السلام عليكم ورحمة الله وبركاته
كل الشكر لك مستشارنا الفاضل واسأله تعالى بهذا الشهر الكريم ان يعطيك كل ماتتمنى ..
ولكي اعبر بدقه اكثر سأكتب بالعاميه ..
عنوان مشكلتي (اخاف الفقد)
انا اخاف ان ماما وبابا واخواني يموتو وخوفي عليهم خووف ملازمني في كل لحظاتي ..
ما اتذكر الموقف الي جعلني اخاف بهذه الصوره الا لما كنت في الابتدائي كانت ابلتنا ربي يحفظها اعطت درس الموت اكثر من حقه وكانت مقدمة الدرس امك حتموت وابوك حيموت وكل الناس حيموتو غير انها كفنت لنـا عروسـه وادتنا اسماء اشرطه دينيه نسمعها ومن زود الشطاره سمعتها لكن ماافتكر اسم الشريط بس الداعيه وكان خالد الراشد .
انا عاادي اني انا امووت بس ماابغى اهلي يموتو تعبت وانا افكر في اليوم الى اقوم فيه وماالاقيهم حولي ..
تفكيري داااااااااااايم بس وقت النوم اكثر لأن بتكون فيه فرصه ابكي بكيفي ..
واذا جلست معاهم تلاقيني بس ظاهريا انا عندهم والا من جواتي اتنكد واحط في بالي ان جلستي معاهم دحين بتسير ذكريات ابكي عليها في يوم ما .
واذا احد كلمني بطريقة المفاجأه على طووول دمعتي تنزل احسو بيقولي ان فيه احد ماات مره كنت جالسه مع بنت خالتي وتسولف وفي وسط السالفه اتذكرت شيء وقالت لي اتخييييييييييييلي انا مباشره خفت وتلون وجهي اقولها ايش فيييييه وتضحك تطلع سالفه عاديه ماارتحت الا لمن قمت بعيد عنهم وبكيييت ..
او اذا اي احد مرض لو مرض بسيط ابككككي واتعذب احس ان مرضو هذا عشان بيموت ..
وسرت اتوهم اني مريضه بالخبيث ( الله يعافينا ) واحيان احس اني مخنوقه وخوفت اهلي معايا
ومن مستشفى لمستشفى وما ارتحت الا لما شفت الفحوصات سليمه الحمد الله وبعدها خلاص ماسرت اتوهم انو فيني امراض ..
واحيان يمرو عليا يومين ماانام فيهم الا ساعه ساعتين وتلاحظ عليا ماما التعب وتسألني ايشبك اقولها انا اخاف انك تموتي تحضني وتقولي شيء انا ماابغى اسمعو في البدايه تقولي انا مااعرف عمري قبلك او بعدك وهذي امور غيبيه ماعلينا الا اننا نؤمن فيها ونستعد لها وتتكلم عن نعيم الاخره انا ماابغاها تقولي كذا بس ابغاهم يقولو لي انهم ماراح يموتو قبلي .
سرت اكره غرفتي مااحوب اجلس فيها وقت ما البيت ينام اخرج برى واسمع اي شيء يشغلني عن التفكير الى ماانام وانا ماادري او لحد مايصحو . كمان البيت كله ماابغى اجلس فيه وتلاقيني دايما مااقول الا انا طفشششانه بخرررج تعبت من البيت والمشكله حتى وانا برى يبقى نفس التفكير لكن مو زي لما اكون لوحدي ,,
مااقدر اتحكم بتفكيري نفسي ابعد كل هذه الافكار الي عذبتني ..
وفي دراستي احياان اششد مره عشان بهرب من افكاري واحيان اتكسسل مره اقول وايش يعني شهاده ؟ واحنا بنموت ..
نفس الشيء بباقي امور حياتي احيان اديها حجمها محاوله مني ابغى ارجع طبيعيه واحيان اتساااااااهل واقول كلنا بنموت ؟ وايش يعني لو جات الامور زي ماانا ابغاها او العكس ؟
ولما اتعب مره في الليل اقوم اصلي واقرأ قران الاقي في القرآن ( كل من عليها فان )
او ( انك ميت وانهم ميتون ) او ( ولنبلونكم بشيء من الخوف والجوع ونقص من الاموال والانفس والثمرات ) او ( كل نفس ذائقة الموت ) ..
وانا افهم انو ماراح يحصل الا الي ربي كاتبو لنا وان الله ارحم فيني من نفسي واني لو اطلعت على حياتي قدام مااختار الا الي اختاره الله ليا واعرف انو احيانا الموت راحه لكن كل هذا الكلام يريحني مؤقتا مايخرجني من تفكيري كثير ..
هي سارت عندنا حالات وفيات الله يرحمهم يارررررب وجميع موتى المسلميـن لكن سارت وانا كبيره وانا اصلا كذا من زمااااااااان من الابتدائي الى الان انا اولى جامعه دحين .
//
وانا مااعرف مشكلتي مكانها عندك او لا لكن الاكيد اني نفسيـه .
اتمنى اكون عرفت اكتبها مزبوط زي ما انت تبغاها .
واي سؤال حاضره وجزاكم الله خيراً .
07-08-2011, 02:35 AM
ضوابط المشاركة
العرض الشجري