أقرى وأقرى وأتابع
وخلاااص أنا مليييت مو بس انتي
وجع قوي ..
ألم عنيف..
آه والله قلبي تقطع من ردودك حسيت أنا اللي عايشه هالعيشه مو انتي
ما عاد قدرت أتنفس خلااااااص
*****
المهم حكيت لزوجي عنك وأصبح وامسي وأنا في سيرتك....
وأول شي قاله: زوجها امممم يمكن هي زعلته ولا شي
قلت: والله تعرفون يالرجال تحامون عن بعضكم بعض صـح..
بعدها سمع السالفة كاملة ... وقلت له ليش فيكم هالحالة ... ليه لما تحسون ان ما عندكم سالفة تبدأون تضغطون ع الطرف الآخر وإن العيب فيه مو فيكم..
ويزداد الضغط والعصبية والكلام الجارح وإنها ما تفهم عليه وإنه ضيع وقته ع الفاضي وتجيبون الأولي والتالي وكله كذب في كذب وكنتم سعيدين ومبسوطين للغاية ... وما طلع نشر الغسيل إلا بعد ما استجد شي في الصحة..
قال التالي:
الرجل إذا خلاص عارف نفسه انتهى كل شي من حوله يشوفه ناقص لأنه في داخله تعبان ومتأزم لحد فظييييع جداً
زوجة حلوة ... مهتمة في نفسها ليش؟؟ مو هو ما يقدر على شي إذن يقعد يتذكر وينقهر ويضغط عليها أكثر
وأصلاً كفاية يشوفها قدامه يتألم لأنه يحس أنه مو كفؤ وهي تستحق الأفضل بس صعب ينطق بهالكلام
فلازم يضغط عليها عشان يقول فيما معناه أنا ناقص وانتي ناقصه وخلينا نكمل الطريق سوى ونصبر على بعض
أرجع اقول ... طيب هي صابرة مو عشان شي أو عيالها مكبلينها أو .... أو .....
هي صابرة عشان عيونه ... تحبه تعشقه ما عرفت من الرجال إلا هو .......و ......و.......
ليش ما يقعد ابن حلال ويفكها من النكد خلاص هي قابله فيه بحلوه ومره
رد زوجي العزيز: الرجال ما يعرفون كذا
أنا: وش تعرفون أجل ؟؟!!
زوجي: إن الدنيا مسودة في عيوننا ساعتها
أنا: بالله تكفى وطالبتك وداخله على الله ثم عليك بكره إذا صار شي لا تسوي كذا وتلعب فيك افكارك ترى احنا الحريم الكلمة الطيبة خلااااااااص تكفينا..
زوجي: لا ما يصلح
ورجعنا لبداية الحوار .. يعني للصفر للأسف وما خرجت بنتيجة معاه ومازال مصر على نفس الفكرة
إن هذا الموضوع معناته النهاية
ذكرته بالله ..ذكرته من الهدف من خلق الخلق وإن هالشي مو نهاية الحياة ويوقف عندها وحرام الضغط هذا وكلام كثيييير قلته
ولا فاااااااايده طلعت بيها وأبداً ما اقتنع انه ممكن يكون فيه تساهل من ناحية الخلل اللي فيه
في آخر الجلسة ... جلسنا ندعيلك من قلب والله ... إلى أن نام زوجي وسحب علي وتركني أفكر في هالسالفة ..
ليش الرجل بهذا التفكير ... يعني ما عنده إلا هالميزة وإذا راحت ماعاد يسوى شي ولا كيف؟؟ معقولة هذا التفكير؟؟
والله فعلاً كأن الرجال من المريخ والنساء من الزهرة
التفكير مختلف تماماً تماماً
لذلك يا أختي الغالية ..... عليك باللي ما يعجز عنه
سبحانه جل في علاه
خلااااااااص قومي وصلي لو ركعتين لو حتى قبل أذان الفجر بشوي وتحسب لك قيام ليل ومنها تدعين ربك وهو في السماء الدنيا سبحانه وتعالى
كل ليلة خليك كذا .... وطلعي اللي في قلبك كله ... كل اللي في نفسك قوليه وانطرحي بين يدي ذي العزة والجلال
وادعي انه يصلح حالك في الدنيا والآخرة
والله يا قلبي كل اللي شفتيه من هم وحزن وقهر لا يعادل شيء من عذاب جهنم نعوذ بالله منها
الله يجيرنا من نار جهنم إحنا وأهلينا وكل أخواتنا واخواننا في هالمنتدى الطيب وأهليهم أجمعين
والله لو وقفتي في أرض المحشر حافيه عاريه وتشوفين خلق الله يتحاسبون لتقولين ياليت جاني أكثر وأصبر ولا أوقف هالوقفة...
والله وأنا أختك لنقعد نتندم ونتحسف على كل اللي مر في حياتنا
والله لوو ما الله أوجد لنا الإستغفار والدعاء وهالمصايب اللي تتحاذف علينا مدري وش كان صار فينا
لا زيادة عبادة .... ولا زيادة ذكر ...... وأحيان ما نقدم الخوف من الله في بعض كلامنا وأفعالنا
نصلي صلوات وقلوبنا متعلقة بالدنيا
نصوم ونفطر وبعضنا ما تدبر في فايدة هالشهر
كتاب الله موجود منه نسخ وكووم كوم في كل بيت ... شوفي متى نفتحه ومتى نقرى فيه
صلة الرحم الله أعلم بحالها ... شهر نشوفهم وعشرة لا..
إن حجينا ولا اعتمرنا جلسنا ندعي ونبكي وشوي نتعلق بأستار الكعبة ويارب نبي من الدنيا ونبي ونبي وارزقنا واعطينا وسهل علينا
وأول ما نخرج من ساحة الحرم >>>>> هاتك يا شغل ودولاب الذنوب بدأ يدور
أدخلنا لبيوتنا القنوات الفضائية وصار البيت كله يرقص على وحده ونص
لو الأثاث ينطق كان تكلم بمقطع من أغنية ولا جملتين من مسلسل يتابعه أهل البيت
هذا غير الأمر بالمعروف والنهي عن المنكر اللي واجب على كل مسلم
للأسف نشوف مناظر قدامنا ونمشي ونقول واحنا مالنا ولا نتجرأ بعض الأحيان نتكلم وزين إذا دعينا وقلنا الله يهديهم
وبعضنا غرقااااااااان في ذنوب أكبر واقبح وكبائر عظيمة والحمد لله على كل حال
طبعاً هذا الكلام اوجه لنفسي أولاً ومو معناته إني أخصك فيه أو اقصدك هذا حال الأمة جمعاء إلا من رحم ربي
والثابت فيهم الله يزيده ويثبتنا معهم على القول والعمل الصالح
*****
ويا أختي العزيزة تخيلي شفتيلك سكران وانتي عارفه انه سكران بالفعل ومريتي من جنبه وانفك عليك شتايم وسب
بالله بتشرهين عليه ولا تزعلين منه ولا تقولين مغيب عقله الله لايبتلينا وبتكملين طريقك ولا كأنك شفتيه..
أكيد بتقولين الثانية أكيد بسويها..
خلاص اعتبري زوجك تعبان من أمر وهذا هو الغالب على تفكيره ومأثر عليه كثيييير
زودها معك ... هي كلمتين أو جملتين بمعنى أصح .. ( قايمة بدوري لوجه الله وانت خلك على كلامك ونقدك وشتمك وسبك وبعدين لا تجي بكره وتقول سامحيني يا فلانه والدين النصيحة يا فلان )
وروحي في حالك يابنتي....... ولا تحسسين نفسك انك في مصيبة ولا مشكلة ولا ضغط وترهقين عمرك
وتقعدين تحرقين أعصابك ... وتنتظرين كلمة حلوة منه.... يعني لما ما قال لك شي وش صار فيك وش نقص منك
ولما كان يقول أحبك وانتي قمر وحلوه بالله وش زاد فيك؟؟!!
كلها في النهاية أمور نفسية من الداخل ولا احنا كذا ولا كذا عايشين ونقدر ننجح ونتقدم بهالرجال ولا من دونهم
وبالعكس الأشياء المحبطة اللي حول الإنسان هي اللي تعلمه قيمة نفسه ويتعرف عليها أكثر وتخليه يحفر في الصخر
وينجح ويفخر بنفسه في نهاية المطاف
لا تقولين حسوا أنا احتاج وأحتاج ورومانسية
طيب وان حالياً مافي رومانسية تبين تمرضين ولا تجيك نفسية ولا اكتئاب وساعتها بتصيرين راضية عن نفسك واللي سويتيه فيها ...
فرضاً تعدل زوجك في المستقبل والله أراد له العافية.. ورجع أحسن من قبل ( وآمين يارب )
وانتي نفسيتك هلكانه وتعبانه ومقفله الدنيا بوجهك
وش تبينه يسوي .. يحط يده على خده ويقعد بالثانية يطبطب عليك!!!
عقلك في راسك تعرفين خلاصك وترى دوام الحال من المحال
والله يصلح لك زوجك وعيالك وحياتك ويبارك في أيامكم وأعماركم ويسهل عليكم دروب الخير ويبعدكم عن دروب الشيطان والشر ويجمعكم في جنته على سرر متقابلين وكل المسلمين يارب
11-10-2011, 04:30 PM
ضوابط المشاركة
العرض الشجري