص بمثل حالتها وابعث في نفسها الأمل والإطمئنان واحكي لها عن قصص اشخاص كنت اعرفهم وحالتهم نفس حالتها وانهم تشافوا وتعافوا بإذن الله وان وضعها طبيعي وماعليها خلاف ان شاء الله الا انها توكل امرها لله عز وجل وتستمرعلى الرقية وتتابع علاجها بالمستشفى وان شاء الله انها تطيب
طبعا انا والله يا اخواني واخواتي ما اكره إلا نوعية فضول واحدة اللي يجيك زيارة او تروح له زيارة ويطلب منك جوالك او انه يشيله بدون استئذان ويجلس يفتح ويطقطق فيه وماعنده دم والا إللي يجيك زيارة ومايبقي غرفة في بيتك إلا ويفتحها ويدخل يتفحصها وحتى المطبخ يدخل للمطبخ ويفتح باب ثلاجتك ودولاب المواعين ويفتش في بيتك كأنه يدور على اثار جريمة والله انا قد شفت اشخاص فضولين لهاذي الدرجة واكثر يسألونك لما تركب سيارتك وين رايح ومن فين جاي وامس مالكم حس في بيتكم فين رحتوا تتمشون طيب وش تعشيتم والله انكم تأخرتم كثير الله كل هالوقت وانتم تتمشون ولا بالسوق وايش اشتريتم ياربي لزقه ياناس لزقة ماعاد باقي إلا يسألونك كم مرة تدخل الحمام وانتم بكرامه فيه فضول يفرق عن فضول واذكر مرة سافرت لديرة وجت وحدة من جارات اعمامي اهل زوجي ودخلوها للمجلس انا ماكنت موجودة وزوجي قد جاب ثوبه مغسول مكوي وعلقة في مسمار في المجلس على اساس انا اشيله واحطه له في الدولاب وتركه وراح والحرمة جت والثوب معلق بالمسمار وجلست تسأل هذا ثوب من معلق هنا قالت لها اخت زوجي ثوب اخوية قالت الله هذا الثوب مقاس اخوك قالت لها ايوه جلست تعيد وتزيد مع اخت زوجي لا صدقيني مو مقاس اخوك والمهم راحت من عندهم وانا كنت عند اخواني ولما جيت إلا واخوات زوجي يعلموني بالسالفة والله ان ضغطي ارتفع وقلت وش دخلها وليش تسأل وارجع اقلب السالفة على ابو الشباب وصارت سالفة كان يقول هذا ثوب بس عاد اشلون لو كان حطيت صورتي في المجلس وش كان بتسوين
وكمان اللي يسألك عن راتبك وعن رصيدك وعن ممتلكاتك
وعن حياتك الخاصة هذا يذبحني مثل اللي يطلب جوالك منك يقول لك بشوف نوعية جهازك ويجلس يطقطق بالرسايل والصور والمقاطع وهاذي الصورة لمين وهاذي الصورة فين وهاذي الرساله من مين وهذا الإسم ايش يقرب لك
طبعا هناك اصدقاء لك تحبهم وتعزهم وسؤالهم لك ما تعتبره انه فضول ليش لأن هما كمان بالنسبة لك كتاب مفتوح وانت تثق فيهم وهم كذلك علشان كذا لما يجيك خبر مفرح وتفرح فيه على طول تقول لهم عنه ولما يجيك شئ لاسمح الله يكدر خاطرك على طول تقول لهم فيواسونك ويوقفون بجانبك وهم نفس الشئ حزنهم حزنك وفرحهم فرحك ورأيك يهمهم مثل ما رأيهم يهمك وكمان تثق فيهم انهم اصدقاء يحفظون السر ويكتمون الأمر مو ثرثارين او ناقلين للهروج او يتصيدون زلاتك ويذلونك فيها ويستخدمونها ضدك في يوم من الأيام
عاد هذا رأي والف شكر للأخت هايدي على الموضوع الجميل اللي يستحق المناقشة .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 02-08-2012 الساعة 08:12 AM