ماضي زوجي
السلام عليكم و رحمة الله
أطلت الغياب بسبب ولادتي و عنايتي بولدي اللي صار عمره ألحين 4 شهور و نص والله يخليه لي. بس كنت متابعة لكم دايما.
اليوم أكتب لكم ، و أخص بالذكر أختي "منك منقهر" و أختي "snowcat" و أقول لهم إني حااااااسة بيكم لأن قصتي تشابه قصصكم.
أختي snowcat تألمت لما عرفت إن زوجها سمى أحد بناته على اسم حبيبته الأولية .. يعني هو اللي قاعد يرسخ الماضي مو هي. هذا ردي على كل من قال لها الماضي راح... انزين هو اللي يبي هالماضي يكون حاضر مو هي مسكينة!!!
أنا بعد تألمت من ماضي زوجي لما اكتشفت تفكيره في حبيبته الأولية من خلال خاطره هو كان كاتبها ، و أنا ما قريتها إلا لما شفته متغير علي مو هذا زوجي الأولي اللي يحبي و يهتم فيني. و لا أـنا ما أحب التجسس و لا فكرت أجي صوب أغراضه. بس ما كان قدامي حل إلا هذا خاصة إني عجزت أسأله شفيك شفيك وش اللي مغيرك و ما كان يعطيني جواب.
بسرد لكم بعض المقتطفات:
1- كان كاتب في الخاطرة أنه يفكر في "ز" (هذا الحرف هو كاتبنه يقصد الحرف الأول من اسم حبيبته) ، و ليش إن الله ما كتبها له.
2- كتب إن زوجتي (اللي هي أنا) لا تألوا جهدا لاسعادي و تحبني بجنون لكني لست بسعيد بسبب وجود "ز" في خيالي . و ما يصعب الموضوع أني سأصبح أبا عما قريب.
3- كتب : جميع تخيلاتي و خواطري تقول سيحدث شيء ما و أرجع لآخذ من أحب. لكن ما مصير .... (اسمي) و أخشى من المحذور.
4- كيف أعالج ضميري و أعلم يقينا أني لا أقدر أن أظلم أحد مقدار ذرة.
واجهته و قال لي إنه كان يمر بحالة نفسية نتيجة الظروف اللي يمر فيها و أنه يحبني و يقدرني ... يعني من هالاسطوانات اللي انتو عارفينها. قال إنه كان يحبها في صمت و هي ما تدري و لا تعرف.
بعد كم شهر فتحت جواله - هو اللي زرع الشك في قلبي - شفت 13 صورة لحبيبته ، و واجهته و قال إن هذي الصور لصديقي يبغي يخطب ، قلت لي انزين ليش ما مسحتهم. قال لي خلاص راح امسحهم. طبعا أنا ما صدقته بس مشيتها. خاصة إن هذي الصور مخزنة على جواله على فترات متفارقه.
تخيلوا سوى فيني كذا في السنة الأولى زواج و أنا حامل بولده. لا رحمني و لا قدر مشاعري و أنا زوجة حديثة ما مر زمن عشان يمكن أقول تملل. وما رحم إني حامل و تعبانه. لكن هم عديتها عشان ولدي اللي جاي ، قلت ما ابي يفتح عينه و يشوف أمه في صوب و أبوه في صوب.
على فكرة هذي البنت زميلة له في الشكركة بس في فرع ثاني و منها عرفت اسمها الحقيقي وفعلا يبدأ بحرف ال "ز".
اليوم بعد شهور من اللي صار ما ادري وش اللي خلاني افتح جواله، و شفت صورة لحبيبته.
هنا تذكرتك يا أختي "منك منقهر" .....
جه ياخذ تلفونه إلا أقوله ممكن تعطيني رقم "ز...... " لأن أخو صديقتي يبي يخطب!!
هو اعتفس وجهه و قال لي بشوف الموضوع ، أصريت عليه قلت له عطني اياه ، رد كرر بشوف الموضوع !!
و طلع راح شغله
أنا كان القصد مني أوصل له رسالة إني كشفتك... ما حبيت أكبر السالفة خاصة إن اليوم راح نسافر دبي نزور أختي ساكنة هناك.
شوروا علي يا أخواني و أخواتي ... شلون أتعامل معاه؟؟؟؟ الصراحة أنا كل ما لي و قلبي يعيفه.
اللي كان مصبرني الفترة اللي طافت إن قام يهتم فيني و يحاول يكون زوج صالح... بس الخيانة صعبة حتى لو كانت فقط على المستوى الفكري.
يكفي إني أحس بالإهانة إني أشوفه متعلق بغيري حتى لو كان ماضي... الماضي هذا المفروض ينساه مو يرسخه!!!! و بشهادته هو أنا مو مقصرة بالعكس كنت أحبه و مستعدة أعطيه عمري كله.
أنا عشان ما أطول ما بكتب أنا شلون وقفت وياه في كل محنة مرت فيه... هذا جزاء الإحسان!!!!!
شوروا علي كيف أتصرف .... و الله يجعله في ميزان حسانتكم.
__________________
الدنيا يمكن تكون حلوة ... بس يا ريتيني أقدر أفهمها !!!
02-02-2012, 11:18 AM
ضوابط المشاركة
العرض الشجري