السلام عليكم

امس لما رجع زوجي من صلاة الجمعه و الخطبه كان فرحان و مستانس و يغازل و حركات و و و
و بعدين حضني و باسني و قالي اني احبك بشكل ما تتصوري اكثر من نفسي و انت احسن زوجه بالعالم
و انت اعطيتيني اجمل هدية عمري و هي عيالنا و انت اصيله و جميله و و و
طبعا انا كنت مبسوطه بالكلام و بالمقابل كنت اقوله نفس الكلام او يمكن زياده حبتين

المهم بعد كل المقدمات هذه قالي انه صديقه ( مش صديق مقرب انما بس يشوفه من فتره لفتره ما يعرف عنه شي ثاني غير اسمه)
قاله انه في وحده معجبه فيك و تسأل عنك و طلبت مني اعطيها رقمك بس انا قلتلها انك متزوج و عندك عيال
و البنت قالت عادي مش مشكله ابغى اتعرف عليه و نيتي سليمه
و بعدين صديقه قالها خليني اسأله اول شي و اذا موافق يعطيكي رقمه و هي قالت طيب مستنيه ردك

زوجي قالي انه ما صدقه و اعتقد انه يمزح معه و مقلب و كدا المهم صديقه حلف انه صادق و انها ماهي مزحه و سأل زوجي ايش رايك اعطيها و لا بلاش
زوجي عصب عليه و قاله انت تعرف اني متزوج و عندي عيال و احب زوجتي
صديقه قاله انا عارف كل هذا بس البنت ما تبغى تستسلم
و دائما تسألني عنك و قلتلها انك متزوج و محترم و مش راعي الحركات هذه بس امنتني و حلفتني اني اسألك و ارجعلها ردك بالموضوع
زوجي قاله خلاص عرفت ردي و قولها تحترم نفسها و حدودها من غير ما حتى يسأل عنها و من تكون و كدا

زوجي يقولي الكلام هذا و هو مبسوط و فرحان انه في معجبات و انا اغلي نار من الغيره
و قالي عيوني ما تشوف غيرك و قلبي عمره ما راح يحب غيرك و كلام كثير عشان يسكتني و يهديني
انا عصبت على صديقه العله الحقير و قلت كيف اتجرأ اساسا انه يجي و يقولك شي مثل كده
و سألته ايش اسمه و من يكون و مين البنت الواطيه هذه كمان

قالي الحين هذي جزاتي اني قلتلك عن اللي صار و كنت واثق انك راح تتفهمي
و انك راح تكوني فخوره فيني لأني وقفتهم عند حدهم.. كان احسنلي ما قلتلك شي و خليته سر لنفسي
هديت شوي و قلتله انا واثقه فيك 100% بس اللي عصبني صديقك هذا..
و انا و الله اعرفك و اعرف اخلاقك و واثقه فيك اثر من نفسي

حلفته يقولي من يكون صديقه هذا و الا راح ازعل منه و زعلي مو سهل و هو يعرف الشي هذا (اتقي شر الحليم اذا غضب)
و قالي عنه و من يكون و انه عزابي مش متزوج , قلتله طيب ليش ما اخذ البنت لنفسه صح انه غبي
و كرهته من قلبي و ما اطيقه

قلت لزوجي مشكور على صراحتك و انت كبرت بعيني اكثر و سألته لو نفس الشي صار معي تبغاني اقولك زي ما قلتلي
طالع فيني كده و اتلخبط بالكلام و قالي اساسا ما يصير لأنك متزوجه و الرجال غير عن الحرمه
ضحكت من قلبي لأني شفت الغيره بعيونه و قلتله صح بس اولاد الحرام كثار و هما ما يخافون الله و لا هامهم متزوجه و لا لأ
و رجعت سألته تبغاني اقولك ولا كيف طالع فيني بقوه و قالي هذا ما يبغاله كلام
و الله لأذبحه و اقطعه هذا اساسا حقير و ما يستاهل يعيش
مع انه ما رد على سؤالي الا انه كان كفايه ردة فعله :14:

انتهى الموضوع على كذا بس الموضوع ما طلع من بالي و كنت افكر فيه كثير
و الغريب انه كل مواضيع المنتدى اللي يشتكوا من خيانة ازواجهم او اللي تزوجوا عليهم او معاناة الزوجه الأولى و الثانيه
و مثلها من المواضيع كلها مرت قدامي و عشت الدور و حسيت بكآبه و احساس اول مره بحياتي احسه
احساس صعب اوصفه الله لا يوريكم ان شاء الله
تعوذت من الشيطان و استغفرت الله و خلاص مسحت الموضوع و سكرته


الحين كل وحده تقول كيف كان راح يكون ردة فعلها و كيف كانت راح تتصرف
و اللي سويته انا صح و لا غلط

ابغى امنع زوجي من انه يتكلم مع صديقه الحقير هذا ايش رايكم يحقلي و لا لأ

و ايش اسوي مع الوساوس اللي بدأت في راسي

استغفر الله العظيم