سبحان الله العظيم، اللحين الرجل يحلف لك بالله، وانتي تعرفين أنه صادق والناس تعرفه، وبالأخير تقولي لا أنا ماصدقته، مايصير أختي الله يهديك تعاندين وتهددين، واللحين الرجل لطيف معك ويترجاك ومادري ايش وتتغلين عليه، سبحان الله أبن آدم لما يكون الواحد طيب معه ولطيف تبدأ المداخل الشيطانية عليه من ناحية التكبر والتغلي والصد وشوفة النفس، طيب تصوري لو كانت ردة فعله مثل كثير من ردود الفعل اللي نقراها، مثل الضرب والصراخ والأساليب العنيفة اللي يستخدمونها الأزواج ضد زوجاتهم، أختي الفاضلة أحمدي ربكِ أنه أعطاك هذا الزوج المخلص وابتعدي عن وساوس الشيطان


لكن الذي لفت انتباهي واستغرابي، هو اصرارك أنك تبي تروحين لأهلك لما ترجعون ولا عاد تشوفينه !!!!! اسمح لي بالله هذا أسلوب تقوله زوجه لزوجها ؟ رغم أنه وضح لك كل وبين لك السبب وحلف لك بالله ووعدك بكل شي، وبالأخير تصرين وتقولين بروح لأهلي واتركك، أجل كيف لو كانت ردة فعله قوية وشديدة وكيف لو كان صحيح الرجل حاط مقاطعها بجواله علشان يستمتع فيها ويتذكرها وش راح تسوين، صراحة رد فعلك ماله أي مبرر وتهديد بالرجوع للأهل وتخربين بيتك بيدك، وأحمد ربك أنه متمسك فيك ويحبك، ولو غيره بعد ماوضح لك وبكى قدامك وأثبت لك أنه يكرهها ويحبك وأن المقاطع ناسي يحذفها وبعدين شاف رد فعلك بهالتهديد الغير المقبول أبداً صدقيني ماراح يتردد ويعطيك تذكرة ويقولك توكلي على الله من اللحين وروحي لبيتك وبلاش تهديدات وأساليب غير مقبولة تحدث في الحياة الزوجية، من مشكلة غير واقعية ولا شي


معليش على أسلوبي، لكن شي يقهر تشوف كثير من المتزوجات المسكينات، رغم الخيانات اللي يعملوها أزواجهم، رغم العنف اللائي يواجهن به، رغم الصراخ والضرب وعدم الاحترام وعدم اعطائهن حقوقهن ومع ذلك هن متمسكات في ازواجهن، وأنتي مجرد خطأ غير مقصود رحتي تهددي بالرجوع لأهلك، أختي حكمي عقلك في كثير من الأمور الزوجية التي لاينبغي أن يدخل فيها أسلوب التهديد والعناد وحركات الشيطان، الحياة الزوجية لابد لها من الاشياء الصغيرة ونحن بشر ولا بد لنا من الأخطاء الغير مقصودة أو اليسيرة، ومع ذلك يجب أن نغفر ونسامح لبعض وإن لم نفعل فإن مصيرنا الفشل


اتمنى منك لما يدخل بيتكم اللحين تستقبلينه بابتسامة جميلة وتحضنينه وتقبلين رأسه، وتبين له مدى حبك وغيرتك عليه، وراح تشوفين أثر هذا في حياتكم ومستقبلكم، الله يوفقكم أختي ويبعد عنكم الشيطان ويحفظكم