بسم الله الرحمن الرحيم

السلام عليكم ورحمة الله وبركاته

كيف حالكم

اشتقت لردودكم الحكيمه


وتعودت استشيركم بالمواضيع اللي تشكل علي

نحن الآن كما تعلمون في العطله الصيفيه واليوم والدتي قالت لي نبيك تودينا لمكه على الطياره أو للشرقيه على السياره ، أنا ما عندي مشكله لكن المشكله هي الوالده نفسها ، الوالدها الله يخليها لنا ويطول بعمرها ويشفيها يارب وجميع مرضى المسلمين معاقه وما تمشي إلا بمساعده وتعرفون أنتم مكه الحين صار الحرم بعيد والفنادق فيها درج كثير وفيه مشقه كبيره على الوالده هذا بغض النظر عن الطائره انا ما ادري فيها مصعد للمعاقين ولا لا لأني بحياتي ما ركبت طائره ابداً ولا اعرف نظامهم والمشكله اذا وصلنا مطار جده لازم نستأجر سياره نروح فيها لمكه طيب وشلون بركب أمي في المرتبه الورانيه وهي معاقه؟؟ هي متعوده تركب قدام ما تعرف تركب ورا ابد، أما بالنسبه للشرقيه أقصد الدمام والخبر وهالمناطق بالنسبه لوالدتي بعيد عليها لأن أمي الله يرفعها بالعافيه صعب عليها تدخل حمامات المحطات وانتم بكرامه وتعرفون انتم حمامات المحطات ووساختها وخطورتها بعد
وأمي اذا ركبت السياره وطولت فيها تدوخ واخاف يجيها تشنج ولا شي ، أحياناً نروح لديرتنا وهي تبعد ساعتين عن الرياض أو أقل شوي وأمي تتعب من الطريق وشلون لو مسكت بها خط 4 إلى 5 ساعات ، هذا بالإضافه إلى انه ما عندي سياره مناسبه سيارتي جديده بس انها صغيره وبيروح معنا اخواتي ، والحاله الماديه ما تأهل وابوي بخيل جداً ما راح يعطيني فلوس للسفر

مع ان امي مو كبيره لكن حسبي الله على من كان السبب

نحن من سكان الرياض

وأنا في حيره من أمري ما ادري وش اسوي

أرفض طلبها واقولها يا أمي صعب السفر علينا ولا أتوكل على الله واللي فيها فيها ؟؟

طلبتكم:

ادعوا للوالده ولجميع مرضى المسلمين في ظهر الغيب بالشفاء العااجل القريب بإذن الله تعالى

__________________
استغفر الله الذي لا إله إلا هو الحي القيوم وأتوب إليه