ال
سلام عليكم اخواتي في المنتدى الكريم
انا عضوة من زمان معكم بس بكتفي اني اطلع على المواضيع بدون ما رد لانه ما شاء الله في ناس بالمنتدى اقدر مني على الرد وما بيقصرو وهاد يلي شجعني اكتب الكم
مشكلتي يمكن تكون كتير صغيرة بالنسبة للمشاكل التانية بس هي تاعبتني ومزعجتني رح احكيلكم وبتمنى تساعدوني
انا متغربة عن اهلي وعايشة مع اهل زوجي بقسم عبارة عن غرفة وحمام الله يكرمكم زوجي عنده اخوان شباب بالبيت ووالدته بالنسبة لاخواته هم قمة في الاحترام والدين والاخلاق ما عندي معهم مشكلة حتى ام زوجي انسانة خلوقة وطيبة ومحترمة وعنده اخت متزوجة وبنحب بعض انا وهي وبنحترم بعض
زوجي انسان اكتر من رائع بنحب بعض كتير وما في بينا اي مشكلة الحمد لله متزوجة من اكتر من سنة ونصف وعندي طفل صغير الله يحيمه
صارت مشكلة بيني وبين ام زوجي واخته وانجرحت كتير وانهنت كتير ويشهد علي ربي اني مظلومة وما رديت عليها ولا بكلمة وحدة وكبرت القصة على شي كتير تافه وحكو علي كلام كتير كانهن بيكروهوني واكتر رغم انه ما في بينا شي حتى زوجي حكالي انتي مظلومة وانا رح اخدلك حقك منهن انا رفضت لاني ما حبيت زعل امه واخته منه
وتجاوزت الموقف بس انا مو قادرة انسى الجرح يلي فيني لاني انهت اكثر مما بتتصورو بس كاتمة بقلبي ولا غيرت تعاملي معهن بالعكس عملتلهن كل شي بدهن ياه وهاد يلي قاهرني بزيادة اني حتى ما قدرت اخد حقي
المهم زوجي عرض علي ننتقل لسكن مستقل بس رح نكون بحالة مادية كتير كتير صعبة ورح تواجهنا مشاكل كتير لهيك رحمت زوجي وقلتله خلينا ناجل الموضوع شوي بس انا من داخلي متمنية اليوم قبل بكرة مو بس للمشكلة يلي حصلت لا انا كمان متمنية كون متلي متل اي زوجة عندي مملكتي اقدر اعمل يلي بدي ياه ما يكون فوق راسي رقيب عم يعد اخطائي ويتصيدها ويعطيني اوامر بكل تفاصيل الامور وهيك بحس اني عملت شي لكرامتي يلي انهانت بدون ما خلي زوجي يعصي امه وباخد حريتي بدون وجود شباب ياسرو حركتي مع العلم انه ووالدته مو بحاجة لوجوده بالبيت عندها تلات شباب غيره واكيد لو انتقلنا ما رح نقطعها ولا بحال من الاحوال
شوروا علي ننتقل ونتعب ماديا ولا اكتم بقلبي واصبر
بالنهاية دعواتكن الله ييسر امري لاني فعلا بحاجة الدعاء