السلام عليكم ورحمة الله وبركاته

الحقيقه مو انا صاحب المشكله انا ابشركم عزابي ومريح راسي

لكن المشكله على صاحبي ورفيق عمري واكثر من اخ

مشكلته باختصار

صاحبي رجل بمعنى كلمة رجل كريم وشخصيته قويه ومحترم

يعني باختصار مافيه عيوب قويه ( ومافيه احد كامل )

قبل فتره حسيت ان الرجال بخاطره شي ومتضايق بس مدري وش فيه ووش صاير له

المهم جلست احلفه بالله وش فيك يابعد راسي ونشبت بحلقه لين علمني ببعض الاشياء

قال يافلان زوجتي تركت بيتها والسبب ليته يخص صاحبي بس السبب يخص اهل صاحبي

يقول ان زوجته تقول مابي اهلك ولا ابي اجيهم ولا ازورهم ولا اشوفهم حتى

وسألها ليش قالت كذا امك تتكلم علي وماتحترمني وتدقني بالكلام

وانا بصراحه ماعرف ام صاحبي ولكن سألت اهلي عنها وانصدموا ان يجي منها كذا

لانها معروفه بالطيب والاحترام وانسانه على نياتها مالها بالمشاكل ابدااااااااا

وصاحبي يحلف لي بالله ويقسسم ان امه محترمتها وحاطتها فوق راسها وش تبين بس

الزبده بالموضوع صاحبي عنده ولد ومن راحت لبيت اهلها ماشاف ولده ولايبي يشوفه بعد

مو كره بالولد بس على كلامه ان اهل زوجته مع بنتهم ومايبون بنتهم تروح لاهل زوجها

المهم الرجال شكى لي مره وحاس ان الرجال متضايق وصدقوني هو لو يبي اختي والله لازوجه ولي الشرف

بس انا ابيه يرجع لزوجته ويرجع لولده وماينهدم بيته وانا مابي اقدم مصلحة اختي على مصلحة صاحبي

مهما كان الطلاق للاسسف اخر الحلول

صاحبي يقول بطلق ولا ابيها ولا ابي اشوفها حتى

بس ادري من ورا قلبه باين من كلامه مايبي يطلق ولو يبي يطلق طلقها من طلعت

وانا احاول اهديه واقول رح لأهلها وكلمهم وشف رايهم بالموضوع

يقول اهلها اخذوها من بيتي وتبيني الحقها بعد والمشكله ماجاء مني شي

انا بصراحه مدري شقوله لان فعلا اهلها اخذوها من بيتها وبطلبها هي وهو يقول مابي اهين نفسي والحقها

احيان يقولي صاحبي انا بطلق ولا اني مرجعها والولد عادي مايهمه بس ادري يكابر

والله ادري انه مو صادق ان الولد مايهمه اعرفه زين مو مضايقه الا ولده وكاسر خاطره ولاعب فيه

والحين ودي اساعده بحل مشكلته

وبقولكم شي اهل زوجته على حسب كلام الناس انهم بيرفعون قضية خلع

وابي منكم تعطوني معلومات هل يقدر الشيخ يخلعها وهي ترفض انها تروح لاهله وهي ماجاها شي من اهل زوجها بالعكس محترمينها وحاطينها فوق روسهم

اعذروني على التلخبط بالموضوع بسس مدري انا تكلمت معكم بعفويتي



ملاحظات :

- اهله مو معه بنفس المنطقه

- اهل زوجته يبون الطلاق وبيرفعون قضية خلع

- الرجال ما ارسل نفقه لولده نهائي ولا يبي يرسل

- صاحبي ماراح ولا كلم اهل زوجته ولا زوجته من طلعت من البيت

- هل من حق الزوجه ترفض تروح لاهل زوجها

ياليت تفيدوني وتعطوني راي عشان اساعد صديق عمري

انتظركم