أريد رأيكم وملاحظاتكم لهذا الخاطب ؟! ؟! - منتدى عالم الأسرة والمجتمع

12-03-2011, 05:10 PM

بصيص أمـل

عضو جديد

تاريخ التسجيل: Mar 2011

المشاركات: 18

أريد رأيكم وملاحظاتكم لهذا الخاطب ؟! ؟!

السلآم عليكم ورحمة آلله وبركآته

يآرب تكونون بأتم صحه وعآفيه ..

بدخل بالموضوع مبآشره وفي البدايه بحكي لكم عن نفسي شوي

عشآن تكون الصوره وآضحه للكل ..

أنآ بنت عمري 23 سنه مطلقه لي سنتين من قريبي (وتحديدا ولد خآلي)
وعندي طفله عمرها 3 سنوآت ..

تقدم لي كم شخص ولحكمه مآيعلمهآ إلا ربي ( يتفركش الموضوع )
من آلبدآيه .. وإن شآء الله أنهآ خيره ..

قبل فتره آلوالد في الدوآم جلس مع وآحد مطلق وعنده أخت مطلقه
وكآنوا يسولفون في موضوع الزوآج ,, وأبوي يمزح يقول ودي أعدد وآخذ الثآنيه
المهم قآله هذا المطلق أنو عروسك عندي ( يقصد أخته ) رجع رد عليه أبوي وقاله
وأنت عروسك عندي ( يقصدني ) وضحكوا وأنتهت الجلسه

وأبوي كآن مآخذ الموضوع مزح × مزح

ومرت على السآلفه شهر ,,
وجاء زميل لأبوي ( كآن جآلس معهم بنفس الجلسه )
وقآل لأبوي , فلان يقول وش صار على موضوع الزواج وهل هو جآد
يوم يقول عروسك عندي ؟؟؟!!!!

أبوي أرتآع مآتوقع أنه يآخذ الموضوع جد !

قاله أبوي والله إذا بيتقدم الله يحيه , أنا عندي بنت مطلقه وعندها بنت
وبعد فتره أتصل الرجال على أبوي وقال عآدي أتقدم لهآ وأشوفهآ ..

قآل أبوي الله يحيك .. وأبوي كآن عارف أخلاقه في العمل ( مبدئياً )
وجاء مع خالته لإن أمه متوفيه الله يرحمها

وشافني شوووفه شرعيه وبعدها بيوم أتصلت خالته الساعه 12 في اللي
وقالت الولد يقول أبيها وسألت الوالده وش رايي فيه ؟ وقالت لها الوالده تقول ماشفته
زين

لإني فعلا أعاني من ضعف بسيط ومآأركز وأقز الا بالنظاره وعدساتي مخلصه مدتها
ولاقدرت ألبسهآ

وللأمانه مآيهمني شكل الرجال بقد ماتهمني أخلاقه ورجولته
بس كان ودي أشوف وجهه كيف وكذا ..

(( المهم الصدمه بعد يومين ))

لما سأل أبوي عنه ناس مقربين منه وزملاء معه من سنييييييين
طلع ((مطلق مرتين )) !!

تضآيقت كثير كثير كثير وحتى أهلي تضايقوا أول شي لأنهم مآصآرحونا من البدآيه
وثآني شي لإنه مطلق مرتين !!

أتصل عليه أبوي وقاله سمعنا كذا وكذا !!

قال إيه والله مطلق مرتين المره الأولى وأنا صغير
والثآنيه مآتفاهمنا أبد ومشاكل ,,
وأنا ماقلت لإني أعتبر هذا ماضي والماضي مب مهم !!
ودآمك سألتني فأنا بقولك !!

اورجعت الوالده أتصلت على خالته وقالت لها أسألك بالله
كم مره مطلق وليش ؟؟

وقالت أنه مطلق مرتين المره الأولى كآنت تغازل وخربانه الله يستر عليها
والثانيه مستهتره مرررررره ومقصره بأمور بيتها

وقالت لأمي |
أنه تعبت نفسيته بعد هالتجربتين وماكان يبي يتزوج بس سبحان الله
تكلم مع أبوكم بهالموضوع تغير رآيه ..

ألحين أبوي مو مرتاح مره يقول شكله عجل والطلاق عنده سهل مره
وغير كذا لقى بملفه كم سفره للخآرج ( أتوقع مرتين )

أنا مرتاحه للموضوع لإنه سنه مناسب ومو كبير عمره ( 33 ) تقريبا
مآعنده أطفال
غير مدخن
مو راعي شراب أو حشيش والعياذ بالله ( وهذا شي متأكدين منه من ملفه اللي بالحرس )
بيكون لي سكن مستقل
عسكري ووظيفته معروفه ( بالحرس الوطني ) يعني ثابته إن شآء الله
بيكون هذا زواجه الثالث وأتوقع بيحاول يحافظ عليه بقد مايقدر !

ومو مرتاحه
لإنه مطلق مرتين وبالمرتين ماصبر كثييير مره 3 شهور ومره 11 شهر .. !
سفراته للخارج ( مع أنها مو كثيره ) بس خايفه منها شوي
وصل لثاني متوسط (( ووقف دراسه ))
وأنا معي ثانوي ودبلوم وحاليا أشتغل ( مدربة حاسب ) (( وظيفه مؤقته ))
وبنتسب للجآمعه إن شاء الله بداية السنه الجايه
كذب علينا في البدايه وماقال أنه مطلق مرتين !!

بكل صرآحه |

وش رآيكم بهالخاطب من كل النوآحي
وهل تشوفون فيه تكافؤ بينآ ؟!
وجزآكم الله خير مقدماً

.
.
.

أختكم | بصيص أمـل

التعديل الأخير تم بواسطة بصيص أمـل ; 12-03-2011 الساعة 05:15 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه