من اسبوع كان يوم زواجنا ..
بالعادة أنا اللي احتفل فيه .. زوجي ينسي مرات لكن ينبسط كثييير
اذا جاء و شاف تجهيزات الحفلة ..!
طبعاً ما ينسي بعدها هدية المناسبه .. صحيح يجيبها بعد ما يمر اليوم
بيومين او ثلاث لكن يهمني اكثر انه ما ينساني أبدا ...

يوم زواجنا هالمرة غير .. غير بكل شي ..
بظروفنا و باحساسي و بزوجي و كل شي ..

اكثر شخص حبيته بحياتي هو زوجي رغم صرامته احيانا
و غيرته الشديدة من أتفه سبب ..
عشقي له اعماني عن حياتي و الناس حولي و خلاني استلذ كل
كل امر منه و تفسيره بأجمل تفسير ..
تحديت إخواني و صديقاتي و أمي فيه و رهانت بحبه لي ...

يوم عيدنا ..
كان جاي من سفر .. جهزت بيتي و ليلة هادية و نفسي و بنوتي
و ألغيت زياراتي و انتظرته ...
جهزت الحمام له و كانت ليلة رائعة كالعادة و هادية ...

بالصباح راح دوامه ..
قبل يرجع صحيت اجهز له الغداء و البيت و بنته لانه يحب يلعب معها اذا رجع من دوامه
و ينيمها معاه .. و ما نسيت نفسي ...
رجع لكن قال ما يبغي غداء و قال اشيل البنت يبغي يرتاح ..
قاومت كل احساسي اللي كنت حاسته و شكيت بنفسي و لا شكيت فيه
دقايق و هو طالع و جلس معنا ...
مرة يطالع تلفزيون و مرة يقلب بالجوال و أنا ساكته ..
بعدين قال ..
أنا احبك وانا وانا و أنا كلام كثير نسيته لما قال ..
أنا خطبت بنت عمي ...

بنت عمه ارمله اكبر مني عندها ولدين و كنت عارفة انه حاط عينه عليها
و امه بتزوجه إياها باعتبار انها بنت العيلة و أنا الغريبة ...

ضاع كل الكلام و عجزت عن الرد ...
ما استوعبت و ما صدقت لييييش طيب ؟! و أنا و حبي و حياتي و هو ..
و مثاليتي اللي أكرها ...
جت امه اليوم الثاني و تقول خليه يتزوج هذي بنت عمه و انتي و بنتك ما حد بيضركم
امه اللي اعتبرتها مثل أمي و خدمتها مثل بنتها و اكثر ..

عمري ما تألمت قد هالمرة ..
تعبانة حيييييييل و موجوعة و خجلانة من نفسي و اهلي
مو عارفة كيف اقول لهم ؟!
و لا قادرة أخذ قرار ... احبه إيه و أموت فيه بس مو حاس فيني
مو قادرة اتركه و لا قادرة ابقي معاه ..
خذلني قدام نفسي و قدام الكل ...
معقول طول هالمدة يخدعني و أنا اللي شايفته ملاك ..