أنا ودلآختي ,,, انصحوني من تجاربكم نساء ورجالا ,,
السلام عليكم ورحمة الله وبركاته .... كيفكم عسى ايامكم سعيدة بطاعة الرحمن ...
حبيباتي واخواني بطرح لكم عدة مواقف لي واتمنى تنصحوني سواء متزوجين او مطلقين او عزاب ...
وطرحي لمواقفي ليس استعراضا لبطولاتي أو حبا بالسوالف ..
لكن أبي اعرف هل حالتي طبيعية ؟؟؟ أو أحد مثلي ؟؟ مرات أحس إني طبيعية ومرات أحس إني عكس البشر ..
وأيضا مواقفي من باب الفضفضة لأني خااااااااااااايفة من القادم ,,
(( وبليززز لااحد يقول جايه امدح نفسي أنا جاية اطرح مشكلتي ولازم ابين كل حيثيات الموقف ومافيه احد عاقل يجي يمدح نفسه عند ناس مايعرفونه ولايعرفهم ))
السالفة اني انا مقبلة على شوفة ان شاء الله وأسأل الله ان ييسرها لي اذا هو خير لي ..
وانا لحد الآن ماادري متى الشوفة لأني سبق وحددتها بالإتفاق مع جميع الأطراف واختيار التوقيت المناسب
... لكن أمي الحبيبة سامحها الله تماطل بأهل العريس ,,, لكني واثقة بالله ..
عوما أنا قلت هالوقت بدل الضايع بدل ماتاكلين بنفسك يابنت وتهوجسين بأشياء مالها داعي
تجهزي معنويا وشكليا ,, وعطي نفسك رسائل ايجابية وجددي من شكلك عشان المعزب 
طبعا اختكم ماخلت ولابقت .... وقعدت أدهر واشتغل بنفسي معنويا وشكليا ...
بس لاانكر اني اقرأ المشاكل والقصص بالمنتدى واتخيل كل مشكلة بالمنتدى
ان معزبي هو بطل القصة 
...
طبعا انا اعمل جاهدة اني اتفادى كل الأخطاء بخطوباتي السابقة سواء بالتصرف أو اللبس أو الشكل أو الكلام ... انا شكلي الظاهري ثقل لكن من جنبها بصراحة ..
يعني اللي يشوفني ثقل بسم الله علي .. بس لما انحط بمواقف محرجة اطلع ام الدلاخة كلها ...
الموقف الأول : مرة جتنا حرمتين من طرف أهل العريس وماتزينت ابدا ولبست لبس الجامعة عااااادي وكانت فيني لامبالاة ... زين اني حطيت كحل وعطر
وطلعت عليهم مدري وش جاني بصراحة !!! عيوني تعلقت بالسقف
لان نظراتهم مركزة علي ولاادري وين اودي عيوني فكرت اغمض 
اذا التفت يمين الحرمة تقز فيني اطالع قدامي الحرمة الثانية عيونها علي ... يساري امي واخواتي ,, واخواتي انواع الإحراج يغمزون لي ويبتسمون وانا اضيع من الحياء ... المفروض دام اني مستحيه تكون عيوني بالأرض مو أحطها بالسقف <<< قسم بالله منتهى الدلاخة !!!
أكيد قالوا ذي مريضة او فيها حالة نفسية هههههههههههه وبتقعد تقابل ولدنا وعيونها بالسقف
وسألوني كم سؤال انزل عيوني واكلمها وارجع ارفعها بالسقف !!!! << الحمدلله والشكر بسسس
وطبعا وبكل تأكيد ماصار نصيب زي ماكنت حاسة .. بعذرهم والله
الموقف الثاني : جت حرمة وحدة ,, تشوفني ,, هالمرة تعلمت وقلت بنزل غرتي على عيوني عشان نظراتي تضيع ولااعلقها بالسقف !!
دخلت وسلمت واتجهت لها لتقبيل راسها لكن الحرمة قدرتني فابعدت راسها احتراما لي ,, لكني سحبت راسها بقوووة الا بقبل راسها غصب << منتهى النعومة
لدرجة الحرمة استسلمت لتقبيلي لراسها << ام السناعة ,,, ويمكن قبلت راسها خمس مرات فهي شوية !!!!
و انعقد لساني !!!! والله ماقدرت اتكلم ... عندما سألتني بعض الأسئلة فقد كنت ألتفت على أمي لتجيب عني ... وكأني استنجد أو أبحث عن مساعدة صديق !!! مع اني بحياتي العادية لساني منطلق واجتماعية ... مدري وش جرى لي ؟؟
الموقف الثالث : جاء اخو الحرمة صاحبة الموقف الثاني ...
ليراني رؤية شرعية طبعا ليلتها لم انام جيدا !! ومن غبائي لم اجهز لبسا مناسبا ..
على قولة امي لو تلبسين خيشة النصيب بيصيب !!!! استيقظت وتجهزت ولبست لبس بااااااااااايخ جدا ماينلبس بالجامعة الى يومكم هذا لاادري كيف لبسته اصلا !!!
ولاالبسه ابدا ابدا ابدا ابدا اصلا قديييييييييم جدا واسع جدا جدا كأنه خيمة ... وكانت البلوزة كت وركبت عليها بدي كم طويل بايخ شكلا ولونا ولايناسب البلوزة الكت ...
وانا بالعادة لاالبس هذا اللبس اصلا !!! وش خلاني البس هالتفاهه عند اهم شخص يراني !!
قسم بالله منقهرة على غبائي لكن خيرة من الله ... ولم اتمكن من لبس ملابس الجامعة العادية او العمل لأنها تصف تفاصيل الجسم وبصراحة لاعلم لي عن حكم لبس مايصف الجسم عند الخاطب لكن اهلي لايرضون ان البس ذلك عند الخاطب .. فلبست شئ بشع جدا ويفشششششل ... لو لابسه عباتي احسن لي من هاللبس الفاشل !! بيظن ان ذوقي سقيم دايم !!
وليتني اكتفيت بذلك .... بل دخلت بالمجلس ووضعت صينية الشاي أمام أخي وجلست بجانب الباب تماما عشان أسرع لي انحاش !!! وماقدرت اشوفه ابدا عيوني بالأرض ويديني مشبكة ببعض واضغط اصابعي وافركها ببعض .. ثم رفعت راسي وكني بحرب وسحبت نفس عميييييق ونظرت لستارة مجلسنا كني أشوفها للمرة الأولى ... وتمعنت بتفاصيل وشكل والوان الستارة عشان اريح نفسي ومااوتر نفسي وعشان مايلاحظني متوترة بهالشكل الغبي ,,, لكني هالثواني اعطيت نفسي دوافع ايجابية واني واثقة من نفسي ولي حق اشوف وجهه على الأقل ارتاح ... فوضعت عيني بعينه وابتسم !!!! هنا تمنيت الأرض تنشق وتبلعني !!
فلأول مرة بحيااااااااااااااااااااااااااااااااااااااااااااااا ااااااااااااااااااااااااااااااااااااااااتي 24 سنة يبتسم بوجهي رجل غريب
تمنيت اتغطى بشماغ اخي أو اطير وادخل داخل .... وحاول هو تلطيف الجو بسؤالي بأسئلة عادية يعرف اجابتها هو لكنه يبي يتكلم لتلطيف الجو !!! لكني بصراحة صدمت جدا !!!
قال كيفكم عساكم طيبين !! طنشت وكأني لم أسمع قلت بخاطري يارب عساه يقصد بكلامه اخوي واني اتوهم انه يكلمني ...لكنه كرر سؤاله ..
وانا بتقطع من الحيااااااااااااااااء منه ومن اخوي !! و لم استطع الرد على تساؤلاته ...
لكنه كان مصر جدا ورجع وطرح اسئلته وجاوب عني اخوي
وانا قلت كلمة ايه بس << مدري على اي سؤال كنت اصرفه
ولاانكر والله ان العبرة خنقتني جدا مدري هي روعة او وش بالضبط ؟؟ او لأن حنا بعادات عائلتنا مافيه حوار بين الشاب وخطيبته بس يشوف شكلها وبس فكان شئ مستغرب عندنا انه يسألني !!
لم تنتهي القصة هنا .... أشر لي أخي وهو مبتسم وقال تفضلي يافلانة ...
قمت طايرة زي البزران ماصدقت حان وقت الإفراج
وطبعا كنت بجنب الباب ركضت ركض بالمدخل وماتسمعون الا مهابد
وخبطت بباب الصالة
اكيد ابو الشباب سمع خبط الباب والمراكض والمهابد عشان كذا ماعاد رجع
قال ذي نعومتها زايدة مابيها 
واللي اوجعني وضايقني ... ان اخي جاء وكلمني وقال فلانة هل ارتحتي له ؟؟ قلت والله مدري عادي ..
قال كنت متابعك ليش معصبة وعيونك طايرة توقعتك ماتبينه ؟؟
وليش وجهك تغير لونه وكأنك زعلانة ومعصبة فشكلك كنك مارتحتي ولاتبينه !! شوفي يااخيتي ماحد بيغصبك عادي ماتبينه قولي مابيه ,, شكلك كان جدا تحفة شوي وتقومين تضربينه 
وطبعا ماصار نصيب ماالوم الشاب بصراحة
لكني الحمدلله بالمقابل شافوني ناس ووافقوا لكن تم الرفض مني واحيانا من اهلي ...
طبعا مواقفي في هالجانب كثيييييييييييييييييييييييييرة وكلها او اغلبها تفششششل ..
لكني هذي ابرزها واتمنى تنصحوني بالشوفة القادمة ان شاء الله ... وش أسوي ؟؟؟؟؟
سواء بالتصرف أو الشكل ؟؟
وهل مواقفي عادية ؟؟؟؟ والا دلاخة زي مااشوفها ؟؟؟؟
طلبتكم ابي نصايحكم ماعندي احد ينصحني بهالجانب نهائيا ...
وودي اطلع على الناس والرجال بطبيعتي العادية بحياتي اليومية بدون مااظهر الاحسن وبدون مااكون سيئة ... لكن دائما اطلع بطفاقة ودلاخة وانا مو كذا بحياتي مع الناس !! لدرجة امي واخواني يستغربون من هالحالة !!! لو انا مطفوقة بحياتي اليومية كان عادي بقول هذي طبيعتي واللي يبيني بيتقبلني ..
لكن انا مو كذا اساسا هذا اللي قاهرني !!!!
هل الخجل والإحراج يؤثر فيني لهدرجة !!!
وبصراحة اخاف يكلمني وانا مااقدر اتكلم اسسستحي بقوة واخاف يشكل عني صورة مغالطة لواقعي ...
كيف اظهر على طبيعتي ؟؟؟؟؟
انتظر نصايحكم الله لايحرمني منكم ...
__________________
الدراسة مقبلة دعواتكم
02-12-2011, 02:09 PM
ضوابط المشاركة
العرض الشجري