السلام عليكم ورحمة الله وبركاته

فعلا لين قالوا الطيب بهالزمن ....
طيبتي سبب تعاستي

ايه .. الحين اقولكم ليش

مو عارفه من وين ابتدي ولا شلون افضفض كلامي ما راح يكون مرتب بس والله من زود مافيني
بس احس روحي مخنوقه وما عاد اتحمل
بالاخير انا انسانه وعندي مشاعر ومن حقي يكون عندي شخص يهتم فيني ويحس

انا -واعوذ بالله من كلمة انا- انسانه بسيطه جدا وماحب اشوف احد زعلان ومتضايق او اضايق احد
هالشي فيني من يوم كنت صغيره حتى لو كان الشي على حساب نفسي
دايما افكر ارضي الناس ويكونون مرتاحين مني او من غيري .. دايما مصلحة الناس قبل مصلحتي وراحتهم قبل راحتي .. ابي الكل يكون مرتاح مني وراضي علي
الناس تحسدني على شخصيتي .. اني طيبه واجتماعيه واحب اضحك ومادريت ان هالشي مع مرور الزمن راح يكون نقمه علي

صراحه انا شخصيتي تعبتني وخلتني عرضه للاستغلال وهذا الشي اللي قاعده اتعرض له الحين
صديقاتي يستغلوني .. اهلي يستغلوني .. كلمن يستغلني
طول الوقت الناس تعتبرني شي مفروغ منه
ماعرف اقول لا لأحد ولا عمري قلتها اصلا
وحتى لو اقول ماقدر او احاول استرد كرامتي او اخذ حقي .. يقابلوني بالاساءه واخر شي اقول اي !! مو عشان شي بس لانهم ماتعودوا مني اقول لا ويدرون ما بقولها اصلا !!
حتى لو احد غلط علي وانا ماكنت غلطانه .. ماعرف ارد واخذ حقي ابدا ابدا .. غباء صح .. بس للحين ما شفتوا شي

اهلي ماعمرهم حطوا اعتبار لمشاعري او شنو ابي ، اخواني يستغلوني احيانا عشان فلوس يدرون ان لو عندي ريال واحد عطيتهم ، يغلطون علي واسكت .. يسبوني اسكت .. مايفكرون اني ممكن اتضايق او ازعل وانا ماعمري بينت لهم هالشي .. اصك على نفسي باب غرفتي وابكي لين اتعب وبعدين اطلع كأن ما صار شي عشان مايحسون
الحمدلله عندي صداقات كثيره لكن صداقاتي مسببه لي تعاسه
لما تكون عندهم مشكله يرجعون لي واحاول اساعدهم بكل شي اقدر عليه واكون وياهم واعطيهم اللي يبون بأي وقت بس لما تنحل مشكلتهم وتكمل امورهم خلاااص كأني مو موجوده .. وقت اللي احتاجهم كلهم يتهربون كل شخص يتعذر بمشاغله واسبابه
يعتبروني شخصيه غريبه ومعقده لاني ما اوافقهم على كثير من الاشياء اللي يسوونها ويحبونها مثل الاغاني والمسلسلات وغيرها وحتى لما نجتمع مثلا او نتكلم يحسسوني اني كائن غريب ومايحبون يكونون موجودين
بس وقت اللي يبون مني اي شي ابدا ما اكون شخصيه غريبه بالنسبه لهم واكون حبيبتهم وصديقتهم
مشكلتي اني اعرف انهم يستغلوني ويستغلون طيبتي وسذاجتي بس بنفس الوقت اجاريهم واسوي لهم اللي يبونه وكون موجوده لهم

يعني مثلا ابسط مثال .. انا ابوي عصبي وشوي صعب التعامل معاه وقبل فتره صارت مشكله بين امي وابوي وكانت بتوصل للطلاق والكل كان ضد الوالد بس انا وقفت معاه وظليت اكلمه واتعامل معاه بالحسنى واخواني كانوا ما يكلمونه لكن لما انحل الموضوع الحمدلله بعدها صارت مشكله بسيطه والوالد انقلب علي وقعد يصرخ علي ويقول لي كلام مثل انتي قليلة ادب وماتستحين مع اني وربي وربي ماغلطت ولا قلت شي وقام ما يكلمني ومتغير علي لليوم مع اني حطيت بخاطري وظليت بالايام ابكي من الكلام اللي قاله لي وما كنت اشكي لأحد .. الظاهر هو كذا يجازيني لاني اعامله بالحسنى ووقفت معاه يوم اللي كل الناس كانوا ضده وبالاخير انا اللي سوى لي كذا

لاني طيبه او غبيه مثل ماتحبون تسمون كنت اسوي اشياء مو راضيه عنها بس لان غيري طلب مني هالشي وادري ان هالشي مهم بالنسبه لهم
ولنفس السبب كنت احاول اراضي اي شخص يزعل مني حتى لو انا ما كنت غلطانه ولا سويت شي
مثال .. عندي صديقه اقرب لي من نفسي ومع انها في كل مرة تغلط علي بدون قصد وانا اشيل بخاطري عليها بدون لا ابين لها ولا مره حاولت ان اكلمها وابين لها ان الشي يضايقني عشان ما تزعل
ايام دراستنا كانت تصيدها ظروف وكنت اترك كل شي حتى امتحاناتي بس اكون معاها واحل لها مشاكلها
وقت اللي تحتاجني اكون جنبها بس وقت اللي احتاجها ما القاها
لما انخطبت انشغلت هي وقامت تتهرب مني -مع اني وقتها ماكنت ادري بسالفة خطوبتها ولا قالت لي عشان ما احسدها لاني مو مخطوبه مع ان والله فرحت لها اكثر من فرحي بأهلي- قمت اسأل عنها وهي تتهرب ولما كلمتني واخيرا عاتبتها بصيغه كلش محترمه وماغلطت بس هي فاجأتني بأسلوبها .. قالت لي كلاااااااام مثل السم مع ان الموقف ابدا ما يستاهل وانا كل عتابي بس لاني اشتقت لها وظلت تهاجمني بالكلام وتهاجم وبعدين قفلت السماعه بوجهي
قلت ماعليه يمكن انا غلطت بحقها وقلت شي ماعجبها وانا مابي اسوي مشاكل خصوصا ان زواجها قريب رجعت كلمتها وقالت لي كلام اكبر منه وربي تمنيت الارض تنشق وتبلعني وقتها قمت ابكي وهي تكلمني وانا كلما بكيت زياده كلما زادت هي بالكلام ، جرحتني ونزلت بكرامتي حسيت اني حشره او شي حقير مع ان والله والله الموقف ابدا مايستاهل
بعدها بشهرين الظاهر هي احتاجتني اتصلت لي وكلمتها قالت انها تبي تكلمني وترجع العلاقات مثل ما كانت ... انا كبعا فرحت وتحمست وتقابلنا انا وهي وعاملتني بأفضل مايكون بعد عشر دقايق اكتشفت انها كلمتني لانها تبي مني شي !! وانا كان ردة فعلي بكل غباااااااااء سايرتها وسويت لها اللي تبيه !!!!!! حتى بدون لا اعاتبها ولا آخذ موقف على اللي صار .. ومن يومها مدري عنها صار لها شهر وادري لو تبي شي بترجع لي .. وانا بكل طيب نفس بسويه لها !!!!!!

مشكلتي اني اظل شاااايله بقلبي وكاتمه بالايام والاشهر وهالشي سبب لي ضفط نفسي ونتج عنها امراض لاني آكل بنفسي واتم متضايقه مع ان ابين للناس العكس لكني من داخلي احترق

ومواقف كثيييره غيرها لو بقعد اتكلم من اليوم لأسبوع ما راح اكمل
المهم انا بديت اخسر احترامي لنفسي وقمت اتضايق من نفسي
احس ان مالي قيمه عند احد وكأني شي بس يستغلونه ويرمونه وقت اللي يبون
ابي اتغير قمت احس اني شي غلط بالحياه طول الوقت متضايقه لاني أي شي
ابي اكون شخصيه لنفسي احترمها انا قبل لا يحترمونها الناس تعبت من الاستغلال
ليش انا كذا ؟ وليش اسمح للناس يدوسون علي واسكت؟ هل هذا غباء مني ؟
والله تعبت