اعتذر كثير لتأخري ، بسبب تغيبي يومين و إغلاق الإدارة للموضوع و الشكر لهم لفتحه لي مجدداً ..
و أمس كتبت رد و علق جهازي و طار الرد .. من جد انقهرت و اليوم ولدي مقسم نص شاشة اللاب
توب ( أفلام كرتون )
و السبب الأخير ، إني حبيت أجرب نفسي بعد ما سمعت لنصايحكم و أحاول تطبيقه قدر المستطاع
لإني راح أكذب عليكم إن قلت ، استفدت بس من غير ما أطبقه فعليا و أشوف نتايجه ؟
من جد ، استفدت من الردود جميعها .. و رد الأخت الغالية عبير الأحلام بأخليه للأخير
لإنه من جد ضربت وتر حساااااااااااااااس كنت أبحث عن ردها من زمان و لقيته
.
.
بأضيف شئ ..
1 - صحيح إنه الحمل له دور رئيسي في لخبطة مشاعري و خاصة الفترة هذه ، حاسة بأحاسيس
ملخبطة و مرات أكون عادية و مرات أحس بضيق و مرات بس أبغى أبكي ؟ في حملي بولدي توحمت
على زوجي ، بس شكله حملي هذا بأتوحم على ولدي .. ههه صاير يعصبني مررة و لازق فيا بقوة
س برضو ، اللي زاد علي ، غير الأسباب السابقة من مرض الوالدة و عدم الإستقرار و قرار التأجيل :
2 - مشاعر العودة من الإغتراب مثل ما قالت الغالية الغربة مرة .. إنها مشكلة الـ culture shock
أحس مازلت ماني قادرة أتأقلم على الوضع الجديد ؟ و تضارب الثقافات بداخلي ..
3 - زوجي .. صح إنه حنون و طيب ، بس بأشتكي من السلبيات اللي عجزت أتعامل معها ؟
و عشان كذا بأخلي رد عبير الأحلام اخر شئ .. ^^
4 - من يوم كان عمري 6 سنوات .. عمري ما جلست فاضية من غير دراسة و لا وظيفة زي هذه الفترة
فحاسة إني ماني قادرة أجلس فاضية ؟ و الشئ هذا مزعجني .. بس بأضحك على حالي و أقول
أتخيل حالي في إجازة و منها راحة عشان تعدي فترة الوحام الـ 3 أشهر ..
و تعودت في الخارج ، أمورنا تمشي بلمح البصر .. و هنا أوراقي تمشي ببطء السلحفاة ..
.
.
اللي حصل في الفترة الأخيرة ، نقلنا لشقتنا ،، طبعا - هجولة - و لخبطة ..
لإنه مافيش مطبخ لحد دحين و الأكل من السوق يوميا ،.
و أنا أكره أكل السوق .. عكس الناس ..
و ما أبغى زوجي يتعود إني أكل في بيت أهلي ، لإننا كنا كذا قبل لا نتغرب في بداية زواجنا ..
قلت له ، مو لازم دحين السرير .. نجيب أساسيات المطبخ أهم من السرير .. أو أخذ فرن صغير من
عند أختي مؤقتا و بوتجاز صغير من أمي.، و الصحون حقتي كنت شايلتها من زمان عند أمي .. بس
زوجي ما رضي أخذ الفرن و لا البوتجاز .. فتركته براحته ..
زوجي دوامه فترتين ، و هو رايح لشغله في العصر .. بأروح لعند أمي و في نص الليل نرجع للبيت ..
الصراحة .. زوجي لإنه صرف راتبه على المكيف و التلفزيون و قسط السرير و كذا.. فقلت له : غرفة ولدي
أنا بأتكفّل فيها ، أقصد سرير ولدي .. و أمس رحت مع زوجي و شريت طقم سرير و دولاب و مكتب
و كومادينة لغرفة ولدي و بتكون جاهزة إن شاء الله بعد أسبوعين .. لإني أحس إنه غرفة ولدي ماهي
أسااسية بنظر زوجي ، بس أنا حابة أفرّح ولدي و أجهزها له و ما أبخل عليه و ما فيا أستنى كم شهر..
.
.
زوجي قال لي من كم يوم راتبي خلّص ، و إن شاء الله الشهر الجاي بأجيب كذا و كذا ..
افتكرت النصايح و نحن رايحين نجيب عشاء .. و ما قلت له أنا بأجيب العشاء .. و أحس إني ضغطت
على نفسي لإني حزنت عليه، بس ارتحت .. افتكرت النصايح ( بإنه هو الرجال .. و لازم يتصرّف ) ..
و لقيته قدر يتصرف و الحمد لله ، بس الصراحة قبل أمس خرّجت شئ بسيط .. بس 50 ريال عشان
شفته صرف كثير و اليوم عزمته عالمطعم .. لإني اشتهيت أتغدى من مطعم و مليت من الرز و الدجاج ..
قلت له بعدين ( يعني شايفة زوجي بيتعب و يصرف علينا و ما يقصّر ؟ و ما أحاول أشيل عنه شوي ؟ )
رد علي ( الله يخليك ليا و ما يحرمني منك ) ..
ملاحظة: زمان .. كان زوجي إذا شافني أصرف و كان معاه مبلغ ، فما يقول إنه معاه .. فيقوم يصرف
المبلغ على نفسه و يتركني أصرف .. حالياً ، إذا معاه فيحاول ما يبخل علي .. يعني مشيت مع زوجي
بالتدريج من بداية الزواج .. يعني إذا شفته تغير للأفضل و ما قصر معانا ، فأساعد بطريقة ثانية ..
.
.
فيه أمور صغيرة مضايقتني ، بس بأحاول أسيطر عليها و أقرأ كتاب ( رجال من المريخ و نساء من
الزهرة ) و أشغل نفسي قدر ما أقدر .. و أستغل الفترة إني أطبق النصايح .. و أرتب حياتنا ..
و أغيّر من حالي كمان .. يمكن أنا و زوجي ماحنا متأقلمين على الحياة الجديدة هناا ؟
لإننا عشنا سوا في الخارج ، أكثر من حياتنا هنا مع بعض ؟
.
.
لي عودة مع الردود السابقة بشكل سريع ..